Mahabharata · Chapter 13.23

śrutvā tu vacanaṃ mātuḥ kruddhāyāste bhujaṅgamāḥ /
kṛcchreṇaivānvamodanta keciddhitvā diśo gatāḥ //

ye pratasthurdiśastatra kruddhā tānaśapadbhṛśam /
bhujaṅgamānāṃ mātā'sau kadrūrvairakarī tadā //

utpatsyati hi rājanyaḥ pāṇḍavo janamejayaḥ /
caturtho dhanvināṃ śreṣṭhātkuntīputrāddhanañjayāt //

sa sarpasatramāhartā kruddhaḥ kurukulodvahaḥ /
tasminsatre'gninā yuṣmānpañcatvamupaneṣyati //

evaṃ kruddhā'śapanmātā pannagāndharmacāriṇaḥ /
guroḥ parityāgakṛtaṃ naitadanyadbhaviṣyati //

evaṃ śaptā diśaḥ prāptāḥ pannagā dharmacāriṇaḥ /
vihāya mātaraṃ kruddhā gatā vairakarīṃ tadā //

tatra ye vṛjinaṃ tasyā anāpannā bhujaṅgamāḥ /
te tasya vājino vālā babhūvurasitaprabhāḥ //

tāndṛṣṭvā vāladhisthāṃśca putrānkadrūrathābravīt /
vinatāmatha saṃhṛṣṭā hayosau dṛśyatāmiti //

ekavarṇo na vā bhadre paṇo nau suvyavasthitaḥ /
utakāduttarantaṃ taṃ hayaṃ caiva ca bhāmini //

sā tvavakramatirdevī vinatā jihmagāminīm /
abravīdbhaginīṃ kiñcidvihasantīva bhārata //

hanta paśyāva gacchāvaḥ sukṛto nau paṇaḥ śubhe /
dāsī vā te bhaviṣyāmi tvaṃ vā dāsī bhaviṣyasi //

evaṃ sthiraṃ paṇaṃ kṛtvā hayaṃ te taṃ dadarśatuḥ /
kṛtvā sākṣiṇamātmānaṃ bhaginyau kurusattama //

sā dṛṣṭvaiva hayaṃ mandaṃ vinatā śokakarśitā /
śvetaṃ candrāṃśuvālaṃ taṃ kālavālaṃ manojavam //

tatra sā vrīlitā vākyaṃ vinatā sāśrubindukā /
uvāca kālavālo'yaṃ turago vijitaṃ tvayā //

dāsī māṃ preṣaya svārthe yathā kāmavaśāṃ śubhe /
dāsyaśca kāmakārā hi bhartṛṇāṃ nātra saṃśayaḥ //