Mahabharata · Chapter 13.237

bhagavandevadeveśa viśiṣṭaṃ yajñamucyate /
laukikaṃ vaidikaṃ caiva tanme śaṃsitumarhasi //
maheśvara uvāca /

devatānāṃ tu pūjā yā yajñeṣveva samāhitā /
yajñā vedeṣvadhītāśca vedā brāhmaṇasaṃyutāḥ //

idaṃ tu sakalaṃ divyaṃ divi vā bhuvi vā priye /
yajñārthaṃ viddhi tatsṛṣṭaṃ lokānāṃ hitakāmyayā //

evaṃ vijñāya tatkartā sadāraḥ satataṃ dvijaḥ /
pretyabhāve labhellokānbrahmakarmasamādhinā //

brāhmaṇeṣveva tadbrahma nityaṃ devi samāhitam /
tasmādviprairyathāśāstraṃ vidhidṛṣṭena karmaṇā //

yajñakarmi kṛtaṃ sarvaṃ devatā abhitarpayet /
brāhmaṇāḥ kṣatriyāścaiva yajñārthaṃ prāyaśaḥ smṛtāḥ //

agniṣṭomādibhiryajñairvedeṣu parikalpitaiḥ / suśuddhairyajamānaisca ṛtvigbhiśca yathāvidhiḥ /
śuddhairdravyopakaraṇairyaṣṭavyamiti niścayaḥ //

tathā kṛteṣu yajñeṣu devānāṃ toṣaṇaṃ bhavet /
tuṣṭeṣu sarvadeveṣu yajvā yajñaphalaṃ labhet //

devāḥ santoṣitā yajñairlokānsaṃvardhayantyuta /
ubhayorlokayorbhūtirdevi yajñe pradṛśyate //

tasmādyajvā divaṃ gatvā amaraiḥ saha modate /
nāsti yajñasamaṃ dānaṃ nāsti yajñasamo nidhiḥ //

sarvadharmasamuddeśo devi yajñe samāhitaḥ /
eṣā yajñakṛtā pūjā laukikīmaparāṃ śṛṇu //

devasatkāramuddiśya kriyate laukikotsavaḥ //

devagoṣṭhe'dhisaṃskṛtya cotsavaṃ yaḥ karoti vai / yāgāndevopahārāṃśca śucirbhūtvā yathāvidhi /
devānsantoṣayitvā sa devi dharmamavāpnuyāt //

gandhamālyaiśca vividhaiḥ paramānnena dhūpanaiḥ /
bahvībhiḥ stutibhiścaiva stuvadbhiḥ prayatairnaraiḥ //

nṛttairvādyaiśca gāndharvairanyairdṛṣṭivilobhanaiḥ /
devasatkāramuddiśya kurvate ye narā bhuvi //

teṣāṃ bhaktikṛtenaiva satkāreṇaiva pūjitāḥ /
tenaiva toṣaṃ saṃyānti devi devāstriviṣṭape //

mānuṣaiścopakārairvā śucibhiḥ satparāyaṇaiḥ /
brahmacaryaparairetatkṛtaṃ dharmaphalaṃ labhet //

kevalaiḥ stutibhirdevi gandhamālyasamāhitaiḥ / prayataiḥ śuddhagātraistu śuddhadeśe supūjitāḥ /
santoṣaṃ yānti te devā bhaktaiḥ sampūjitāstathā //

devānsantoṣayitvaiva devi dharmamavāpnuyāt //
umovāca /

triviṣṭapasthā vai bhūmau devā mānuṣaceṣṭitam /
kathaṃ jñāsyanti vidhivattanme śaṃsitumarhasi //
maheśvara uvāca /

tadahaṃ tepravakṣyāmi yathā tairvidyate priye /
prāṇināṃ tu śarīreṣu antarātmā vyavasthitaḥ //

ātmānaṃ paramaṃ devamiti viddhi śubhekṣaṇe /
ātmā manovyavasthānātsarvaṃ vetti śubhāśubham //

ātmaiva devāstadvidyuravyagramanasā kṛtam /
satāṃ manovyavasthānācchubhaṃ bhavati vai nṛṇām //

tasmāddevā'bhisampūjyā brāhmaṇānāṃ tathaiva ca /
yajñāśca dharmakāryāṇi gurupūjā ca śobhane //

śuddhagātrairvratayutaistanmayaistatparāyaṇaiḥ /
evaṃ vyavasthitairnityaṃ kartavyamiti niścayaḥ //

evaṃ kṛtvā śubhākāṅkṣī paratreha ca modate / anyathā mana āviśya kṛtaṃ na phalati priye /
ṛte'pi tu mano devi aśubhaṃ phalati dhruvam //