Mahabharata · Chapter 13.238

pitṛmedhaḥ kathaṃ deva tanme śaṃsitumarhasi /
sarveṣāṃ pitaraḥ pūjyāḥ sarvasampatpradāyinaḥ //
maheśva uvāca /

pitṛmedhaṃ pravakṣyāmi yathāvattanmanā śṛṇu /
deśakālau vidhānaṃ ca tatkriyāyāḥ śubhāśubham //

lokeṣu pitaraḥ pūjyā devatānāṃ ca devatāḥ /
śucayo nirmalāḥ puṇyā dakṣiṇāṃ diśamāśritāḥ //

yathā vṛṣṭiṃ pratīkṣante bhūmiṣṭhāḥ sarvajantavaḥ /
pitaraśca tathā loke pitṛmedhaṃ śubhekṣaṇe //

tasya deśāḥ kurukṣetraṃ gayā gaṅgā sarasvatī /
prabhāsaṃ puṣkaraṃ ceti teṣu dattaṃ mahāphalam //

tīrthāni saritaḥ puṇyā viviktāni vanāni ca /
nadīnāṃ pulinānīti deśāḥ śrāddhasya pūjitāḥ //

māghaproṣṭhapadau māsau śrāddhakarmaṇi pūjitau /
pakṣayoḥ kṛṣṇapakṣaśca pūrvapakṣātpraśasyate //

amāvāsyāṃ trayodaśyāṃ navamyāṃ pratipatsu ca /
tithiṣvetāsu tuṣyanti datteneha pitāmahāḥ //

pūrvāhṇe śuklapakṣe ca rātrau janmadineṣu vā /
yugmeṣvahassu ca śrāddhaṃ na ca kurvīta paṇḍitaḥ //

eṣa kālo mayā proktaḥ pitṛmedhasya pūjitaḥ /
yasmiṃśca brāhmṇaṃ pātraṃ paśyetkālaḥ sa ca smṛtaḥ //

apāṅkteyā dvijā varjyā grāhyāste paṅktipāvanāḥ /
bhojayedyadi pāpiṣṭhāñśrāddheṣu narakaṃ vrajet //

vṛttaśrutakulopetānsakalatrānguṇānvitān /
tadarhāñśrotriyānviddhi brāhmaṇānayujaḥ śubhe //

etānnimantrayodvidvānpūrvedyuḥ prātareva vā /
tatra śrāddhakriyāṃ paścādārabheta yathāvidhi //

trīṇi śrāddhe pavitrāṇi dauhitraḥ kutapastilāḥ /
trīṇi cātra praśaṃsanti śaucamakrodhamatvarā //

kutapaḥ khaṅgapātraṃ ca kuśā darbhāstilā madhu /
kālaśākaṃ gajacchāyā pavitraṃ śrāddhakarmasu //

tilānavakirettatra nānāvarṇānsamantataḥ /
aśuddhaṃ pitṛyajñaśca tilaiḥ śudhyati śobhane //

nīlakāṣāyavastraṃ ca bhinnavarṇaṃ navavraṇam /
hīnāṅgamaśuciṃ vā'pi varjayettatra dūrataḥ //

kukkuṭāṃśca varāhāṃśca nagnaṃ klībaṃ rajasvalām /
āyasaṃ trapusīsaṃ ca śrāddhakarmaṇi varjayet //

māṃsaiḥ prīṇanti pitaro mudgamāṣayavairiha /
śaśarauravamāṃsena ṣaṇmāsaṃ tṛptiriṣyate //

saṃvatsaraṃ ca gavyena haviṣā pāyasena ca /
vārdhrīṇasasya māṃsena tṛptirdvādaśavārṣikī //

ānantyāya bhaveddattaṃ khaṅgamāṃsaṃ pitṛkṣaye /
pāyasaṃ satilaṃ kṣaudraṃ khaṅgamāṃsena sammitam //

mahāśakalino masyāśchāgo vā sarvalohitaḥ /
kālaśākamitītyeva tadānantyāya kalpitam //

sāpūpaṃ sāmiṣaṃ snigdhamāhāramupakalpayet /
upakalpya tadāhāraṃ brāhmaṇānarcayettataḥ //

śmaśrukarmaśiraḥ snātānsamāropyāsanaṃ kramāt /
sugandhamālyābharaṇaiḥ snagbhiretānvibhūṣayet //

alaṅkṛtyopaviṣṭāṃstānpiṇḍāvāpaṃ nivedayet //

tataḥ prastīrya darbhāṇāṃ prastaraṃ dakṣiṇāmukham / tatsamīpe'gnimiddhvā ca svadhāṃ ca juhuyāttataḥ /
samīpe tvagnīṣomābhyāṃ pitṛbhyo juhuyāttadā //

tathā darbheṣu piṇḍāṃstrīnnirvapeddakṣiṇāmukhaḥ /
apasavyamapāṅguṣṭhaṃ nāmadheyapuraskṛtam //

etena vidhinā dattaṃ pitṝṇāmakṣayaṃ bhavet / tato viprānyathāśakti pūjayenniyataḥ śuciḥ /
sadakṣiṇaṃ sasambhāraṃ yathā tuṣyanti te dvijāḥ //

yatra tatkriyate tatra na jalpanna japenmithaḥ /
niyamya vācyaṃ dehaṃ ca śrāddhakarma samārabhet //

tato nirvapane vṛtte tānpiṇḍāṃstadanantaram /
brāhmaṇo'gnirajo gaurvā bhakṣayedapsu vā kṣipet //

patnīṃ vā madhyamaṃ piṇḍaṃ putrakāmo hi prāśayet /
ādhatta pitaro garbhaṃ kumāraṃ puṣkarasrajam //

tṛptānutthāpya tānviprānannaśeṣaṃ nivedayet /
taccheṣaṃ bahubhiḥ paścātsabhṛtyo bhakṣayennaraḥ //

eṣa proktaḥ samāsena pitṛyajñaḥ sanātanaḥ /
pitarastena tuṣyanti kartā ca phalamāpnuyāt //

ahanyahani vā kuryānmāsemāse'thavā punaḥ /
saṃvatsaraṃ dviḥ kuryācca caturvā'pi svaśaktitaḥ //

dīrghāyuśca bhavetsvasthaḥ pitṛmedhena vā punaḥ /
saputro bahubhṛtyaśca prabhūtadhanadhānyavān //

śrāddhadaḥ svargamāpnoti nirmalaṃ vividhātmakam /
apsarogaṇasanghuṣṭaṃ virajaskamanantaram //

śrāddhāni puṣṭikāmā vai ye prakurvanti paṇḍitāḥ /
teṣāṃ puṣṭiṃ prajāṃ caiva dāsyanti pitaraḥ sadā //

dhanyaṃ yaśasyamāyuṣyaṃ svargyaṃ śatruvināśanam /
kulasandhārakaṃ ceti śrāddhamāhurmanīṣiṇaḥ //
umovāca /

bhagavandevadeveśa mṛtāste bhuvi jantavaḥ /
nānājātiṣu jāyante śīghraṃ karmavaśātpunaḥ //

pitaraḥ svasti te tatra kathaṃ tiṣṭhanti devavat /
pitṝṇāṃ katamo deśaḥ piṇḍānaśnanti vai katham //

anne datte mṛtānāṃ tu kathamāpyāyanaṃ bhavet /
evaṃ mayā saṃśayitaṃ bhagavanvaktumarhasi //
nārada uvāca /

etadviruddhaṃ pṛcchantyāṃ rudrāṇyāṃ pariṣadbhṛśam /
babhūva sarvā muditā śrotuṃ hi paramaṃ hitam //
maheśvara uvāca /

sthāne saṃśayitaṃ devi śṛṇu kalyāṇi tatvataḥ /
guhyānāṃ paramaṃ guhyaṃ hitānāṃ paramaṃ hitam //

yathā devagaṇā devi tathā pitṛgaṇāḥ priye /
dakṣiṇasyāṃ diśi śubhe sarve pitṛgaṇāḥ sthitāḥ //

pretānuddiśya yā pūjā kriyate mānuṣairiha /
tena tuṣyanti pitaro na pretāḥ pitaraḥ smṛtāḥ //

uttarasyāṃ yathā devā ramante yajñakarmabhiḥ /
dakṣiṇasyāṃ tathā devi tuṣyanti vividhairmakhaiḥ //

dvividhaṃ kriyate karma havyakavyasamāśritam / tayorhavyakriyā devānkavyamāpyāyate pitṝn /

prasavyaṃ maṅgalairdravyairhavyakarma vidhīyate /
apasavyamamaṅgalyaiḥ kavyaṃ cāpi vidhīyate //

sadevāsuragandharvāḥ pitṝnabhyarcayanti ca /
āpyāyante ca te śrāddhaiḥ punarāpyāyayanti tān //

aniṣṭā ca pitṝnpūrvaṃ yaḥ kriyāṃ prakaroti cet /
rakṣāṃsi ca piśācāśca phalaṃ bhokṣyanti tasya tat //

havyakavyakriyāstasmātkartavyā bhuvi mānuṣaiḥ /
karmakṣetraṃ hi mānuṣyaṃ tadanyatra na vidyate //

kavyena santatirdṛṣṭā havye bhūtiḥ pṛthagvidhāḥ /
iti te kathitaṃ devi devaguhyaṃ sanātanam //