Mahabharata · Chapter 13.236

bhagavandevadeveśa kathaṃ deyaṃ tilānvitam /
tasya tasya phalaṃ brūhi dattasya ca kṛtasya ca //
maheśvara uvāca /

tilakalpavidhiṃ devi tanme śṛṇu samāhitā //

samṛddhairasamṛddhairvā tilā deyā viśeṣataḥ /
tilāḥ pavitrāḥ pāpaghnāḥ supuṇyā iti saṃsmṛtāḥ //

nyāyatastu tilāñśuddhānsaṃhṛtyātha svaśaktinaḥ / tilarāśiṃ punaḥ kuryātparvātābhaṃ surasnakam /
mahāntaṃ yadi vā stokaṃ nānādravyasamanvitam //

suvarṇarajatābhyāṃ ca maṇimuktāpravālakaiḥ / alaṅkṛtya yathāyogaṃ sapatākaṃ savedikam /
sabhūṣaṇaṃ savastraṃ ca śayanāsanasammitam //

prāyaśaḥ kaumudīmāse paurṇamāsyāṃ viśeṣataḥ /
bhojayitvā ca vidhivadbrāhmṇānarhato bahūn //

svayaṃ kṛtopavāsaśca vṛttaśaucasamanvitaḥ /
dadyātpradakṣiṇīkṛtya tilarāśiṃ sadakṣiṇam //

ekasyāpi bahūnāṃ vā dātavyaṃ bhūtimicchatā /
tasya dānaphalaṃ devi agniṣṭomena saṃyutam //

kevalaṃ vā tilaireva bhūmau kṛtvā gavākṛtim / savastrakaṃ saratnaṃ ca puṃsā godānakāṅkṣiṇā /
tadarhāya pradātavyaṃ tasya godānataḥ phalam //

śarāvāṃstilasampūrṇānsahiraṇyānsacampakān /
nṛpo'dadadbrāhmaṇāya su puṇyaphalabhāgbhavet //

evaṃ tilamayaṃ deyaṃ nareṇa hitamicchatā /
nānādānaphalaṃ bhūyaḥ śṛṇu devi samāhitā //

balamāyuṣyamārogyamannadānāllabhennaraḥ /
pānīyadastu saubhāgyaṃ rasajñānaṃ labhennaraḥ //

vastradānādvapuḥśobhāmalaṅkāraṃ labhennaraḥ /
dīpado buddhivaiśadyaṃ dyutiśobhāṃ labhennaraḥ //

rājapīḍāvimokṣaṃ tu chatrado labhate phalam / dāsīdāsapradānāttu bhavetkarmāntabhāṅnaraḥ /
dāsīdāsaṃ ca vividhaṃ labhetpretya guṇānvitam //

yānāni vāhanaṃ caiva tadarhāya dadannaraḥ / pādarogaparikleśānmuktaḥ śvasanavāhavān /
vicitra ramaṇīyaṃ ca labhate yānavāhanam //

pratiśrayapradānaṃ ca tadarhāya tadicchate /
varṣākāle tu rātrau vā labhetpakṣabalaṃ śubham //

setukūpataṭākānāṃ kartā tu labhate naraḥ /
dīrghāyuṣyaṃ ca saubhāgyaṃ tatā pretya gatiṃ śubhāṃ //

vṛkṣasaṃropako yastu chāyāpuṣpaphalapradaḥ /
pretyabhāve labhetpuṇyamabhigamyo bhavennaraḥ //

yastu saṅkramakṛlloke nadīṣu jalahāriṇām /
labhetpuṇyaphalaṃ pretya vyasanebhyo vimokṣaṇam //

mārgakṛtsatataṃ martyo bhavetsantānavānnaraḥ /
kāyadoṣavimuktastu tīrthakṛtsatataṃ bhavet //

auṣadhānāṃ pradānāttu satataṃ kṛpayā'nvitaḥ /
bhavedvyādhivihīnaśca dīrghāyuśca viśeṣataḥ //

anāthānpoṣayedyastu kṛpaṇāndhakapaṅgukān /
sa ca puṇyaphalaṃ pretya labhate kṛcchramokṣaṇam //

vedagoṣṭhāḥ śubhāḥ śālā bhikṣūṇāṃ ca pratiśrayam /
yaḥ kuryāllabhate nityaṃ naraḥ pretya phalaṃ śubham //

prāsādavāsaṃ vividhaṃ yakṣaśobhāṃ labhetpunaḥ /
vividhaṃ vividhākāraṃ bhakṣyabhojyaguṇānvitam //

ramyaṃ taṃ daivagovāṭaṃ yaḥ kuryāllabhate naraḥ /
pretya bhāve śubhāṃ jātiṃ vyādhimokṣaṃ tathaiva ca //

evaṃ nānāvidhaṃ dravyaṃ dānakartā labhetphalam //
umovāca /

kṛtaṃ dattaṃ yathā yāvattasya tallabhate phalam /
etanme devadeveśa tatra kautūhalaṃ mahat //
maheśvara uvāca /

pretyibhāve śṛṇu phalaṃ dattasya ca kṛtasya ca / dānaṃ ṣaṅguṇayuktaṃ tu tadarhāya yathāvidhiḥ /
yathāvibhavato dānaṃ dātavyamiti mānavaiḥ //

buddhimāyuṣyamārogyaṃ balaṃ bhāgyaṃ tathā'gamam /
rūpeṇa saptadhā bhūtvā mānuṣyaṃ phalati dhruvam //

idaṃ dattamidaṃ deyamityevaṃ phalakāṅkṣayā /
yaddattaṃ tattadeva syānna tu kiñcana labhyate //

dhruvaṃ devyattame dānaṃ madhyame tvadhamaṃ phalam //