Mahabharata · Chapter 13.232

vidhānaṃ sukṛtasyāpi bhūyaḥ śṛṇu śucismite /
procyate tattridhā devi sukṛtaṃ ca samāsataḥ //

yadauparamikaṃ caiva sukṛtaṃ nirupadravam /
tathaiva sopakaraṇaṃ tāvatā sukṛtaṃ viduḥ //

nivṛttiḥ pāpakarmabhyastadauparamikaṃ priye /
manovākkāyajā doṣāḥ śṛṇu me varjanācchubham //

traividhyadoṣoparame yastu doṣavyapekṣayā /
sa hi prāpnoti sakalaṃ sarvaduṣkṛtavarjanāt //

prathamaṃ varjayeddoṣānyugapatpṛthageva vā / tathā dharmamavāpnoti doṣatyāgo hi duṣkaraḥ /
doṣasākalyasantyāgānmunirbhavati mānavaḥ //

saukaryaṃ pasya dharmasya kāryārambhādṛte'pi ca /
ātmā ca labdhoparamo labhante sukṛtaṃ param //

aho nṛśaṃsāḥ pacyante mānuṣāḥ svalpabuddhayaḥ /
etādṛśaṃ na budhyante ātmādhīnaṃ na nirvyathāḥ //

duṣkṛtatyāgamātreṇa padamūrdhvaṃ hi labhyate //

pāpabhīrutvamātreṇa doṣāṇāṃ parivarjanāt / suśobhano bhaveddevi krajurdharmavyapekṣayā /
ityauparamikaṃ devi kathitaṃ sukṛtaṃ tava //

śrutvā ca vṛddhasaṃyogādindriyāṇāṃ ca nigrahāt /
santoṣācca dhṛteścaiva śakyate doṣavarjanam //

tadeva dharmamityāhurdoṣasaṃyamanaṃ priye / yamadharmeṇa dharmosti nānyaḥ śubhataraḥ priye /
yamadharmeṇa yatayaḥ prāpnuvantyuttamāṃ gatim //

īśvarāṇāṃ prabhavatāṃ daridrāṇāṃ ca vai nṛṇām /
saphalo doṣasantyāgo dānādapi śubhādapi //

tapo dānaṃ mahādevi doṣamalpaṃ hi nirbharet /
sukṛtaṃ yāmikaṃ coktaṃ vakṣye nirupasādhanam //

sukhābhisandhirlokānāṃ satyaṃ śaucamathārjavam /
vratopavāsaḥ prītiśca brahmacaryaṃ damaḥ śamaḥ //

evamādi śubhaṃ karma sukṛtaṃ niyamāśritam /
śṛṇu teṣāṃ viśeṣāṃśca kīrtayiṣyāmi bhāmini //

satyaṃ svargasya sopānaṃ pārāvārasya nauriva /
nāsti satyātparaṃ dānaṃ nāsti satyātparaṃ tapaḥ //

yathā śrutaṃ yathā dṛṣṭamātmanā yadyathā kṛtam /
tathā tasyāvikāreṇa vacanaṃ satyalakṣaṇam //

yacchalenābhisaṃyuktaṃ satyarūpaṃ mṛṣaiva tat /
satyameva pravaktavyaṃ pārāvaryaṃ vijānatā //

dīrghāyuśca bhavetsatyātkulasantānapālakaḥ /
lokasaṃsthitipālaśca bhavetsatyena mānavaḥ //
umovāca /

kathaṃ sandhārayanmartyo vrataṃ śubhamavāpnuyāt //
maheśvara uvāca /

pūrvamuktaṃ tu yatpāpaṃ manovākkāyakarmabhiḥ /
vratavattasya santyāgastapovratamiti smṛtam //

tyājyaṃ vā yadi vā joṣyamavrateni vṛthā caran /
tathā phalaṃ na labhate tasmāddharmaṃ vṛthā caret //

śuddhakāyo naro bhūtvā snātvā tīrtha yathāvidhi /
pañcabhūtāni candrārkau sandhye dharmayamau pitṝn //

ātmanaiva tathā'tmānaṃ nivedya vratavaccaret /
vratamāmaraṇādvā'pi kālacchedena vā haret //

śākādiṣu vrataṃ kuryāttathā puṣpaphalādiṣu /
brahmacaryavrataṃ kuryādupavāsavrataṃ tathā //

evamanyeṣu bahuṣu vrataṃ kāryaṃ hitaiṣiṇā / vratabhaṅgo yathā na syādrakṣitavyaṃ tathā budhaiḥ /
vratabhaṅge mahatpāpamiti viddhi śubhekṣaṇe //

auṣadhārthaṃ yadajñānādgurūṇāṃ vacanādapi /
anugrahārthaṃ bandhūnāṃ vratabhaṅgo na duṣyate //

vratāpavargakāle tu daivabrāhmaṇapūjanam /
nareṇa tu yathā viddhi kāryasiddhiṃ yathā'ptuyāt //
umovāca /

kathaṃ śaucavidhistatra tanme śaṃsitumarhasi //
maheśvara uvāca /

bāhmamābhyantaraṃ ceti dvividhaṃ śaucamiṣyate /
mānasaṃ sukṛtaṃ yattacchaucamābhyantaraṃ smṛtam //

sadā'hāraviśuddhiśca kāyaprakṣālanaṃ ca yat /
bāhyaśaucaṃ bhavedetattathaivācamanādinā //

mṛccaiva śuddhadeśasthā gośakṛnmūtrameva ca / dravyāṇi gandhayuktāni yāni puṣṭikarāṇi ca /
etaiḥ sammārjayetkāyamambhasā ca punaḥ punaḥ //

akṣobhyaṃ yatprakīrṇaṃ ca nityasrotaṃ ca yajjalam /
prāyaśastādṛśe majjedanyathā ca vivarjayet //

tristrirācamanaṃ śreṣṭhaṃ niṣphenairnirmalairjalaiḥ / tathā viṇmūtrayoḥ śuddhiradbhirbahumṛdā bhavet /
tathaiva jalasaṃśuddhiryatsaṃśuddhaṃ tu saṃspṛśet //

śakṛtā bhūmiśuddhiḥ syāllauhānāṃ bhasmanā smṛtam /
takṣaṇaṃ gharṣaṇaṃ caiva dāravāṇāṃ viśodhanam //

dahanaṃ mṛṇmayānāṃ ca martyānāṃ kṛcchradhāraṇam / śeṣāṇāṃ devi sarveṣāmātapena jalena ca /
brāhmaṇānāṃ ca vākyena sadā saṃśodhanaṃ bhavet //

adṛṣṭamadbhirnirṇiktaṃ yacca vācā praśasyate / evamāpadi saṃśuddhirevaṃ śaucaṃ vidhīyate /
umovāca /

āhāraśuddhistu kathaṃ devadeva maheśvara //
maheśvara uvāca /

amāṃsamadyamakledyamaparyuṣitameva ca /
atikaṭvamlalavaṇahanaṃ ca śubhagandhi ca //

krimikeśamalairhīnaṃ saṃvṛtaṃ śuddhadarśam /
evaṃvidhaṃ sadāhāryaṃ devabrāhmaṇasātkṛtam //

śrutamityeva tajjñeyamanyathā manyase'śubham /
grāmyādāraṇyakaiḥ siddhaṃ śreṣṭhamityavadhāraya //

atimātragṛhītāttu alpadattaṃ bhavecchuci / yajñaśeṣaṃ haviḥśeṣaṃ pitṛśeṣaṃ ca nirmalam /
iti te kathitaṃ devi bhūyaḥ kiṃ śrotumicchasi //