Mahabharata · Chapter 13.22

vinatā tu tathetyuktvā kṛtasaṃśayanā paṇe /
kadrūrapi tathetyuktvā putrānidamuvāca ha //

mayā kṛtaḥ paṇaḥ putrā mitho vinatayā saha /
uccairaśravasi gāndharve tacchṛṇudhvaṃ bhujaṅgamāḥ //

abravaṃ naikavarṇaṃ taṃ saikavarṇamathābravīt /
jitā dāsī bhavetputrāḥ sā vā'haṃ vā na saṃśayaḥ //

ekavarṇaśca vājī sa candrakokanadaprabhaḥ /
sā'haṃ dāsī bhaviṣyāmi jitā putrā na saṃśayaḥ //

te yūyamaśvapravaramāviśadhvamatandritāḥ /
sarvaśvetaṃ vāladhiṣu vālā bhūtvāñjanaprabhāḥ //
sarpā ūcuḥ /

nikṛtyā na jayaḥ śreyānmātaḥ satyā giraḥ śṛṇu /
āyatyāṃ ca tadātve ca na ca dharmo'tra vidyate //

sā tvaṃ dharmādapetaṃ vai kulasyaivāhitaṃ tava /
nikṛtyā vijayaṃ mātarmā sma kārṣīḥ kathañcanā //

yadyadharmeṇa vijayaṃ vayaṃ kāṅkṣāmahe kvacit /
tvayā nāma nivāryāḥ sma mā kurudhvamiti dhruvam //

sā tvamasmānapi sato vipāpānṛjubuddhinaḥ /
kalmaṣeṇābhisaṃyoktuṃ kāṅkṣase lobhamohitā //

te vayaṃ tvāṃ parityajya draviṣyāma diśo daśa /
yatra vākyaṃ na te mātaḥ punaḥ śroṣyāma īdṛśam //

gurorapyavaliptasya kāryākāryamajānataḥ /
utpathaṃ pratipannasya parityāgo vidhīyate //
kadrūruvāca /

śṛṇomi vividhā vāco hetumatyaḥ samīritāḥ /
vakramārganivṛttyarthaṃ tadahaṃ vo na rocaye //

na ca tatpaṇitaṃ mandāḥ śakyaṃ jetumato'nvathā /
jite nikṛtyā śrutvaitatkṣemaṃ kuruta putrakāḥ //

śvo'haṃ prabhātasamaye jitā dharmeṇa putrakāḥ /
śailūṣiṇī bhaviṣyāmi vinatāyā na saṃśayaḥ //

iha cāmutra cārthāya putrānicchanti mātaraḥ /
seyamīhā vipannā me yuṣmānāsādya saṅgatām //

iha vā tārayetputraḥ pretya vā tārayetpitṝn /
mātra citraṃ bhavekiñcitpunātīti ca putrakaḥ //

te yūyaṃ tāraṇārthāya mama putrā manojavāḥ /
āviśadhvaṃ hayaśreṣṭhaṃ vālā bhūtvā'ñjanaprabhāḥ //

jānāmyadharmaṃ sakalaṃ vijitā vinatā bhavet /
nikṛtyā dāsabhāvastu yuṣmānapyavapīḍayet //

nikṛtyā vijayo veti dāsatvaṃ vā parābhave /
ubhayaṃ niścayaṃ kṛtvā jayo vai dhārmiko varaḥ //

yadyapyadharmo vijayo yuṣmāneva spṛśetpunaḥ /
gurorvacanamāsthāya dharmo vā sambhaviṣyati //