Mahabharata · Chapter 13.225

bhagavanbhaganetraghna mānuṣāṇāṃ viceṣṭitam /
sarvamātmakṛtaṃ ceti śrutaṃ me bhagavanmatam //

loke grahakṛtaṃ sarvaṃ matvā karma śubhāśubham / tadeva grahanakṣatraṃ prāyaśaḥ paryupāsate /
eṣa me saṃśayo deva taṃ me tvaṃ chettumarhasi //
maheśvara uvāca /

sthāne saṃśayitaṃ devi śṛṇu tatvaviniścayam //

nakṣatrāṇi grahāścaiva śubhāśubhanivedakāḥ /
mānavānāṃ mahābhāge na tu karmakarāḥ svayam //

prajānāṃ tu hitārthāya śubhāśubhavidhiṃ prati /
anāgatamatikrāntaṃ jyotiścakreṇa bodhyate //

kintu tatra śubhaṃ karma sugrahaistu nivedyate /
duṣkṛtasyāśubhaireva samāvāyo bhavediti //

tasmāttu grahavaiṣamye viṣamaṃ kurute janaḥ /
grahasāmye śubhaṃ kuryājjñātvā'tmānaṃ tathā kṛtam //

kevalaṃ grahanakṣatraṃ na karoti śubhāśubham /
sarvamātmakṛtaṃ karma lokavādo grahā iti //

pṛthaggrahāḥ pṛthakkartā kartā svaṃ bhuñjate phalam /
iti te kathitaṃ sarvaṃ viśaṅkāṃ jahi śobhane //
umovāca /

bhagavanvividhaṃ karma kṛtvā jantuḥ śubhāśubham / kiṃ tayoḥ pūrvakataraṃ bhuṅkte janmāntare punaḥ /
eṣa me saṃśayo deva taṃ me tvaṃ chettumarhasi //
maheśvara uvāca /

sthāne saṃśayitaṃ devi tatte vakṣyāmi tatvataḥ // aśubhaṃ pūrvamityāhurapare śubhamityapi /

mithyā tadubhayaṃ proktaṃ kevalaṃ tadbravīmi te //

mānuṣe tu pade karma yugapadbhujyate sadā /
yathākṛtaṃ yathāyogamubhayaṃ bhujyate kramāt //

bhuñjānāścāpi dṛśyante kramaśo bhuvi mānavāḥ /
ṛddhiṃ hāniṃ sukhaṃ duḥkhaṃ tatsarvamubhayaṃ bhayam //

duḥkhānyanubhavantyāḍhyā daridrāśca sukhāni ca /
yaugapadyāddhi bhuñjānā dṛśyante lokasākṣikam //

narake svargaloke ca na tathā saṃsthitiḥ priye /
nityaṃ duḥkhaṃ hi narake svarge nityaṃ sukhaṃ tathā //

śubhāśubhānāmādhikyaṃ karmaṇāṃ tatra sevyate /
nirantaraṃ sukhaṃ duḥkhaṃ svarge ca narake bhavet //

tatrāpi sumahadbhuktvā pūrvamalpaṃ punaḥ śubhe /
etatte sarvamākhyātaṃ kiṃ bhūyaḥ śrotumicchasi //
umovāca /

bhagavanprāṇino loke mriyante kena hetunā /
jātājātā na tiṣṭhanti tanme śaṃsitumarhasi //
maheśvara uvāca /

tadahaṃ te pravakṣyāmi śṛṇu satyaṃ samāhitā /
ātmā karmakṣayāddehaṃ yathā muñcati tacchṛṇu //

śarīrātmasamāhāro janturityabhidhīyate /
tatrātmānaṃ nityamāhuranityaṃ kṣetrimucyate //

evaṃ kālena saṅkrāntaṃ śarīraṃ jarjharīkṛtam /
akarmayogyaṃ saṃśīrṇaṃ tyaktvā dehī tato vrajet //

nityasyānityasantyāgālloke tanmaraṇaṃ viduḥ /
kālaṃ nātikrameranhi sadevāsuramānavāḥ //

yathā'kāśe na tiṣṭheta dravyaṃ kiñcidacetanam /
tathā dhāvati kālo'yaṃ kṣaṇaṃ kiñcinna tiṣṭhati //

sa punarjāyate'nyatra śarīraṃ navamāviśan /
evaṃlokagatirnityamādiprabhṛti vartate //
umovāca /

bhagavanprāṇino bālā dṛśyante maraṇaṃ gatāḥ /
ativṛddhāśca jīvanto dṛśyante cirajīvinaḥ //

kevalaṃ kālamaraṇaṃ na pramāṇaṃ maheśvara /
tasmānme saṃśaya brūhi prāṇināṃ jīvakāraṇam //
maheśvara uvāca /

śṛṇu tatkāraṇaṃ devi nirṇayastveka eva saḥ /
jīrṇatvamātraṃ kurute kālo dehaṃ na pātayet //

jīrṇe karmaṇi sanghātaḥ svayameva viśīryate /
pūrvakarmapramāṇena jīvitaṃ mṛtyureva vā //

yāvatpūrvakṛtaṃ karma tāvajjīvati mānavaḥ /
tatra karmavaśādbālā mriyante kālasankṣayāt //

ciraṃ jīvanti vṛddhāśca tathā karmapramāṇataḥ /
iti te kathitaṃ devi nirviśaṅkā bhava priye //
umovāca /

bhagavankena vṛttena bhavanti cirajīvinaḥ /
alpāyuṣo narāḥ kena tanme śaṃsitumarhasi //
maheśvara uvāca /

śṛṇu tatsarvamakhilaṃ guhyaṃ pathyataraṃ nṛṇām /
yena vṛttena sampannā bhavanti cirajīvinaḥ //

ahiṃsā satyavacanamakrodhaḥ kṣīntirārjavam /
gurūṇāṃ nityaśuśrūṣā vṛddhānāmapi pūjanam //

śaucādakāryasantyāgātsadā pathyasya bhojanam /
evamādiguṇaṃ vṛttaṃ narāṇāṃ dīrghajīvinām //

tapasā brahmacaryeṇa rasāyananiṣevaṇāt / udagrasattvā balino bhavanti cirajīvinaḥ /
svarge vā mānuṣe vā'pi ciraṃ tiṣṭhanti dhārmikāḥ

apare pāpakarmāṇaḥ prāyaśo'nṛtavādinaḥ /
hiṃsāpriyā gurudviṣṭā niṣkriyāḥ śaucavarjitāḥ //

nāstikā ghorakarmāṇaḥ satataṃ māṃsapānapāḥ /
pāpācārā gurudviṣṭāḥ kopanāḥ kalahapriyāḥ //

evamevāśubhācārāstiṣṭhanti narake ciram / tiryagyonau tathā'tyantamalpāstiṣṭhanti mānavāḥ /
tasmādalpāyuṣo martyāstādṛśāḥ sambhavanti te //

agamyadeśagamanādapathyānāṃ ca bhojanāt /
āyuḥkṣayo bhavennṝṇāmāyuḥkṣayakarā hi te //

bhavantyalpāyuṣastaistairanyathā cirajīvinaḥ /
etatte kathitaṃ sarvaṃ bhūyaḥ śrotuṃ kimicchasi //