Mahabharata · Chapter 13.224

bhagavandevadeveśa lokapālanamaskṛta /
prasādātte mahādeva śrutā me karmaṇāṃ gatiḥ //

saṅgṛhītaṃ ca tatsarvaṃ tatvato'mṛtasannibham /
karmaṇā grathitaṃ sarvamiti veda śubhāśubham //

govatsavacca jananīṃ nimnaṃ salilavattathā /
kartāraṃ svakṛtaṃ karma nityaṃ tadanudhāvati //

kṛtasya karmaṇaśceha nāśo nāstīti niścayaḥ /
aśubhasya śubhasyāpi tadapyupagataṃ mayā //

bhūya eva mahādeva varada prītivardhana /
karmaṇāṃ gatimāśritya saṃśayānmoktumarhasi //
maheśvara uvāca /

yatte vivakṣitaṃ devi guhyamapyasitekṣaṇe /
tatsarvaṃ nirviśankā tvaṃ pṛccha māṃ śubhalakṣaṇe //
umovāca /

evaṃ vyavasthite loke karmamāṃ vṛṣabhadhvaja /
kṛtvā tatpuruṣaḥ karma śubhaṃ vā yadi vetarat //

karmaṇaḥ sukṛtasyeha kadā bhuṅkte phalaṃ punaḥ /
iha vā pretya vā deva tanme śaṃsitumarhasi //
maheśvara uvāca /

sthāne saṃśayitaṃ devi taddhi guhyatamaṃ nṛṣu /
tvatpriyārthaṃ pravakṣyāmi devi guhyaṃ śubhānane //

pūrvadehakṛtaṃ karma bhuñjate tadiha prajāḥ / ihaiva yatkṛtaṃ puṃsāṃ tatparatra phaliṣyatai /
eṣā vyavasthitirdevi mānuṣeṣveva dṛśyate //

devānāmasurāṇāṃ ca amaratvāttapobalāt / ekenaiva śarīreṇa bhujyate karmaṇāṃ phalam /
mānuṣairna tathā devi antaraṃ tvetadiṣyate //