Mahabharata · Chapter 13.210

bhagavandevadeveśa teṣāṃ karmaphalaṃ prabho /
śrotumicchāmyahaṃ deva prasādātte varaprada //
maheśvara uvāca /

vānaprasthagataṃ sarvaṃ phalapākaṃ śṛṇu priye //

agniyogaṃ vrajangrīṣme tato dvādaśavārṣikam /
rudraloke'bhijāyeta vidhidṛṣṭena karmaṇā //

upavāsavrataṃ kurvanvarṣākāle dṛḍhavrataḥ /
somaloke'bhijāyeta naro dvādaśavārṣikam //

kāṣṭhavanmaunamāsthāya naro dvādaśavārṣikam /
marutāṃ lokamāsthāya tatra bhogaiśca yujyate //

kuśaśarkarasaṃyukte sthaṇḍile saṃviśanmuniḥ /
yakṣaloke'bhijāyeta sahasrāṇi caturdaśa //

varṣāṇāṃ bhogasaṃyukto naro dvādaśavārṣikam / vīrāsanagato yastu kaṇṭakāphalakāśritaḥ /
gandharveṣvabhijāyeta naro dvādaśavārṣikam //

vīrasthāyī cordhvabāhurnaro dvādaśavārṣikam /
devaloke'bhijāyeta divyabhogasamanvitaḥ //

pādāṅguṣṭhena yastiṣṭhedūrdhvabāhurjitendriyaḥ / indraloke'bhijāyeta sahasrāṇi caturdaśa /

āhāraniyamaṃ kṛtvā munirdvādaśavārṣikam /
nāgaloke'bhijāyeta saṃvatsaragaṇānbahūn //

evaṃ dṛḍhavratā devi vānaprasthāśca karmabhiḥ /
sthāneṣu tatra tiṣṭhanti tattadbhogasamanvitāḥ //

tebhyo bhraṣṭāḥ punardevi jāyante nṛṣu bhoginaḥ /
varṇottamakuleṣveva dhanadhānyasamanvitāḥ //

etatte kathitaṃ devi kiṃ bhūyaḥ śrotumicchasi //
umovāca /

eṣāṃ yathā varāṇāṃ tu dharmamicchāmi mānada /
kṛpayā parayā'viṣṭastanme brūhi maheśvara //
maheśvara uvāca /

dharmaṃ yathā varāṇāṃ tvaṃ śṛṇu bhāmini tatparā //

vratopavāsaśuddhāṅgāstīrthasnānaparāyaṇāḥ /
dhṛtimantaḥka kṣamāyuktāḥ satyavrataparāyaṇāḥ //

pakṣamāsopavāsaiśca karśitā dharmadarśinaḥ /
varṣaiḥ śītātapaiścaiva kurvantaḥ paramaṃ tapaḥ //

kālayogena gacchanti śakralokaṃ śucismite /
tatra te bhogasaṃyuktā divyagandhasamanvitāḥ //

divyabhūṣaṇasaṃyuktā vimānavarasaṃyutāḥ / vicaranti yathākāmaṃ divyastrīgaṇasaṃyutāḥ /
etatte kathitaṃ devi kiṃ bhūyaḥ śrotumicchasi //
umovāca /

teṣāṃ cakracarāṇāṃ ca dharmamicchāmi vai prabho //
maheśvara uvāca /

hanta te kathayiṣyāmi śṛṇu śākaṭikaṃ śubhe //

saṃvahanto dhuraṃ dānaiḥ śakaṭānāṃ tu sarvadā /
prārthayante yathākālaṃ śakaṭairbhaikṣacaryayā //

taporjanaparā dhīrāstapasā kṣīṇakalmaṣāḥ /
paryaṭanto diśaḥ sarvāḥ kāmakrodhavivarjitāḥ //

tenaiva kālayogena tridivaṃ yānti śobhane /
tatra pramuditā bhogairvicaranti yathāsukham //

etatte kathitaṃ devi kiṃ bhūyaḥ śrotumicchasi //
umovāca /

vaikhānasānāṃ vai dharmaṃ śrotumicchāmyahaṃ prabho //
maheśvara uvāca /

te vai vaikhānasā nāma vānaprasthāḥ śubhekṣaṇe / tīvreṇa tapasā yuktā dīptimantaḥ svatejasā /
satyavrataparā dhīrāsteṣāṃ niṣkalmaṣaṃ tapaḥ //

aśmakuṭṭāstathā'nye ca dantolūkhalinastathā /
śīrṇaparṇāśinaścānye uñchavṛttāstathā pare //

kapotavṛttayaścānye kāpotīṃ vṛttimāśritāḥ /
paśupracāraniratāḥ phenapāśca tathā pare //

mṛgavanmṛgacaryāyāṃ sañcaranti tathā pare /
abbhakṣā vāyubhakṣāśca nirāhārāstathaiva ca //

keciccaranti sadviṣṇoḥ pādapūjanamuttamam / sañcaranti tapo ghoraṃ vyādhimṛtyuvivarjitāḥ /
svavaśādeva te mṛtyuṃ bhīṣayanti ca nityaśaḥ //

indraloke tathā teṣāṃ nirmitā bhogasañcayāḥ /
amaraiḥ samatāṃ yānti devavadbhogasaṃyutāḥ //

varāpsarobhiḥ saṃyuktāścirakālamanindite /
etatte kathitaṃ devi bhūyaḥ śrotuṃ kimicchasi //
umovāca /

bhagavañśrotumicchāmi vālakhilyāṃstapodhanān //
mahesvara uvāca /

dharmacaryāṃ tathā devi vālakhilyagatāṃ śṛṇu //

mṛganirmokavasanā nirdvandvāste tapodhanāḥ /
aṅguṣṭhamātrāḥ suśroṇi teṣvevāṅgeṣu saṃśritāḥ //

udyantaṃ satataṃ sūryaṃ stuvanto vividhaiḥ stavaiḥ / bhāskarasyeva kiraṇaiḥ sahasā yānti nityadā /
dyotayanto diśaḥ sarvā dharmajñāḥ satyavādinaḥ //

teṣveva nirmalaṃ satyaṃ lokārthaṃ tu pratiṣṭhitam /
loko'yaṃ dhāryate devi teṣāmeva tapobalāt //

mahātmanāṃ tu tapasā satyena ca śucismite /
kṣamayā ca mahābhāge bhūtānāṃ saṃsthitiṃ viduḥ //

prajārthamapi lokārthaṃ mahadbhiḥ kriyate tapaḥ / tapasā prāpyate sarvaṃ tapasā prāpyate phalam /
duṣprāpamapi yalloke tapasā prāpyate hi tat //

pañcabhūtārthatatve ca lokasṛṣṭivirdhanam /
etatsarvaṃ samāsena tapoyogādvinirmitam //

tasmādayaṃ tvṛṣigaṇastapastapa iti priye /
dharmānveṣī tapaḥ kartuṃ yatate satataṃ priye //

amaratvaṃ śivatvaṃ ca tapasā prāpayetsadā / etatte kathitaṃ sarvaṃ śṛṇvantyāste śrutaṃ priye /
priyārthamṛṣisaṅghasya prajānāṃ hitakāmyayā //
nārada uvāca /

evaṃ bruvantaṃ deveśamṛṣayaścāpi tuṣṭuvuḥ /
bhūyaḥ parataraṃ yattu tadāprabhṛti cakrire //