Mahabharata · Chapter 13.207

bhagavansarvabhūteśa śūlapāṇe vṛṣadhvaja /
āvāseṣu vicitreṣu ramyeṣu ca śubheśu ca //

satsu cānyeṣu bhūteṣu śmaśāne ramase katham /
keśāsthikalile bhīme kapālaśatasaṅkule //

sṛgālagṛdhrampūrṇe śavadhūmasamākule /
citāgniviṣame ghore gahane ca bhayānake //

evaṃ kalevarakṣetre durdarśe ramase katham /
eṣa me saṃśayo deva tanme śaṃsitumarhasi //
mahādeva uvāca /

hanta te kathayiṣyāmi śṛṇu devi samāhitā /
āvāsārthaṃ purā devi śuddhānveṣī śucismite //

nādhyagacchaṃ ciraṃ kālaṃ deśaṃ śucitamaṃ śubhe /
eṣa me'bhiniveśo'bhūttasminkāle prajāpatiḥ //

ākulaḥ sumahāghoraḥ prādurāsītsamantataḥ /
sambhūtā bhūtasṛṣṭiśca ghorā lokabhayāvahā //

nānāvarṇā virūpāśca tīkṣṇadaṃṣṭrāḥ prahāriṇaḥ / piśācarakṣovadanāḥ prāṇināṃ prāṇahāriṇaḥ /
itaścaranti nighnantaḥ prāṇino bhṛśameva ca //

evaṃ loke prāṇihīne kṣayaṃ yāte pitāmahaḥ /
cintayaṃstatpratīkāraṃ māṃ ca śaktaṃ hi nigrahe //

evaṃ jñātvā tato brahmā tasminkarmaṇyojayat /
tacca prāṇihitārthaṃ tu mayā'pyanumataṃ priye //

tasmātsaṃrakṣitā devi bhūtebhyaḥ prāṇino bhayāt / asmācchmaśānānmedhyaṃ tu nāsti kiñcidanindite /
niḥsampātānmanuṣyāṇāṃ tasmācchucitamaṃ smṛtaṃ //

bhūtasṛṣṭiṃ ca tāṃ cāhaṃ śmaśāne sannyaveśayam /
tatrasthaḥ sarvabhūtānāṃ vinihanmi priye bhayam //

na ca bhūtagaṇenāhaṃ vinā vasitumutsahe /
tasmānme sannivāsāya śmaśāne rocate manaḥ //

medhyakāmairdvijainityaṃ medhyamityabhidhīyate /
ācaradbhirvrataṃ nityaṃ mokṣakāmaiśca sevyate //

sthānaṃ me tatra vihitaṃ vīrasthānamiti priye /
kapālaśatasampūrṇamabhirūpaṃ bhayānakam //

madhyāhne sandhyayostatra nakṣatre rudradevate /
āyuṣkāmairaśuddhairvā na gantavyamiti sthitiḥ //

madanyena na śakyaṃ hi nihantuṃ bhūtajaṃ bhayam /
tatrastho'haṃ prajāḥ sarvāḥ pālayāmi dinedine //

manniyogādbhūtasaṅghā na ca ghnantīha kañcana / tāṃstu lokahitārtāya śmaśāne ramayānmaham /
etatte sarvamākhyātaṃ kiṃ bhūyaḥ śrotumicchasi //
umovāca /

bhagavandevadeveśa trinetra vṛṣabhadhvaja /
piṅgalaṃ vikṛtaṃ bhāti rūpaṃ te tu bhayānakam //

bhasmadigdhaṃ virūpākṣaṃ tīkṣṇadaṃṣṭraṃ jaṭākulam /
vyāghrodaratvaksaṃvītaṃ kapilaśmaśrusantatam //

raudraṃ bhayānakaṃ ghoraṃ śūlapaṭṭasasaṃyutam /
kimarthaṃ tvīdṛśaṃ rūpaṃ tanme śaṃsitumarhasi //
maheśvara uvāca /

tadahaṃ kathayiṣyāmi śṛṇu tattvaṃ samāhitā /
dvividho laukiko bhāvaḥ śītamuṣṇamiti priye //

tayorhi grasitaṃ sarvaṃ saumyāgneyamidaṃ jagat //

saumyatvaṃ satataṃ viṣṇau mayyāgneyaṃ pratiṣṭhitam /
anena vapuṣā nityaṃ sarvalokānbibharmyaham //

raudrākṛtiṃ virūpākṣaṃ śūlapaṭṭasasaṃyutam /
āgneyamiti me rūpaṃ devi lokahite ratam //

yadyahaṃ viparītaḥ syāmetattyaktvā śubhānane /
tadaiva sarvalokānāṃ viparītaṃ pravartate //

tasmānmayedaṃ dhriyate rūpaṃ lokahitaiṣiṇā /
iti te kathitaṃ devi kiṃ bhūyaḥ śrotumicchasi //
umovāca /

bhagavandevadeveśa śūlapāṇe vṛṣadhvaja / kimarthaṃ candrarekhā te śirobhāge virocate /
śrotumicchāmyahaṃ deva tanme śaṃsitumarhasi //
maheśvara uvāca /

tadahaṃ te pravakṣyāmi śṛṇu kalyāṇi kāraṇam / purā'haṃ kāraṇāddevi kopayuktaḥ śucismite /
dakṣayajñavadhāryāya bhūtasaṅghaiḥ samāvṛtaḥ //

tasminkratuvare ghore yajñabhāganimittataḥ /
devā vibhraṃśitāste vai yeṣāṃ bhāgaḥ kratau kṛtaḥ //

somastatra mayā devi kupitena bhṛśārditaḥ /
paśyaṃścānaparādhī sanpādaṅguṣṭhena tāḍitaḥ //

tathāpi vikṛtenāhaṃ sāmapūrvaṃ prasāditaḥ /
tanme cintayataścāsītpaścāttāpaḥ purā priye //

tadāprabhṛti somaṃ vai śirasā dhārayāmyam / evaṃ me pāpahānistu bhavediti matirmama /
tadāprabhṛti vai somo mūrdhni sandṛśyate sadā //
nārada uvāca /

evaṃ bruvati deveśe vismitāḥ paramarṣayaḥ /
vāgbhiḥ sāñjalimālābhirabhituṣṭuvurīśvaram //
ṛṣaya ūcuḥ /

namaḥ śaṅkara sarveśa namaḥ sarvajagadbhuro /
namo devādidevāya namaḥ śaśikalādhara //

namo ghoratarāddhora namo rudrāya śaṅkara /
namaḥ śāntatarācchānta namaścandrasya pālaka //

namaḥ somāya devāya namastubhyaṃ caturmukha /
namo bhūtapate śambho jahnukanyāmbuśekhara //

namastriśūlahastāya pannagābharaṇāya ca /
namostu viṣamākṣāya dakṣayajñapradāhaka //

namostu bahunetrāya lokarakṣaṇatatpara / aho devasya mahātmyamaho devasya vai kṛpā /
evaṃ dharmaparatvaṃ ca devadevasya cārhati //

evaṃ bruvatsu muniṣu vaco devyabravīddharam /
samprītyarthaṃ munīnāṃ sā kṣaṇajñā paramaṃ hitam //
umovāca /

bhagavandevadeveśa sarvalokanamaskṛta /
asyaiva ṛṣisaṅghasya mama ca priyakāmyayā //

varṇāśramakṛtaṃ dharmaṃ vaktumarhasyaśeṣataḥ /
na tṛptirasti deveśa śravaṇīyaṃ hi te vacaḥ //

sadharmacāriṇī ceyaṃ bhaktā ceyamiti prabho / vaktumarhasi deveśa lokānāṃ hitakāmyayā /
yāthātathyena tatsarvaṃ vaktumarhasi śankara //