Mahabharata · Chapter 13.204
bhavatāṃ darśanādeva prītirabhyadhikā mama /
bhavantastu tapaḥsiddhā bhavanto divyadarśanāḥ //
sarvatra gatimantaśca jñānavijñānabhāvitāḥ /
gatyāgatijñā lokānāṃ sarve nirdūtakalmaṣāḥ //
tasmādbhavadbhiryatkiñcidṛṣṭaṃ vā'pyathavā śrutam /
āścaryabhūtaṃ lokeṣu tadbhavanto bruvantu me //
yuṣmābhiḥ kathitaṃ yatsyāttapasā bhāvitātmabhiḥ tasyādamṛtasankāśaṃ vāṅmadhuśravaṇe spṛhā //
rāgadveṣaviyuktānāṃ satataṃ satyavādinām /
śraddheyaṃ śravaṇīyaṃ ca vacanaṃ hi satāṃ bhavet //
tatsaṃyogaṃ hitaṃ me'stu na vṛthā kartumarhatha /
bhavatāṃ darśanaṃ tasmātsaphalaṃ tu bhavenmama //
tadahaṃ sajjanamukhānniḥsṛtaṃ janasaṃsadi /
kathayiṣyāmyahaṃ buddhyā buddhidīpakaraṃ nṛṇām //
tadanye vardhayiṣyanti pūjayiṣyanti cāpare /
vātsalyavigatāścānye praśaṃsanti purātanāḥ //
evaṃ bruvati govinde śravaṇārthaṃ maharṣayaḥ /
vāgbhiḥ sāñjalimālābhiridamūcurjanārdanam //
ayuktamasmānevaṃ tvaṃ vācā varada bhāṣitum /
tvacchāsanamukhāḥ sarve tvadadhīnapariśramāḥ //
evaṃ pūjayituṃ cāsmānna caivārhasi keśava / tvattastvanyaṃ na paśyāmo yalloke te na vidyate /
divi vā bhuvi vā kiñcittatsarvaṃ hi tvayā tatam //
na vidmahe vayaṃ deva kathyamānaṃ tavāntike /
evamukto hṛṣīkeśaḥ sasmitaṃ cedamabravīt //
ahaṃ mānuṣayonisthaḥ sāmprataṃ munipuṅgavāḥ / tasmānmānuṣavadvīryaṃ mama jānīta suvratāḥ /
bhavadbhiḥ kathyamānaṃ ca apūrvamiva tadbhavet //
bhīṣma uvāca /
evaṃ sañcoditāḥ sarve keśavena mahātmanā /
ṛṣayaścānuvartante vāsudevasya śāsanam //
tatastvṛṣigaṇāḥ sarve nāradaṃ devadarśanam /
amanyanta budhā buddhyā samarthaṃ tannibodhane //
ṛṣirugratapāścāyaṃ keśavasya priyo'dhikam /
purāṇajñaśca vāgmī ca kāraṇaistaṃ ca menire //
sarve tadarhaṇaṃ kṛtvā nāradaṃ vākyamabruvan //
bhavatā tīrthayātrārthaṃ caratā himavadgirau /
dṛṣṭaṃ vai yattadāścaryaṃ śrotṝṇāṃ paramaṃ priyam //
atastvamaviśeṣeṇa hitārthaṃ sarvamāditaḥ /
priyārthaṃ keśavasyāsya sa bhavānvaktumarhati //
tadā saṃyojitaḥ sarvairṛṣibhirnāradastadā / praṇamya śirasā viṣṇuṃ sarvalokahite ratam /
samudvīkṣya hṛṣīkeśaṃ vaktumevopacakrame //
tato nārāyaṇasuhṛnnārado vadatāṃvaraḥ /
śaṅkarasyomayā sārdhaṃ saṃvādamanubhāṣata //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0