Mahabharata · Chapter 13.203

ayaṃ nārāyaṇaḥ śrīmānputrārthe vratakāṅkṣayā /
dīkṣito'bhūnmahābāhuḥ purā dvādaśavārṣikam //

dīkṣitaṃ keśavaṃ draṣṭumabhijagmurmaharṣayaḥ /
sevitvā ca mahātmānaḥ prīyamāṇaṃ janārdanam //

nāradaḥ parvataścaiva kṛṣṇadvaipāyanastathā / devalaḥ kāśyapaścaiva hastikāśyapa eva ca /
jamadagniśca rājendra dhaumyo vālmīkireva ca //

apare'pi tapaḥsiddhāḥ satyavrataparāyaṇāḥ /
śiṣyairanugatāḥ sarve brahmavidbhirakalmaṣaiḥ //

keśavastānabhigatānprītyā samparigṛhya ca / teṣāmatithisatkāraṃ pūjanārthaṃ kulocitam /
devakītanayo hṛṣṭo devatulyamakalpayat //

upaviṣṭeṣu sarveṣu viṣṭareṣu tadā'nagha /
viśvasteṣvnabhituṣṭeṣu keśavārcanayā punaḥ //

parasparaṃ kathā divyāḥ prāvartanta manoramāḥ /
viṣṇornārāyaṇasyaiva prasādātkathayāmi tāḥ //

tasyaiva vratacaryāyāṃ munibhirvismitaṃ purā /
yatra govṛṣabhāṅkasya prabhāvo'bhūnmahātmanaḥ //

yatra devī mahādevamapṛcchatsaṃśayānpurā /
kathayāmāsa sarvāṃstāndevyāḥ priyacikīrṣayā //

umāpatyośca saṃvādaṃ śṛṇu tāta manoramam /
varṇāśramāṇāṃ dharmaśca tatra tāta samāhitaḥ //

ṛṣidharmaśca nikhilo rājadharmasca puṣkalaḥ /
gṛhasthadharmaśca śubhaḥ karmapākaphalāni ca //

devaguhyaṃ ca vividhaṃ dānadharmavidhistathā /
vidhānamatra proktaṃ yadyamasya niyamasya ca //

yamalokavidhānaṃ ca svargalokagatistathā /
prāṇamokṣavidhiścaiva tīrthacaryā ca puṣkalā //

mokṣadharmavidhānaṃ ca sāṅkhyayogasamanvitam /
strīdharmaśca svayaṃ devyā devadevāya bhāṣitaḥ //

evamādi śubhaṃ sarvaṃ tatra tāta samāhitam /
rudrāṇyāḥ saṃśayapraśno yatra tāta pravartate //

dhanyaṃ yaśasyamāyuṣyaṃ dharmyaṃ ca paramaṃ hitam /
puṣṭiyogamimaṃ divyaṃ kathyamānaṃ mayā śṛṇu //

itihāsamimaṃ divyaṃ pavitraṃ paramaṃ śubham /
sāyaṃ prātaḥ sadā samyak śrotavyaṃ ca bubhūṣatā //
bhīṣma uvāca /

tato nārāyaṇo devaḥ sankliṣṭo vratacaryayā /
vahnirviniḥsṛto vaktrātkṛṣṇasyādbhutadarśanaḥ //

agninā tena mahatā niḥsṛtena mukhādvibhoḥ /
paśyatāmeva sarveṣāṃ dagdha eva nagottamaḥ //

mṛgapakṣigaṇākīrṇaḥ śvāpadairapi saṅkulaḥ /
vṛkṣagulmalatākīrṇo mathito dīnadarśanaḥ //

punaḥ sa dṛṣṭamātreṇa hariṇā saumyacetasā /
sa babhūva giriḥ kṣipraṃ praphulladrumakānanaḥ //

siddhacāraṇasaṅghaiśca prasannairupaśobhitaḥ / mattavāraṇasaṃyukto nānāpakṣigaṇairyutaḥ /
tadadbhutamacintyaṃ ca sarveṣāmabhavadbhṛśam //

taṃ dṛṣṭvā hṛṣṭaromāṇaḥ sarve munigaṇāstadā / vistitāḥ paramāyattāḥ sādhyasākulalocanāḥ /
na kiñcidabruvaṃstatra śubhaṃ vā yadi vetarat //

tato nārāyaṇo devo munisaṅghe tu vismite /
tānsamīkṣyaiva madhuraṃ babhāṣe puṣkarekṣaṇaḥ //

kimarthaṃ munisaṅghe'sminvismayo'yamanuttamaḥ / etanme saṃśayaṃ sarve yāthātathyena nanditāḥ /
ṛṣayo vaktumarhanti niścayenārthakovidāḥ //

keśavasya vacaḥ śrutvā tuṣṭuvurmunipuṅgavāḥ / bhavānsṛjati vai lokānbhavānsaṃharati prajāḥ /
bhavāñśītaṃ bhavānuṣṇaṃ bhavānsatyaṃ bhavānkratuḥ //

bhavānādirbhavānanto bhavato'nyanna vidyate /
sthāvaraṃ jaṅgamaṃ sarvaṃ tvameva puruṣottama //

tvattaḥ sarvamidaṃ tāta lokacakraṃ pravartate /
tvamevārhasi tadvaktuṃ mukhādagnivinirgamam //

etanno vismayakaraṃ babhūva madhusūdana / tato vigatasantrāsā bhavāma puruṣottama /
yadicchettatra vaktavyaṃ kuto'smākaṃ niyogataḥ //
śrībhagavānuvāca /

nityaṃ hitārthaṃ lokānāṃ bhavadbhiḥ kriyate tapaḥ /
tasmāllokahitaṃ guhyaṃ śrūyatāṃ kathayāmi vaḥ //

asuraḥ sāmprataṃ kaścidahito lokanāśanaḥ /
māyāstrakuśalaścaiva baladarpasamanvitaḥ //

babhūva sa mayā baddho lokānāṃ hitakāmyayā /
putreṇa me vadho dṛṣṭastasya vai munipuṅgavāḥ //

tadarthaṃ putramevāhaṃ sisṛkṣurvanamāgataḥ /
ātmanaḥ sadṛśaṃ putramahaṃ janayituṃ vrataiḥ //

evaṃ vrataparītasya tapastīvratayā mama /
athātmā mama dehasthaḥ sognirbhūtvā viniḥsṛtaḥ //

viniḥsṛtya gato draṣṭuṃ kṣaṇena ca pitāmaham / brahmaṇā manmatho'naṅgaḥ putratvena prakalpitaḥ /
anujñātaśca tenaiva punarāyānmamāntikam //

evaṃ me vaiṣṇavaṃ tejo mama vaktrādviniḥsṛtam /
tattejasā nirmathitaḥ purato'yaṃ giriḥ sthitaḥ //

dṛṣṭvā dāhaṃ girestasya saumyabhāvatayā mama /
punaḥ sa dṛṣṭamātreṇa girirāsīdyathā purā //

etadguhyaṃ yathātathyaṃ kathitaṃ vaḥ samāsataḥ /
bhavanto vyathitā yena vismitāśca tapodhanāḥ //

ṛṣīṇāmevamuktvā tu tānpunaḥ pratyabhāṣata //