Mahabharata · Chapter 13.205

bhagavaṃstīrthayātrārthaṃ tathaiva caratā mayā /
divyamadbhutasaṅkāśaṃ dṛṣṭaṃ haimavataṃ vanam //

nānāvṛkṣasamāyuktaṃ nānāpakṣigaṇairvṛtam /
nānaratnagaṇākīrṇaṃ nānābhāvasamanvitam //

divyacandanasaṃyuktaṃ divyadhūpena dhūpitam /
divyapuṣpasamākīrṇaṃ divyagandhena vāsitam //

siddhacāraṇasanghātairbhūtasaṅghairniṣevitam /
variṣṭhāpsarasākīrṇaṃ nāgagandharvasaṅkulam //

mṛdaṅgamurajoddhuṣṭaṃ śaṅkhavīṇābhināditam /
nṛtyadbhirbhūtasaṅghaiśca sarvatastvabhiśobhitam //

nānārūpairvirūpaiśca bhīmarūpairbhayānakaiḥ /
siṃhavyāghroragamṛgairbiḍālavadanaistathā //

svaroṣṭradvīpivadanairgajavaktraistathaiva ca /
ulūkaśyenavadanaiḥ kākagṛdhramukhaistathā //

evaṃ bahuvidhākārairbhūtasaṅghairbhṛśākulam /
nānadyamānaṃ bahudhā harapāriṣadairbhṛśam //

ghorarūpaṃ sudurdarśaṃ rakṣogaṇaśatairvṛtam /
samājaṃ tadvane dṛṣṭaṃ mayā bhūtapateḥ purā //

pranṛttāpsarasaṃ divyaṃ devagandharvanāditam /
prathame varṣarātre tu meghasaṅghanināditam //

nānābarhiṇasanghuṣṭaṃ gajayūthasamākulam /
ṣaṭpadairupagītaṃ ca prathame māsi mādhave //

utkrośatkrauñcakuraraiḥ sārasairjīvajīvakaiḥ /
mattābhiḥ parapuṣṭābhiḥ kūjantībhiḥ samākulam //

uttamāvāsasaṅkāśaṃ bhīmarūpataraṃ tataḥ /
draṣṭuṃ bhavati dharmasya dharmabhāgijanasya ca //

ye codhvaretasaḥ siddhāstatratatra samāgatāḥ /
mārtāṇḍaraśmisañcārā viśvedevagaṇāstathā //

tathā nāgāstathā divyā lokapālā hutāśanāḥ /
vātāśca sarve cāyānti divyapuṣpasamākulāḥ //

kirantaḥ sarvapuṣpāṇi kiranto'dbhutadarśanāḥ /
oṣadhyaḥ prajvalantyaśca dyotayantyo diśo daśa //

vihagāśca mudā yuktā nṛtyanti ca nadanti ca /
tataḥ samantatastatra divyā divyajanapriyāḥ //

tatra devo giritaṭe hemadhātuvibhūṣite /
paryaṅka iva babhrāja upaviṣṭo mahādyutiḥ //

vyāghracarmaparīdhāno gajacarmottaracchadaḥ /
vyālayajñopavītaśca lohitāntravibhūṣitaḥ //

hariśmaśrujaṭo bhīmo bhayakartā'maradviṣām /
bhayaheturabhaktānāṃ bhaktānāmabhayaṅkaraḥ //

kinnarairdevagandharvaiḥ stūyamānastatastataḥ /
ṛṣibhiścāpsarobhiśca sarvataścaiva śobhitaḥ //

tatra bhūtapateḥ sthānaṃ devadānavasaṅkulam /
sarvatejomayaṃ bhūmnā lokapālaniṣevitam //

mahoragasamākīrṇaṃ sarveṣāṃ romaharṣaṇam /
bhīmarūpamanirdeśyamapradhṛṣyatamaṃ vibhoḥ //

tatra bhūtapatiṃ devamāsīnaṃ śikharottame / ṛṣayo bhūtasaṅghāśca praṇamya śirasā haram /
gīrbhiḥ paramaśuddhābhistuṣṭuvusca manoharam //

vimuktāścaiva pāpebhyo babhūvurvigatajvarāḥ /
ṛṣayo bālakilyāśca tathā viprarṣayaśca ye //

ayonijā yonijāśca tapaḥsiddhā maharṣayaḥ / tatastaṃ devadeveśaṃ bhagavantamupāsate /

tatastasminkṣaṇe devī bhūtastrīgaṇasaṃvṛtā /
haratulyāmbaradharā samānavratacāriṇī //

kāñcanaṃ kalaśaṃ gṛhya sarvatīrthāmbupūritam /
puṣpavṛṣṭyā'bhivarṣantī divyagandhasamāvṛtā //

saridvarābhiḥ sarvābhiḥ pṛṣṭhato'nugatā varā /
sevituṃ bhagavatpārśvamājagāma śucismitā //

āgamya tu gireḥ putrī devadevasya cāntikam /
manaḥpriyaṃ cikīrṣantī krīḍārthaṃ śaṅkarāntike //

manoharābhyāṃ pāṇibhyāṃ haranetre pidhāya tu /
avekṣya hṛṣṭā svagaṇānsmayantī pṛṣṭhataḥ sthitā //

devyā cāndhīkṛte deve kaśmalaṃ samapadyata /
nimīlite bhūtapatau naṣṭacandrārkatārakam //

niḥsvādhyāyavaṣaṭkāraṃ tamasā cābhisaṃvṛtam /
viṣaṇṇaṃ bhayavitrastaṃ jagadāsīdbhayākulam //

hāhākāramṛṣīṇāṃ ca lokānāmabhavattadā /
tamobhibhūte sambhrānte loke jīvanasankṣaye //

tṛtīyaṃ cāsya sambhūtaṃ lalāṭe netramāyatam /
dvādaśādityasaṅkāśaṃ lokānbhāsā'vabhāsayat //

tatraka tenāgninā tena yugāntāgninibhena vai /
adahyata giriḥ sarvo himavānagrataḥ sthitaḥ //

dahyamāne girau tasminmṛgapakṣisamākule /
savidyādharagandharve divyauṣadhasamākule //

tato girisutā cāpi vismayotphullalocanā /
babhūva ca jagatsarvaṃ tathā vismayasaṃyutam //

paśyatāmeva sarveṣāṃ devadānavarakṣasām /
netrajenāgninā tena dagdha eva nagottamaḥ //

taṃ dṛṣṭvā mathitaṃ śailaṃ śailaputrī saviklavā /
pituḥ sammānamicchantī papāta bhuvi pādūyoḥ //

taṃ dṛṣṭvā devadeveśo devyā duḥkhamanuttamam /
haimavatyāḥ priyārthaṃ ca giriṃ punaravaikṣata //

dṛṣṭamātre bhagavatā saumyayuktena cetasā /
kṣaṇena himavāñśailaḥ prakṛtistho'bhavatpunaḥ //

hṛṣṭapuṣṭavihaṅgaiśca praphulladrumakānanaḥ /
siddhacāraṇasaṅghaiśca prītiyuktaiḥ samākulaḥ //

pitaraṃ prakṛtisthaṃ ca dṛṣṭvā haimavatī bhṛśam /
abhavatprītisaṃyuktā muditātra pinākinam //

devī vismayasaṃyuktā praṣṭukāmā maheśvaram / hitārtaṃ sarvalokānāṃ prajānāṃ hitakāmyayā /
devadevaṃ mahādevī babhāṣedaṃ vaco'rthavat //

bhagavandevadeveśa śūlapāṇe mahādyute /
vismayo me mahāñjātastasminnetrāgnisambhave //

kimarthaṃ devadeveśa lalāṭe'sminprakāśate /
atisūryāgnisaṅkāśaṃ tṛtīyaṃ netramāyatam //

netrāgninā tu mahatā nirdagdho himavānasau /
punaḥ sandṛṣṭamātrastu prakṛtisthaḥ pitā mama //

eṣa me saṃśayo deva hṛdi me sampravartate /
devadeva namastubhyaṃ tanme saṃsitumarhasi //
nārada uvāca /

evamuktastayā devyā prīyamāṇo'bravīdbhavaḥ /
sthāne saṃśayituṃ devi dharmajñe priyabhāṣiṇi //

tvadṛte māṃ hi vai praṣṭuṃ na śakyaṃ kena cetpriye /
prakāśaṃ yadi vā guhyaṃ priyārthaṃ prabravīmyaham //

śṛṇu tatsarvamakilamasyāṃ saṃsadi bhāmini /
sarveṣāmeva lokānāṃ kūṭasthaṃ viddhi māṃ priye //

madadhīnāstrayo lokā yathā viṣṇau tathā mayi /
sraṣṭā viṣṇurahaṃ goptā ityetadviddhi bhāmini //

tasmādyadā māṃ spṛśati śubhaṃ vā yadi vetarat /
tathaivedaṃ jagatsarvaṃ tattadbhavati śobhane //

etadguhyamajānantyā tvayā bālyādanindite /
mannetre pihite devi krīḍanārthaṃ dṛḍhavrate //

tatkṛte naṣṭacandrārkaṃ jagadāsīdbhayākulam /
naṣṭāditye tamobhūte loke girisute priye //

tṛtīyaṃ locanaṃ sṛṣṭaṃ lokaṃ saṃrakṣituṃ mayā /
kathitaṃ saṃśayasthānaṃ nirviśaṅkā bhava priye //