Mahabharata · Chapter 13.200

dānena vartatetyāha tapasā caiva bhārata / tadetanme manoduḥśaṃ vyapoha tvaṃ pitāmaha /
kiṃsvitpṛthivyāṃ hyetanme bhavāñśaṃsitumarhati //
bhīṣma uvāca /

śṛṇu yairdharmanirataistapasā bhāvitātmabhiḥ /
lokā hyasaṃśayaṃ prāptā dānapuṇyaratairnṛpaiḥ //

satkṛtaśca tathā'treyaḥ śiṣyebhyo brahma nirguṇam /
upadiśya tadā rājangato lokānanuttamān //

śibirośīnaraḥ prāṇānpriyasya tanayasya ca /
brāhmaṇārthamupākṛtya nākapṛṣṭhamito gataḥ //

pratardanaḥ kāśipatiḥ pradāya tanayaṃ svakam /
brāhmaṇāyātulāṃ kīrtimiha cāmutra cāśnute //

rantidevaśca sānkṛtyo vasiṣṭhāya mahātmane /
arghyaṃ pradāya vidhivallebhe lokānanuttamān //

divyaṃ śataśalākaṃ ca yajñārthaṃ kāñcanaṃ śubham /
chatraṃ devāvṛdho dattvā brāhmaṇāyāsthito divam //

bhagavānambarīṣaśca brāhmaṇāyāmitaujase /
pradāya sakalaṃ rāṣṭraṃ surolakamavāptavān //

sāvitraḥ kuṇḍalaṃ divyaṃ yānaṃ ca janamejayaḥ /
brāhmaṇāya ca gā dattvā gato lokānanuttamān //

vṛṣādarbhiśca rājarṣī ratnāni vividhāni ca /
ramyāṃścāvasathāndattvā dvijebhyo divamāgataḥ //

nimī rāṣṭraṃ ca vaidarbhiḥ kanyāṃ dattvā mahātmane /
agastyāya gataḥ svargaṃ saputrapaśubāndhavaḥ //

jāmadagnyaśca viprāya bhūmiṃ dattvā mahāyaśāḥ /
rāmo'kṣayāṃstathā lokāñjagāma manaso'dhikān //

avarṣati ca parjanye sarvabhūtāni devarāṭ /
vasiṣṭho jīvayāmāsa yena yāto'kṣayāṃ gatim //

rāmo dāśarathiścaiva hutvā yajñeṣu vai vasu /
sagato hyakṣayām̐llokānyasya loke mahadyaśaḥ //

kakṣasenaśca rājarṣirvasiṣṭhāya mahātmane /
nyāsaṃ yathāvatsannyasya jagāmi sumahāyaśaḥ //

karandhamasya pautrastu marutto'vikṣitaḥ sutaḥ /
kanyāmāṅgirase dattvā divāmāśu jagāma saḥ //

brahmadattaśca pāñcālyo rājā dharmabhṛtāṃvaraḥ /
nidhiṃ śaṅkhamanujñāpya jagāma paramāṃ gatim //

rājā mitrasahaścaiva vasiṣṭhāya mahātmane /
madayantīṃ priyāṃ bhāryāṃ dattvā ca tridivaṃ gataḥ //

manoḥ putraśca sudyumno likhitāya mahātmane /
daṇḍamuddhṛtya dharmeṇa gato lokānanuttamān //

sahasracityo rājarṣiḥ prāṇāniṣṭānmahāyaśāḥ /
brāhmaṇārthe parityajya gato lokānanuttamān //

sarvakāmaiśca sampūrṇaṃ dattvā veśma hiraṇmayam /
maudgalyāya gataḥ svargaṃ śatadyumno mahīpatiḥ //

bhakṣyabhojyasya ca kṛtānrāśayaḥ parvatopamān /
śāṇḍilyāya purā dattvā sumanyurdivamāsthitaḥ //

nāmnā ca dyutimānnāma sālvarājo mahādyutiḥ /
dattvā rājyamṛcīkāya gato lokānanuttamān //

madirāśvaśca rājarṣirdattvā kanyāṃ sumadhyamām /
hiraṇyahastāya gato lokāndevairadhiṣṭhitān //

lomapādaśca rājarṣiḥ śāntāṃ dattvā sutāṃ prabhuḥ /
ṛśyaśṛṅgāya vipulaiḥ sarvaiḥ kāmairayujyata //

kautsāya dattvā kanyāṃ tu haṃsīṃ nāma yaśasvinīm /
gato'kṣayānato lokānrājarṣiśca bhagīrathaḥ //

dattvā śatasahasraṃ tu gavāṃ rājā bhagīrathaḥ /
sa vatsānāṃ kohalāya gato lokānanuttamān //

ete cānye ca bahavo dānena tapasā ca ha /
yudhiṣṭhira gatāḥ svargaṃ nivartante punaḥpunaḥ //

teṣāṃ pratiṣṭhitā kīrtiryāvatsthāsyati medinī /
gṛhasthairdānatapasā yairlokā vai vinirjitāḥ //

śiṣṭānāṃ caritaṃ hyetatkīrtitaṃ me yudhiṣṭhira /
dānayajñaprajāsargairete hi divamāsthitāḥ //

dattvā tu satataṃ te'stu kauravāṇāṃ dhurandhara /
dānayajñakriyāyuktā buddhirdharmopacāyinī //

yatra te nṛpaśārdūla sandeho vai bhaviṣyati /
śvaḥ prabhāte hi vakṣyāmi sandhyā hi samupasthitā //