Mahabharata · Chapter 13.199

uktāstu bhavatā bhojyāstathā'bhojyāśca sarvaśaḥ /
atra me praśnasandehastanme vada pitāmaha //

brāhmaṇānāṃ viśeṣeṇa havyakavyapratigrahe /
nānāvidheṣu bhojyeṣu prāyaścittāni śaṃsa me //
bhīṣma uvāca /

hanta vakṣyāmi te rājanbrāhmaṇānāṃ mahātmanām /
pratigraheṣu bhojye ca mucyate yena pāpmanaḥ //

ghṛtapratigrahe caiva sāvitrī samidāhutiḥ /
tilapratigrahe caiva samametadyudhiṣṭhira //

māṃsapratigrahe caiva madhuno lavaṇasya ca /
ādityodayanaṃ sthitvā pūto bhavati brāhmaṇaḥ //

kāñcanaṃ pratigṛhyātha japamāno guruśrutim /
kṛṣṇāyasaṃ ca vivṛtaṃ dhārayanmucyate dvijaḥ //

evaṃ pratigṛhīte'tha dhane vastre tathā striyām / evameva naraśreṣṭha suvarṇasya pratigrahe /

annapratigrahe caiva pāyasekṣurase tathā /
ikṣutailapavitrāṇāṃ trisandhye'psu nimajjanam //

vrīhau puṣpe phale caiva jale piṣṭamaye tathā /
yāvake dadhidugdhe ca sāvitrīṃ śataśo'nvitām //

upānahau ca cchatraṃ ca pratigṛhyaurdhvadehike /
japecchataṃ samāyuktastena mucyate pāpmanā //

kṣetrapratigrahe caiva grahasūtakayostathā /
trīṇi rātrāṇyupoṣitvā tena pāpādvimucyate //

kṛṣṇapakṣe tu yaḥ śrāddhaṃ pitṝṇāmaśnute dvijaḥ /
annametadahorātrātpūto bhavati brāhmaṇaḥ //

na ca sandhyāmupāsīta na ca jāpyaṃ pravartayet /
na saṅkirettadannaṃ ca tataḥ pūyeta brāhmaṇaḥ //

ityarthamaparāṅṇe tu pitṝṇāṃ śrāddhamucyate /
yathoktānāṃ yadaśnīyurbrāhmaṇāḥ pūrvaketitāḥ //

mṛtakasya tṛtīyāhe brāhmaṇo yo'nnamaśnute /
sa trivelaṃ samunmajjya dvādaśāhena śudhyati //

dvādaśāhe vyatīte tu kṛtaśauco viśeṣataḥ /
brāhmaṇebhyo havirdattvā mucyate tena pāpmanā //

mṛtasya daśarātreṇa prāyaścittāni dāpayet /
sāvitrīṃ raivatīmiṣṭiṃ kūśmāṇḍamaghamarṣaṇam //

mṛtakasya trirātre yaḥ samuddiṣṭe samaśnute /
saptatriṣavaṇaṃ snātvā pūto bhavati brāhmaṇaḥ //

siddhimāpnoti vipulāmāpadaṃ caiva nāpnuyāt //

yastu śūdraiḥ samaśnīyādbrāhmaṇo'pyekabhojane /
aśaucaṃ vidhivattasya śaucamatra vidhīyate //

yastu vaiśyaiḥ sahāśnīyādbrāhmaṇo'pyekabhojane /
sa vai trirātraṃ dīkṣitvā mucyate tena karmaṇā //

kṣatriyaiḥ saha yo'śnīyādbrāhmaṇo'pyekabhojane /
āplutaḥ saha vāsobhistena mucyeta pāpmanā //

śūdrāsya tu kulaṃ hanti vaiśyasya paśubāndhavān /
kṣatriyasya śriyaṃ hanti brāhmaṇasya suvarcasam //

prāyaścittaṃ ca śāntiṃ ca juhuyāttena mucyate / sāvitrīṃ raivatīmiṣṭiṃ kūśmāṇḍamaghamarṣaṇam /

tathocchiṣṭamathānyonyaṃ samprāśennātra saṃśayaḥ /
rocanā virajā rātrirmaṅgalālambhanāni ca //