Mahabharata · Chapter 13.201
śrutaṃ me bhavatastāta satyavrataparākrama /
dānadharmeṇa mahatā ye prāptāstridivaṃ nṛpāḥ //
imāṃstu śrotumicchāmi dhramāndharmabhṛtāṃvara /
dānaṃ katividhaṃ deyaṃ kiṃ tasya ca phalaṃ labhet //
kathaṃ kebhyasca dharmyaṃ ca dānaṃ dātavyamiṣyate /
kaiḥ kāraṇaiḥ katividhaṃ śrotumicchāmi tattvataḥ //
bhīṣma uvāca /
śṛṇu tattvena kaunteya dānaṃ prati mamānagha /
yathā dānaṃ pradātavyaṃ sarvavarṇeṣu bhārata //
dharmādarthādbhayātkāmātkāruṇyāditi bhārata /
dānaṃ pañcavidhaṃ jñeyaṃ kāraṇairyairnibodha tat //
iha kīrtimavāpnoti pretya cānuttamaṃ sukham /
iti dānaṃ pradātavyaṃ brāhmaṇebhyo'nasūyatā //
dadāti vā dāsyati vā mahyaṃ dattamanena vā /
ityartibhyo niśamyaiva sarvaṃ dātavyamarthine //
nāsyāhaṃ na madīyo'yaṃ pāpaṃ kuryādvimānitaḥ /
iti dadyādbhayādeva dṛḍhaṃ mūḍhāya paṇḍitaḥ //
priyo me yaṃ priyo'syāhamiti samprekṣya buddhimān /
vayasyāyaivamakliṣṭaṃ dānaṃ dadyādatandritaḥ //
dīnaśca yācate cāyamalpenāpi hi tuṣyati /
iti dadyāddaridrāya kāruṇyāditi sarvathā //
iti pañcavidhaṃ dānaṃ puṇyakīrtivivardhanam / yathāśaktyā pradātavyamevamāha prajāpatiḥ // ] //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0