Mahabharata · Chapter 13.20

yudhiṣṭhira mahābāho śṛṇu rājanyathātatham /
garuḍaṃ pakṣiṇāṃ śreṣṭhaṃ vainateyaṃ mahābalam //

tathā ca garuḍo rājansuparṇaśca yathā'bhavat /
yathā ca bhujagānhanti tathā me bruvataḥ śṛṇu //

purā'haṃ tāta rāmeṇi jāmadagnyena dhīmatā /
kailāsaśikhare ramye mṛgānnighnansahasraśaḥ //

tamahaṃ tāta dṛṣṭaiva śastraṇyutsṛjya sarvaśaḥ /
abhivādya pūrvaṃ rāmāya vinayenopatasthivān //

tamahaṃ kathānte varadaṃ suparṇasya balaujasī /
apṛcchaṃ sa ca māṃ prītaḥ pratyuvāca yudhiṣṭhira //

kadrūśca vinatā cāstāṃ prajāpatisute ubhe /
te tu dharmeṇopayeme mārīcaḥ kaśyapaḥ prabhuḥ //

prādāttābhyāṃ varaṃ prīto bhāryābhyāṃ sumahātapāḥ //

tatra kadrūrvaraṃ vavre putrāṇāṃ daśataḥ śatam /
tulyatejaḥprabhāvānāṃ sarveṣāṃ tulyajanmanām //

vinatā tu vavre dvau putrau vīrau bharatasattama /
kadrūputrasahasreṇa tulyavegaparākramau //

sa tu tābhyāṃ varaṃ prādāttathetyuktvā mahātapāḥ /
janayāmāsa tānputrāṃ stābhyāmāsīdyathā purā //

kadrūḥ prajajñe hyaṇḍānāṃ tathaiva daśataḥśatam /
aṇḍe dve vinatā caiva darśanīyatare śubhe //

tāni tvaṇḍāni tu tayoḥ kadrūvinatayordvayoḥ /
sopasvedeṣu pātreṣu nidadhuḥ paricāriṇaḥ //

nissaranti tadā'ṇḍebhyaḥ kadrūputrā bhujaṅgamāḥ /
pañcavarṣaśate kāle dṛṣṭvā'moghabalaujasaḥ //

vinatā teṣu jāteṣu pannageṣu mahātmasu /
viputrā putrasantāpāddaṇḍamekaṃ bibheda ha //

kimanena kariṣye'hamiti vākyamabhāṣata /
nahi pañcaśate kāle purā putrau dadarśa sā //

sāpaśyadaṇḍānniṣkrāntaṃ vināpatraṃ manasvinam /
pūrvakāyopasampannaṃ viyuktamitareṇa ha //

dṛṣṭvā tu taṃ tathārūpamasamagraśarīriṇam /
putraduḥkhānvitā'śocatsa ca pakṣī tathā gataḥ //

abravīcca mudā yuktaḥ paryaśrunayanastadā /
mātaraṃ ca palāśī ha hato'hamiti cāsakṛt //

na tvayā kāṅkṣitaḥ kālo yāvānevātyagātpurā /
āvāṃ bhavāya putrau te śvasanādbalavattarau //

īrṣyākrodhābhibhūtatvādyohamevaṃ kṛtastvayā /
tasmāttvamapi me mātardāsībhāvaṃ gamiṣyasi //

pañcavarṣaśatāni tvaṃ spardhase vai yayā saha /
dāsī tasyā bhavitrīti sāśrupātamuvāca ha //

eṣa caiva mahābhāge balī balavatāṃvaraḥ / mokṣayiṣyati te mātardāsībhāvānmamānujaḥ //