Mahabharata · Chapter 13.19

garuḍaḥ pakṣiṇāṃ śreṣṭha iti pūrvaṃ pitāmaha /
uktastvayā mahābāho śvetavāhaṃ praśaṃsatā //

atra kautūhala iti śravaṇe jāyate matiḥ /
kathaṃ garutmānpakṣīṇāṃ śraiṣṭhyaṃ prāpa parantapa //

suparṇo vainateyaśca kena śatruśca bhoginām /
kiṃvīryaḥ kimbalaścāsau vaktumarhasi bhārata //
bhīṣma uvāca /

vāsudeva mahābāho devakī suprajāstvayā /
śrutaṃ te dharmarājasya mama harṣavivardhana //

suparṇaṃ śaṃsa ityeva māmāha kurunandanaḥ /
asya pravaktumicchāmi tvayā'jñapto mahādyute //

tvaṃ hi śaure mahābāho suparṇaḥ procyase purā /
anādinidhane kāle garuḍaścāsi keśava //

tasmātpūrvaṃ prasādya tvāṃ dharmaputrāya dhīmate /
garuḍaṃ patatāṃśreṣṭhaṃ vaktumicchāmi mādhava //
vāsudeva uvāca /

yathaiva māṃ bhavānveda tathā veda yudhiṣṭhiraḥ /
yathā ca garuḍo jātastathā'smai brūhi tatvataḥ //