Mahabharata · Chapter 13.195

tataḥ padmapratīkāśaḥ padmodbhūtaḥ pitāmahaḥ /
uvāca vacanaṃ devānvāsavaṃ ca śacīpatim //

ayaṃ mahābalo nāgo rasātalacaro balī /
tejasvī reṇuko nāma mahāsatvaparākramaḥ //

atitejasvinaḥ sarve mahāvīryā mahāgajāḥ /
dhārayanti mahīṃ kṛtsnāṃ saśailavanakānanām //

bhavadbhiḥ samanujñāto reṇukastānmahāgajān /
dharmaguhyāni sarvāṇi gatvā pṛcchatu tatra vai //

pitāmahavacaḥka śrutvā te devā reṇukaṃ tadā /
preṣayāmāsuravyagrā yatra te dharaṇīdharāḥ //
reṇuka uvāca /

anujñāto'smi devaiśca pitṛbhiscaka mahābalāḥ / dharmaguhyāni yuṣmākaṃ śrotumicchāmi tattvataḥ /
kathayadhvaṃ mahābhāgā yadvastattvaṃ manīṣitam //
diggajā ūcuḥ /

kārtike māsi cāśleṣā bahulasyāṣṭamī śivā / tena nakṣatrayogena yo dadāti guḍaudanam /
imaṃ mantraṃ japacchrāddhe yatāhāro hyakopanaḥ //

baladevaprabhṛtayo ye nāgā balavattarāḥ /
anantā hyakṣayā nityaṃ bhoginaḥ sumahābalāḥ //

teṣāṃ kulodbhavā ye ca mahābhūtā bhujaṅgamāḥ /
te me baliṃ prayacchantu balatejobhivṛddhaye //

yadā nārāyaṇaḥ śrīmānujjahāra vasundharām /
tadbalaṃ tasya devasya dharāmuddharatastathā //

evamuktvā baliṃ tatra valmīke tu nivedayet //

gajendrakusumākīrṇaṃ nīlavastrānulepanam /
nirvapettaṃ tu valmīke astaṃ yāte divākare //

evaṃ tuṣṭāstataḥ sarve adhastādbhārapīḍitāḥ /
śramaṃ taṃ nāvabudhyāmo dhārayanto vasundharām //

evaṃ manyāmahe sarve bhārārtā nirapekṣiṇaḥ /
brāhmaṇaḥ kṣatriyo vaiśyaḥ śūdro vā yadyupoṣitaḥ //

evaṃ saṃvatsaraṃ kṛtvā dānaṃ bahuphalaṃ labhet /
valmīke balimādāya tanno bahuphalaṃ matam //

ye ca nāgā mahāvīryāstriṣu lokeṣu kṛtsnaśaḥ /
kṛtātithyā bhaveyuste śataṃ varṣāṇi tattvataḥ //

diggajānāṃ ca tacchrutvā devatāḥ pitarastathā / ṛṣayaśca mahābhāgāḥ pūjayanti sma reṇukam // ] //