Mahabharata · Chapter 13.194

tataḥ sarve mahābhāgā devāśca pitaraśca ha /
ṛṣayaśca mahābhāgāḥ pramathānvākyamabruvan //

bhavanto vai mahābhāgā aparokṣaniśācarāḥ /
ucchiṣṭānaśucīnkṣudrānkathaṃ hisatha mānavān //

ke ca smṛtāḥ pratīghātā yena martyānna hiṃsatha / rakṣoghnāni ca kāni syuryairgṛheṣu praṇaśyatha /
śrotumicchāma yuṣmākaṃ sarvametanniśācarāḥ //
pramathā ūcuḥ /

maithunena sadocchiṣṭāḥ kṛte caivādharottare /
mohānmāṃsāni khādeta vṛkṣamūle ca yaḥ svapet //

āmiṣaṃ śīrṣato yasya pādato yaśca saṃviśet /
tata ucchiṣṭakāḥ sarve bahucchidrāśca mānavāḥ //

udake cāpyamedhyāni śleṣmāṇaṃ ca pramuñcati /
ete bhakṣyāśca vadhyāśca mānuṣā nātra saṃśayaḥ //

evaṃ śīlasamācārāndharṣayāmo hi mānavān / śrūyatāṃ ca pratīghātānyairna śaknuma hiṃsitum /

gorocanāsamālambho vacāhastaśca yo bhavet /
ghṛtākṣataṃ ca yo dadyānmastake tatparāyaṇaḥ //

ye ca māṃsaṃ na khādanti tānna śaknuma hiṃsitum /
yasya cāgnirgṛhe nityaṃ divārātrau ca dīpyate //

tarakṣoścarmadaṃṣṭrāśca tathaiva girikacchapaḥ /
ājyadhūmo biḍālaśca cchāgaḥ kṛṣṇo'ta piṅgalaḥ //

yeṣāmetāni tiṣṭhanti gṛheṣu gṛhamedhinām /
tānyadhṛṣyāṇyagārāṇi piśitāśaiḥ sudāruṇaiḥ //

lokānasmadvidhā ye ca vicaranti yathāsukham / tasmādetāni geheṣu rakṣoghnāni viśāmpate /
etadvaḥ kathitaṃ sarvaṃ yatra vaḥ saṃśayo mahān // ] //