Mahabharata · Chapter 13.193

tatastvṛṣigaṇāḥ sarve pitaraśca sadevatāḥ /
arundhatīṃ tapovṛddhāmapṛcchanta samāhitāḥ //

samānaśīlāṃ vīryeṇa vasiṣṭhasya mahātmanaḥ / tvatto dharmarahasyāni śrotumicchāmahe vayam /
yatte guhyatamaṃ bhadre tatprabhāṣitumarhasi //
arundhatyuvāca /

tapovṛddhirmayā prāptā bhavatāṃ smaraṇena vai /
bhavatāṃ ca prasādena dharmānvakṣyāmi śāśvatān //

saguhyānsarahasyāṃśca tāñśṛṇudvamaśeṣataḥ /
śraddadhāne prayoktavyā yasya śuddhaṃ tathā manaḥ //

aśraddadhāno mānī ca brahmahā gurutalpaga /
asambhāṣyā hi catvāro naiṣāṃ dharmaṃ prakāśayet //

ahanyahani yo dadyātkapilāṃ dvādaśīḥ samāḥ /
māsimāsi ca satreṇa yo yajeta sadā naraḥ //

gavāṃ śatasahasraṃ ca yo dadyājjyeṣṭhapuṣkare /
na taddharmaphalaṃ tulyamatithiryasya tuṣyati //

śrūyatāṃ cāparo dharmo manuṣyāṇāṃ sukhāvahaḥ /
śraddadhānena kartavyaḥ sarahasyo mahāphalaḥ //

kalyamutthāya gomadhye gṛhya darbhānsahodakān / niṣiñceta gavāṃ śṛṅge mastakena ca tajjalam /
pratīccheta nirāhārastasyi dharmaphalaṃ śṛṇu //

śrūyante yāni tīrthāni triṣu lokeṣu kānicit / siddhacāraṇajuṣṭāni sevitāni maharṣibhiḥ /
abhiṣekaḥ samasteṣāṃ gavāṃ śṛṅgodakasya ca //

sādhusādhviti coddiṣṭaṃ daivataiḥ pitṛbhistathā /
bhūtaiścaiva susaṃhṛṣṭaiḥ pūjitā sā'pyarundhatī //
pitāmaha uvāca /

aho dharmo mahābhāge sarahasya udāhṛtaḥ /
varaṃ dadāmi te dhanye tapaste vardatāṃ sadā //
yama uvāca /

ramaṇīyā kathā divyā yuṣmatto yā mayā śrutā /
śrūyatāṃ citraguptasya bhāṣitaṃ mama ca priyam //

rahasyaṃ dharmasaṃyuktaṃ śakyaṃ śrotuṃ maharṣibhiḥ /
śraddadhānena martyena ātmano hitamicchātā //

na hi puṇyaṃ tathā pāpaṃ kṛtaṃ kiñcidvinaśyati /
parvakāle ca yatkiñcidādityaṃ cādhitiṣṭhati //

pretalokaṃ gate martye tattatsarvaṃ vibhāvasuḥ /
pratijānāti puṇyātmā tacci tatropayujyate //

kiñciddharma pravakṣyāmi citraguptamataṃ śubham /
pānīyaṃ caiva dīpaṃ ca dātavyaṃ satataṃ tathā //

upānahau ca cchatraṃ ca kapilā ca yathātatham /
puṣkare kapilā deyā brāhmaṇe vedapārage //

agnihotraṃ ca yatnena sarvaśaḥ pratipālayet /
ayaṃ caivāparo dharmaścitraguptena bhāṣitaḥ //

phalamasya pṛthaktvena śrotumarhanti sattamāḥ /
pralayaṃ sarvabhūtaistu gantavyaṃ kālaparyayāt //

tatra durgamanuprāptāḥ kṣuttṛṣṇāparipīḍitāḥ /
dahyamānā vipacyante na tatrāsti palāyanam //

andhakāraṃ tamo ghoraṃ praviśantyalpabuddhayaḥ /
tatra dharmaṃ pravakṣyāmi yena durgāṇi santaret //

alpavyayaṃ mahārthaṃ ca pretya caiva sukhodayam /
pānīyasya guṇā divyāḥ pretaloke viśeṣataḥ //

tatra puṇyodakā nāma nadī teṣāṃ vidhīyate /
akṣayaṃ salilaṃ tatra śītalaṃ hyamṛtopamam //

sa tatra toyaṃ pibati pīnīyaṃ yaḥ prayacchati /
pradīpasya pradānena śrūyatāṃ guṇavistaraḥ //

tamondhakāraṃ niyataṃ dīpado na prapaśyati / prabhāṃ cāsya prayacchanti somabhāskarapāvakāḥ /
devatāścānumanyante vimalāḥ sarvato diśaḥ //

dyotateṃ ca yathā'dityaḥ pretalokagato naraḥ /
tasmāddīpaḥ pradātavyaḥ pānīyaṃ ca viśeṣataḥ //

kapilāṃ ye prayacchanti brāhmaṇe vedapārage /
puṣkare ca viśeṣeṇa śrūyatāṃ tasya yatphalam //

gośataṃ savṛṣaṃ tena dattaṃ bhavati śāśvatam / pāpaṃ karma ca yatkiñcidbrahmahatyāsamaṃ bhavet /
śodhayetkapilā hyekā pradattaṃ gośataṃ yathā //

tasmāttu kapilā deyā kaumudyāṃ jyeṣṭhapuṣkare /
na teṣāṃ viṣamaṃ kiñcinna duḥkhaṃ na ca kaṇṭakāḥ //

upānahau ca yo dadyātpātrabhūte dvijottame /
chatradāne sukhāṃ chāyāṃ labhate paralokagaḥ //

na hi dattasya dānasya nāśo'stīha kadācana /
citraguptamataṃ śrutvā hṛṣṭaromā vibhāvasuḥ //

uvāca devatāḥ sarvāḥ pitṝṃścaiva mahādyutiḥ /
śrutaṃ hi citraguptasya dharmaguhyaṃ mahātmanaḥ //

śraddadhānāśca ye martyā brāhmaṇeṣu mahātmasu /
dānametatprayacchanti na teṣāṃ vidyate bhayam //

dharmadoṣāstvime pañca yeṣāṃ nāstīha niṣkṛtiḥ /
asambhāṣyā anācārā varjanīyā narādhamāḥ //

brahmahā caiva goghnaśca paradārarataśca yaḥ /
aśraddadhānaśca naraḥ striyaṃ yaścopajīvati //

pretalokagatā hyete narake pāpakarmiṇaḥ /
pacyante vai yathā mīnāḥ pūyaśoṇitabhojanāḥ //

asambhāṣyāḥ pitṝṇāṃ ca devānāṃ caiva pañca te /
snātakānāṃ ca viprāṇāṃ ye cānye ca tapodhanāḥ //