મહાભારત · અધ્યાય 13.194

તતઃ સર્વે મહાભાગા દેવાશ્ચ પિતરશ્ચ હ ।
ઋષયશ્ચ મહાભાગાઃ પ્રમથાન્વાક્યમબ્રુવન્ ॥

ભવન્તો વૈ મહાભાગા અપરોક્ષનિશાચરાઃ ।
ઉચ્છિષ્ટાનશુચીન્ક્ષુદ્રાન્કથં હિસથ માનવાન્ ॥

કે ચ સ્મૃતાઃ પ્રતીઘાતા યેન મર્ત્યાન્ન હિંસથ । રક્ષોઘ્નાનિ ચ કાનિ સ્યુર્યૈર્ગૃહેષુ પ્રણશ્યથ ।
શ્રોતુમિચ્છામ યુષ્માકં સર્વમેતન્નિશાચરાઃ ॥
પ્રમથા ઊચુઃ ।

મૈથુનેન સદોચ્છિષ્ટાઃ કૃતે ચૈવાધરોત્તરે ।
મોહાન્માંસાનિ ખાદેત વૃક્ષમૂલે ચ યઃ સ્વપેત્ ॥

આમિષં શીર્ષતો યસ્ય પાદતો યશ્ચ સંવિશેત્ ।
તત ઉચ્છિષ્ટકાઃ સર્વે બહુચ્છિદ્રાશ્ચ માનવાઃ ॥

ઉદકે ચાપ્યમેધ્યાનિ શ્લેષ્માણં ચ પ્રમુઞ્ચતિ ।
એતે ભક્ષ્યાશ્ચ વધ્યાશ્ચ માનુષા નાત્ર સંશયઃ ॥

એવં શીલસમાચારાન્ધર્ષયામો હિ માનવાન્ । શ્રૂયતાં ચ પ્રતીઘાતાન્યૈર્ન શક્નુમ હિંસિતુમ્ ।

ગોરોચનાસમાલમ્ભો વચાહસ્તશ્ચ યો ભવેત્ ।
ઘૃતાક્ષતં ચ યો દદ્યાન્મસ્તકે તત્પરાયણઃ ॥

યે ચ માંસં ન ખાદન્તિ તાન્ન શક્નુમ હિંસિતુમ્ ।
યસ્ય ચાગ્નિર્ગૃહે નિત્યં દિવારાત્રૌ ચ દીપ્યતે ॥

તરક્ષોશ્ચર્મદંષ્ટ્રાશ્ચ તથૈવ ગિરિકચ્છપઃ ।
આજ્યધૂમો બિડાલશ્ચ ચ્છાગઃ કૃષ્ણોઽત પિઙ્ગલઃ ॥

યેષામેતાનિ તિષ્ઠન્તિ ગૃહેષુ ગૃહમેધિનામ્ ।
તાન્યધૃષ્યાણ્યગારાણિ પિશિતાશૈઃ સુદારુણૈઃ ॥

લોકાનસ્મદ્વિધા યે ચ વિચરન્તિ યથાસુખમ્ । તસ્માદેતાનિ ગેહેષુ રક્ષોઘ્નાનિ વિશામ્પતે ।
એતદ્વઃ કથિતં સર્વં યત્ર વઃ સંશયો મહાન્ ॥ ] ॥