Mahabharata · Chapter 13.185

strīṇāṃ hi samudācāraṃ sarvadharmavidāṃvara /
śrotumicchāmyahaṃ tvattastanme brūhi pitāmaha //
bhīṣma uvāca /

sarvajñāṃ sarvatattvajñāṃ devaloke manasvinīm /
kaikeyī sumanā nāma śāṇḍilīṃ paryapṛcchata //

kena vṛttena kalyāṇi samācāreṇa kena vā /
vidhūya sarvapāpāni devalokaṃ tvamāgatā //

hutāśanaśikheva tvaṃ jvalamānā svatejasā /
sutā tārādhipasyeva prabhayā divamāgatā //

arajāṃsi ca vastrāṇi dhārayantī gataklamā /
vimānasthā śubhā bhāsi sahasraguṇamojasā //

na tvamalpena tapasā dānena niyamena vā /
imaṃ lokamanuprāptā tvaṃ hi tattvaṃ vadasva me //

iti pṛṣṭā sumanayā madhuraṃ cāruhāsinī /
śāṇḍilī nibhṛtaṃ vākyaṃ sumanāmidamabravīt //

nāhaṃ kāṣāyavasanā nāpi valkaladhāriṇī /
na ca muṇḍā ca jaṭilā bhūtvā devatvamāgatā //

ahitāni ca vākyāni sarvāṇi paruṣāṇi ca /
apramattā ca bhartāraṃ kadācinnāhamabravam //

devatānāṃ pitṝṇāṃ ca brāhmaṇānāṃ ca pūjane /
apramattā sadā yuktā śvaśrūśvaśuravartinī //

paiśunye na pravartāmi na mamaitanmano gatam /
advāri na ca tiṣṭhāmi ciraṃ na kathayāmi ca //

asadvā hasitaṃ kiñcidahitaṃ vā'pi karmaṇā /
rahasyamarahasyaṃ vā na pravartāmi sarvathā //

kāryārthe nirgataṃ cāpi bhartāraṃ gṛhamāgatam /
āsanenopasaṃyojya pūjayāmi samāhitā //

yadannaṃ nābhijānāti yadbhojyaṃ nābhinandati /
bhakṣyaṃ vā yadi vā lehyaṃ tatsarvaṃ varjayāmyaham //

kuṭumbārthe samānītaṃ yatkiñcitkāryameva tu /
punarutthāya tatsarvaṃ kārayāmi karomi ca //

agnisaṃrakṣaṇaparā gṛhaśuddhiṃ ca kāraye /
kumārānpālaye nityaṃ kumārīṃ pariśikṣaye //

ātmapriyāṇi hitvā'pi garbhasaṃrakṣaṇe ratā /
bālānāṃ varjaye nityaṃ śāpaṃ kopaṃ pratāpanam //

avikṣiptāni dhānyāni nānnavikṣepaṇaṃ gṛhe / raktavatspṛhaye gehe gāvaḥ sayavasodakāḥ /
samudgamya ca śuddhā'haṃ bhikṣāṃ dadyāṃ dvijātiṣu //

pravāsaṃ yadi me yāti bhartā kāryeṇa kenacit /
maṅgalairbahubhiryuktā bhavāmi niyatā tadā //

añjanaṃ rocanāṃ caiva snānaṃ mālyānulepanam /
prasādhanaṃ ca niṣkrānte nāminandāmi bhartari //

notthāpayāmi bhartāraṃ sukhaṃ suptamahaṃ sadā / ātureṣvapi kāryeṣu tena tuṣyati me manaḥ /
notthāpaye sukhaṃ suptaṃ hyāturaṃ pālaye patim //

nāyāsayāmi bhartāraṃ kuṭumbārthe'pi sarvadā /
guptaguhyā sadā cāsmi susammṛṣṭaniveśanā //

imaṃ dharmapathaṃ nārī pālayantī samāhitā /
arundhatīva nārīṇīsvargaloke mahīyate //
bhīṣma uvāca /

etadākhyāya sā devī sumanāyai tapasvinī /
patidharmaṃ mahābhāgā jagāmādarśanaṃ tadā //

yaścedaṃ pāṇḍavākhyānaṃ paṭhetparvaṇi parvaṇi /
sa devalokaṃ samprāpya nandane sa sukhī vaset //