Mahabharata · Chapter 13.186

yajjñeyaṃ paramaṃ kṛtyamanuṣṭheyaṃ mahātmabhiḥ /
sāraṃ me sarvaśāstrāṇāṃ vaktumarhasyanugrahāt //
bhīṣma uvāca /

śrūyatāmidamatyantaṃ gūḍhaṃ saṃsāramocanam /
śrotavyaṃ ca tvayā samyagjñātavyaṃ ca viśāmpate //

puṇḍarīkaḥ purā vipraḥ puṇyatīrthe japānvitaḥ /
nāradaṃ paripapraccha śreyo yogaparaṃ munim //

nāradaścābravīdenaṃ brahmaṇoktaṃ mahātmanā //

śṛṇuṣvāvahitastāta jñānayogamanuttamam / aprabhūtaṃ prabhūtārthaṃ vedaśāstrārthasaṃyutam /

yaḥ paraḥ prakṛte proktaḥ puruṣaḥ pañcaviṃśakaḥ /
sa eva sarvabhūtātmā nara ityabhidhīyate //

narājjātāni tatvāni nārāṇīti tato viduḥ /
tānyeva cāyanaṃ tasya tena nārāyaṇaḥ smṛtaḥ //

nārāyaṇājjagatsarvaṃ sargakāle prajāyate /
tasminneva punastacca pralaye sampralīyate //

nārāyaṇaḥ paraṃ brahma tatvaṃ nārāyaṇaḥ paraḥ /
parādapi paraścāsau tasmānnāsti parātparaḥ //

vāsudevaṃ tathā viṣṇumātmānaṃ ca tathā viduḥ /
sañjñābhedaiḥ sa evaikaḥ sarvaśāstrābhisaṃskṛtaḥ //

āloḍya sarvaśāstrāṇi vicārya ca punaḥpunaḥ /
idamekaṃ suniṣpannaṃ dhyeyo nārāyaṇaḥ sadā //

tasmāttvaṃ gahanānsarvāṃstyaktvā śāstrārthavistarān /
ananyacetā dhyāyasva nārāyaṇamajaṃ vibhum //

muhūrtimapi yo dhyāyennārāyaṇamatandritaḥ /
so'pi tadgatimāpnoti kiṃ punastatparāyaṇaḥ //

namo nārāyaṇāyeti yo veda brahma śāśvatam /
antyakāle japanneti tadviṣṇoḥ paramaṃ padam //

śravaṇānmananāccaiva gītistutyarcanādibhiḥ /
ārādhyaṃ sarvadā brahma puruṣeṇa hitaiṣiṇā //

lipyate na sa pāpena nārāyaṇaparāyaṇaḥ /
punāti sakalaṃ lokaṃ sahasrāṃśurivoditaḥ //

brahmacārī gṛhastho'pi vānaprastho'tha bhikṣukaḥ /
keśavārādhanaṃ hitvā naiva yāti parāṃ gatim //

janmāntarasahasreṣu durlabhā tadgatā matiḥ /
tadbhaktavatsalaṃ devaṃ samarādhaya suvrata //

nāradenaivamuktastu sa vipro'bhyarcayaddharim /
svapno'pi puṇḍarīkākṣaṃ śaṅkhacakragadādharam //

kirīṭakuṇḍaladharaṃ lasacchrīvatsakaustubham /
taṃ dṛṣṭvā devadeveśaṃ prāṇamatsambhramānvitaḥ //

atha kālena mahatā tathā pratyakṣatāṃ gataḥ /
saṃstutaḥ stutibhirvedairdevagandharvakinnaraiḥ //

atha tenaiva bhagavānātmalokamadhokṣajaḥ /
gataḥ samprajitaḥ sarvaiḥ sa yoginilayo hariḥ //

tasmāttvamapi rājendra tadbhaktastatparāyaṇaḥ /
arcayitvā yathāyogaṃ bhajasva puruṣottamam //

ajaramamaramekaṃ dhyeyamādyantaśūnyaṃ saguṇamaguṇamādyaṃ sthūlamatyantasūkṣmam /
nirupamamupameyaṃ yogivijñānagamyaṃ tribhuvanagurumīśaṃ samprapadyasva viṣṇum //