Mahabharata · Chapter 13.184

evamuktaḥ sa bhagavānmaitreyaṃ pratyabhāṣata / diṣṭyaitattvaṃ vijānāsi diṣṭyā te buddhirīdṛśī?

loko hyayaṃ guṇāneva bhūyiṣṭhaṃ sampraśaṃsati /
rūpamāno vayomāno dhanavidyāmadastathā //

diṣṭyā nābhibhavanti tvāṃ daivaste'yamanugrahaḥ /
tatte bahuguṇaṃ dānaṃ vartayiṣyāmi tacchṛṇu //

yānīhāgamaśāstrāṇi yāśca kāścitprivṛttayaḥ / tāni vedaṃ puraskṛtya pravṛttāni yathākramam /

ahaṃ dānaṃ praśaṃsāmi bhavānapi tapaḥśruteḥ /
tapaḥ pavitraṃ vedasya tapaḥ svargasya sādhanam //

tapasā mahadāpnoti vidyayā ceti naḥ śrutam /
tapasaiva cāpanudedyaccānyadapi duṣkṛtam //

yadyaddhi kiñcitsandhāya puruṣastapyate tapaḥ /
sarvametadavāpnoti brāhmaṇo vedapāragaḥ //

duranvayaṃ duṣpradharṣaṃ durāpaṃ duratikramam /
sarvaṃ vai tapasā'bhyoti tapo hi balavattaram //

surāpaḥ svarṇahārī ca bhrūṇahā gurutalpagaḥ /
tapasā tarate sarvamenasaśca pramucyate //

sarvo vaidyastu cakṣuṣmānapi yādṛśatādṛśaḥ /
tapasvinaṃ tathaivāhustābhyāṃ kāryaṃ satāṃ matam //

sarve pūjyāḥ śrutadhanāstathaiva ca tapasvinaḥ /
dānapradāḥ sukhaṃ pretya prāpnuvantīha ca śriyam //

imaṃ ca brahmalokaṃ ca lokaṃ ca balavattaram /
annadānaiḥ sukṛtinaḥ pratipadyanti laukikam //

pūjitāḥ pūjayantyete mānitā mānayanti ca /
sa dātā yatra yatraiti sarvataḥ sampraṇūyate //

akartā caiva kartā ca labhate yasya yādṛśam /
yadi cordhvaṃ yadyadho vā svānlokānabhiyāsyati //

prāpsyasi tvannapānāni yāni dāsyasi karhicit /
medhāvyasi kule jātaḥ śrutavānanṛśaṃsavān //

kaumāradāro vratavānmaitreya nirato bhava /
[etadgṛhāṇa prathamaṃ praśastaṃ gṛhamedhinām //

yo bhartā vāsitātuṣṭo bhartustuṣṭā ca vāsitā /
yasminnevaṃ kule sarvaṃ kalyāṇaṃ tatra vartate //

adbhirgātrānmalamiva tamo'gniprabhayā yathā.] dānena tapasā caiva viṣṇorabhyarcanena ca /
brāhmaṇaḥ sa mahābhāga taretsaṃsārasāgarāt //

svakarmaśuddhasattvānāṃ tapobhirnirmalātmanām /
vidyayā gatamohānāṃ tāraṇāya hariḥ smṛtaḥ //

tadarcanaparo nityaṃ tadbhaktastaṃ namaskuru /
tadbhaktā na vinaśyanti hyaṣṭākṣaraparāyaṇāḥ //

praṇavopāsanaparāḥ paramārthiparāstviha / etaiḥ pāvaya cātmānaṃ sarvapāpamapohya ca //

svasti prāpnuhi maitreya gṛhānsādhu vrajāmyaham /
etanmanasi kartavyaṃ śreya evaṃ bhaviṣyati //

taṃ praṇamyātha maitreyaḥ kṛtvā cāpi pradakṣiṇam /
svasti prāpnotu bhagavānityuvāca kṛtāñjaliḥ //