Mahabharata · Chapter 13.183

evamuktaḥ pratyuvāca maitreyaḥ karmapūrvakaḥ /
atyantaṃ śrīmati kule jātaḥ prājño bahuśrutaḥ //

asaṃśayaṃ mahāprājña yathaivāttha tathaiva tat /
anujñātaśca bhavatā kiñcidbrūyāmahaṃ vibho //
vyāsa uvāca /

yadyadicchasi maitreya yāvadyāvadyathāyathā /
brūhi tatvaṃ mahāprājña śuśruṣe vacanaṃ tava //
maitreya uvāca /

nirdoṣaṃ nirmalaṃ caiva vacanaṃ satyasaṃhitam /
vidyātapobhyāṃ hi bhavānbhāvitātmā na saṃśayaḥ //

bhavato bhāvitātmatvāllābho'yaṃ sumahānmama /
bhūyo buddhyā'nupaśyāmi susamṛddhatapā iva //

api me darśanādeva bhavato'bhyudayo mahān /
manye bhavatprasādo'yaṃ buddhikarmasvabhāvataḥ //

tapaḥ śrutaṃ ca yoniścāpyetadbrāhmaṇyakāraṇam /
tribhirguṇaiḥ samuditaḥ snāto bhavati vai dvijaḥ //

asmiṃstṛpte ca tṛpyanti pitaro daivatāni ca /
na hi śrutavatāṃ kiñcidadhikaṃ brāhmaṇādṛte //

asaṃskārātkṣatravaiśyau naśyete brāhmaṇādṛte / śūdro naśyatyaśuśrūṣurāśramāṇāṃ yathārhataḥ //

[andhaṃ syāttama evedaṃ na prajñāyeta kiñcana / cāturvarṇyaṃ na varteta dharmādharmāvṛtānṛte // ]

yathāhi sukṛte kṣetre phalaṃ vindati mānavaḥ /
evaṃ dattvā śrutavate phalaṃ dātā samaśnute //

brāhmaṇaścenna vindeta śrutavṛttopasaṃhitaḥ /
pratigrahītā dānasya moghaṃ syāddhanināṃ dhanam //

annaṃ hyavidvānhantyevamavidvāṃsaṃ ca hanti tat /
taccānyaṃ hanti yaccānyatsa bhuktvā hanyate'budhaḥ //

prāhurhyannamadanvidvānpunarjanayatīśvaraḥ /
sa cānnājjāyate tasmātsūkṣma eṣa vyatikramaḥ //

brāhmaṃ hyanupayogī yo dadaṃścānnamasaṃśayam / yastārayati vai vidvānpitṝndevānsadā'mṛtān

yadeva dadataḥ puṇyaṃ tadeva pratigṛhṇataḥ /
na hyekacakraṃ varteta ityevamṛṣayo viduḥ //

yatra vai brāhmaṇāḥ santi śrutavṛttopasaṃhitāḥ /
tatra dānaphalaṃ puṇyamiha cāmutra cāśnute //

ye yoniśuddhāḥ satataṃ tapasyabhiratā bhṛśam /
dānādhyayanasampannāste vai pūjyatamāḥ sadā //

tairhi sadbhiḥ kṛtaḥ panthā devayāno na muhyate /
te hi svargasya netāro yajñavāhāḥ sanātanāḥ //