Mahabharata · Chapter 13.172

śaratalpagataṃ bhīṣmaṃ vṛddhaṃ kurupitāmaham /
upagamya mahāprājñaḥ paryapṛcchadyudhiṣṭhiraḥ //

aṅgānāṃ rūpasaubhāgyaṃ priyaṃ caiva kathaṃ bhavet /
dharmārthakāmasaṃyuktaḥ sukhabhāgī kathaṃ bhavet //
bhīṣma uvāca /

mārgaśīrṣasya māsasya candre mūlena saṃyute /
pādau mūlena rājendri jaṅghāyāmatha rohiṇīm //

aśvinyāṃ sakthinī caiva ūrū cāṣāḍhayostathā /
guhyaṃ tu phālgunī vidyātkṛttikā kaṭikāstathā //

nābhiṃ bhādrapade vidyādrevatyāmakṣimaṇḍalam /
pṛṣṭhameva dhaniṣṭhāsu anurādhottarāstathā //

bāhubhyāṃ tu viśākhāsu hastau hastena nirdiśet /
punarvasvaṅgulī rājannāśleṣāsu nakhāstathā //

grīvāṃ jyeṣṭhā ca rājendra śravaṇena tu karṇayoḥ /
mukhaṃ puṣyeṇa dānena dantoṣṭhau svātirucyate //

hāsaṃ śatabhiṣāṃ caiva maghāṃ caivātha nāsikām /
netre mṛgaśiro vidyāllalāṭe mitrameva tu //

bharaṇyāṃ tu śiro vidyātkeśānārdrāṃ narādhipa /
samāpte tu ghṛtaṃ dadyādbrāhmaṇe vedapārage //

subhago darśanīyaśca jñānabhāgyatha jānate / jāyate paripūrṇāṅgaḥ paurṇamāsyeva candramāḥ // ] //