Mahabharata · Chapter 13.171

sarveṣāmupavāsānāṃ yacchreyaḥ sumahatphalam /
yaccāpyasaṃśayaṃ loke tanme tvaṃ vaktumarhasi //
bhīṣma uvāca /

śṛṇu rājanyathā gītaṃ svayameva svayambhuvā /
yatkṛtvā nirvṛto bhūyātpuruṣo nātra saṃśayaḥ //

dvādaśyāṃ mārgaśīrṣe tu ahorātreṇa keśavam /
arcyāśvamedhaṃ prāpnoti duṣkṛtaṃ cāsya naśyati //

tathaiva pauṣamāse tu pūjyo nārāyaṇeti ca /
vājapeyamavāpnoti siddhiṃ ca paramāṃ vrajet //

ahorātreṇa dvādaśyāṃ māghamāse tu māghavam /
rājasūyamavāpnoti kulaṃ caiva samuddharet //

tathaiva phālgune māsi govindeti ca pūjayan /
atirātramavāpnoti somalokaṃ ca gacchati //

ahorātreṇa dvādaśyāṃ caitre viṣṇuriti smaran /
pauṇḍarīkamavāpnoti devalokaṃ ca gacchati //

vaiśākhamāse dvādaśyāṃ pūjayanmadhusūdanam /
agniṣṭomamavāpnoti somalokaṃ ca gacchati //

ahorātreṇa dvādaśyāṃ jyeṣṭhe māsi trivikramam /
gavāṃ medhamavāpnoti apsarobhiśca modate //

āṣāḍhe māsi dvādaśyāṃ vāmaneti ca pūjayan /
naramedhamavāpnoti puṇyaṃ ca labhate mahat //

ahorātreṇa dvādaśyāṃ śrāvaṇe māsi śrīdharam /
pañcayajñānavāpnoti vimānasthaśca modate //

tathā bhādrapade māsi hṛṣīkeśeti pūjayan /
sautrāmaṇimavāpnoti pūtātmā bhavate ca hi //

dvādaśyāmāśvine māsi padmanābheti cārcayan /
gosahasraphalaṃ puṇyaṃ prāpnuyānnātra saṃśayaḥ //

dvādaśyāṃ kārtike māsi pūjyo dāmodareti ca /
gavāṃ yajñamavāpnoti pumānstrī vā na saṃśayaḥ //

arcayetpuṇḍarīkākṣamevaṃ saṃvatsaraṃ tu yaḥ /
jātismaratvaṃ prāpnoti vindyādbahu suvarṇakam //

ahanyahani tadbhāvamupendraṃ yo'dhigacchati /
samāpte bhojayedviprānathavā dāpayeddhṛtam //

ataḥ paraṃ nopavāso bhavatīti viniścayaḥ // uvāca bhagavānviṣṇuḥ svayameva purātanam // ] //