Mahabharata · Chapter 13.170
yadvaraṃ sarvatīrthānāṃ tadbravīhi pitāmaha /
yatra caiva paraṃ śaucaṃ tanme vyākhyātumarhasi //
bhīṣma uvāca /
sarvāṇi khalu tīrthāni guṇavanti manīṣiṇaḥ /
yattu tīrthaṃ ca śaucaṃ ca tanme śṛṇu samāhitaḥ //
agādhe vimale śuddhe satyatīrthe dhṛtihrade /
snātavyaṃ mānase tīrthe satvamālambya śāśvatam //
tīrthaśaucaṃ tapo jñānaṃ mārdavaṃ satyamārjavam /
ahiṃsā sarvabhūtānāmānṛśaṃsyaṃ damaḥ śamaḥ //
nirmamā nirahaṅkārā nirdvandvā niṣparigrahāḥ /
yoginastīrthabhūtāste tīrthaṃ paramamucyate //
nārāyaṇe'tha rudre vā bhaktistīrthaṃ paraṃ matam /
śaucalakṣaṇametatte sarvatraivānvavekṣataḥ //
rajastamaḥsatvamatho yeṣāṃ nirdhūtamātmanā / tīrthamācāraśuddhiśca svamārgaparimārgaṇam /
sarvatyāgeṣvabhiratāḥ sarvajñāḥ samadarśinaḥ /
śaucaṣveteṣvabhiratāste tīrthaśucayo'pi ca //
nodakaklinnagātrastu snāta ityabhidhīyate /
sa snāto yo damasnātaḥ sa bāhyābhyantaraḥ śuciḥ //
adṛṣṭeṣvanapekṣā ye prāpteṣvartheṣu nirmamāḥ /
śaucameva paraṃ teṣāṃ yeṣāṃ notpadyate spṛhā //
prajñānaṃ śaucameveha śarīrasya viśeṣataḥ /
tathā niṣkiñcanatvaṃ ca manasaśca prasannatā //
vṛttaṃ śaucaṃ mahāśaucaṃ tīrthaśaucamataḥ param /
jñānotpannaṃ ca yacchaucaṃ tacchaucaṃ paramaṃ smṛtam //
manasā ca pradīptena brahmajñānajalena ca /
snātā ye mānase tīrthe tajjñāḥ kṣetrajñadarśanāḥ //
samāropitaśaucastu nityaṃ bhavasamanvitaḥ /
kevalaṃ guṇasampannaḥ śucireva naraḥ sadā //
śarīrasthāni tīrthāni proktānyetāni bhārata /
pṛthivyāṃ yāni tīrthāni puṇyāni śṛṇu tānyapi //
śarīrasya yathoddeśaḥ śarīropari nirmitāḥ /
tathā pṛthivyā bhāgāśca puṇyāni salilāni ca //
kīrtanāccaiva tīrthasya snānācca pitṛtarpaṇāt / śodhyaṃ hi pātakaṃ tīrthe pūtā yānti sukhaṃ divam /
parigrahācca sādhūnāṃ pṛthivyāścaiva tejasā /
atīva puṇyabhāgāste salilasya ca tejasā //
manasaśca pṛthivyāśca puṇyāstīrthāstathāpare /
ubhayoreva yaḥ snāyātsa siddhiṃ śīghramāpnuyāt //
yathā phalaṃ kriyāhīnaṃ kriyā vā phalavarjitā /
neha sādhayate kāryaṃ samāyuktā tu sidhyati //
evaṃ śarīraśaucena tīrthaśaucena cānvitaḥ /
śuciḥ siddhimavāpnoti dvividhaṃ śaucamuttamam //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0