Mahabharata · Chapter 13.157

kathaṃ vai sa vipannaśca kathaṃ vai pātito bhuvi /
kathaṃ devendratāṃ prāptastadbhavānvaktumarhati //
bhīṣma uvāca /

evaṃ tayoḥ saṃvadatoḥ kriyāstasya mahātmanaḥ /
sarvā eva pravartante yā divyā yāśca mānuṣāḥ //

tathaiva dīpadānāni sarvopakaraṇāni vai /
balikarma ca yaccānyadvatsakāśca pṛthagvidhāḥ //

sarvāstasya samutpannā devendrasya mahātmanaḥ /
devaloke nṛloke ca sadācārapuraskṛtāḥ //

tāścodbhavanti rājendra samṛddhyai gṛhamedhinaḥ /
dhūpapradānairdīpaiśca namaskāraistathaiva ca //

yathā siddhasya cānnasya gṛhya cāgraṃ pradīyate /
balayaśca gṛhoddeśe tataḥ prīyanti devatāḥ //

yathā ca gṛhiṇastoṣo bhavedvai balikarmaṇi /
tathā śataguṇā prītirdevatānāṃ prajāyate //

evaṃ dhūpapradānaṃ ca dīpadānaṃ ca sādhavaḥ /
prayacchati namaskārairyuktamātmaguṇāvaham //

snānenādbhiśca yatkarma kriyate vai vipaścitā /
namaskāraprayuktena tena prīṇanti devatāḥ //

pitaraśca mahābhāgā ṛṣayaśca tapodhanāḥ /
gṛhyāśca devatāḥ sarvāḥ prīyante vidhinā'rcitāḥ //

ityetāṃ buddhimāsthāya nahuṣaḥ sa nareśvaraḥ /
surendratvaṃ mahatprāpya kṛtavānetadadbhutam //

kasya cittvatha kālasya bhāgyakṣaya upasthite /
sarvametadavajñāya na cakāra yathāvidhi //

tataḥ sa parihīṇo'bhūtsurendro baladarpataḥ / dhūpadīpādikavidhiṃ na yathāvaccakāra ha /
tato'sya yajñaviṣayo rakṣobhiḥ paribādhyate //

athāgastyamṛṣiśreṣṭhaṃ vāhanāyājuhāva ha /
drutaṃ sarasvatīkūlātsmayanniva mahābalaḥ //

tato bhṛgurmahātejā maitrāvaruṇimabravīt / nimīlayasva nayane jaṭāṃ yāvadviśāmi te /
surendrapatanāyeti sa ca netra nyamīlayat //

tato'gastyasyātha jaṭāṃ dṛṣṭvā prāviśadacyutaḥ /
bhṛguḥ sa sumahātejāḥ pātanāya nṛpasya ca //

tataḥ sa devarāṭ prāptastamṛṣiṃ vāhanāya vai / tato'gastyaḥ surapatiṃ vākyamāha viśāmpate /
yojayasveti māṃ kṣipraṃ kaṃ ca deśaṃ vahāmi te //

yatra vakṣyasi tatra tvāṃ nayiṣyāmi surādhipa /
ityukto narahuṣastena yojayāmāsa taṃ munim //

bhṛgustasya jaṭāntastho babhūva hṛṣito bhṛśam / na cāpi darśanaṃ tasya cakāra sa bhṛgustadā /
varadānaprabhāvajño nahuṣasya mahātmanaḥ //

na cukopa tadā'gastyo yukto'pi nahuṣeṇa vai / taṃ tu rājā padaikena codayāmāsa bhārata /
śrutiḥ smṛtiḥ pramāṇaṃ vā netivādena devarāṭ //

na cukopa sa dharmātmā tataḥ pādena devarāṭ /
agastyasya tadā kruddho vāmenābhyahanacchiraḥ //

tasmiñśirasyabhihate sa jaṭāntargato bhṛguḥ /
śaśāpa balavatkruddho nahuṣaṃ pāpacetasam //

yasmātpadā'vadhīḥ krodhācchirasīmaṃ mahāmunim /
tasmādāśu mahīṃ gaccha sarpo bhūtvā sudurmate //

śapto'tha sa tadā tena sarpo bhūtvā papāta ha /
adṛṣṭenātha bhṛguṇā bhūtale bharatarṣabha //

bhṛguṃ hi yadi so'drākṣīnnahuṣaḥ pṛthivīpate /
sa śaktonā'bhaviṣyadvai pātane tasya tejasā //

sa tu taistaiḥ pradānaiśca tapobhirniyamaistathā /
patito'pi mahārāja bhūtale smṛtimānabhūt //

prasādayāmāsa bhṛguṃ śāpānto me bhavediti / tato'gastyaḥ kṛpāviṣṭaḥ prāsādayata taṃ bhṛgum /
śāpāntārthaṃ mahārāja sa ca prādātkṛpānvitaḥ //
bhṛguruvāca /

rājā yudhiṣṭhiro nāma bhaviṣyati kurūdvahaḥ /
sa tvāṃ mokṣayitā śāpādityuktvā'ntaradhīyata //

agastyo'pi mahātejāḥ kṛtvā kāryaṃ śatakratoḥ /
svamāśramapadaṃ prāyātpūjyamāno dvijātibhiḥ //

nahuṣo'pi tvayā rājaṃstasmācchāpātsamuddhṛtaḥ /
jagāma brahmabhavanaṃ paśyataste janādhipa //

tadā sa pātayitvā taṃ nahuṣaṃ bhūtale bhṛguḥ /
jagāma brahmabhavanaṃ brahmaṇe ca nyavedayat //

tataḥ śakraṃ samānāyya devānāha pitāmahaḥ / varadānānmama surā nahuṣo rājyamāptavān /
sa cāgastyena kruddhena bhraṃśito bhūtalaṃ gataḥ //

na ca śakyaṃ vinā rājñā sukhaṃ vartayituṃ kvacit /
tasmādayaṃ punaḥ śakro devarājye'bhiṣicyatām //

evaṃ sambhāṣamāṇaṃ tu devāḥ pārtha pitāmaham /
evamastviti saṃhṛṣṭāḥ pratyūcustaṃ narādhipa //

so'bhiṣikto bhagavatā devarājye ca vāsavaḥ /
brahmaṇā rājaśārdūla yathāpūrvaṃ vyarocata //

evametatpurāvṛttaṃ nahuṣasya vyatikramāt /
sa ca taireva saṃsiddho nahuṣaḥ karmabhiḥ punaḥ //

tasmāddīpāḥ pradātavyāḥ sāyaṃ vai gṛhamedhibhiḥ / divyaṃ cakṣuravāpnoti pretya dīpasya dāyakaḥ /
pūrṇacandrapratīkāśā dīpadāśca bhavantyuta //

yāvadakṣinimeṣāṇi jvalante tāvatīḥ samāḥ /
rūpavānbalavāṃścāpi naro bhavati dīpadaḥ //

ya idaṃ śṛṇuyādvāpi paṭhate yo dvijottamaḥ /
brahmalokamavāpnoti sa ca vai nātra saṃśayaḥ //