Mahabharata · Chapter 13.158

brāhmaṇasvāni ye mandā haranti bharatarṣabha /
nṛśaṃsakāriṇo yoniṃ kāṃ te gacchanti mānavāḥ //
bhīṣya uvāca /

pātakānāṃ paraṃ hyetadbrahmasvaharaṇaṃ balāt /
sānvayāste vinaśyanti caṇḍālāḥ pretya ceha ca //

atrāpyudāharantīmamitihāsaṃ purātanamam /
caṇḍālasya ca saṃvādaṃ kṣatrabandhośca bhārata //
rājovāca /

vṛddharūpo'si caṇḍāla bālavacca viceṣṭase /
śvakharāṇāṃ rajaḥsevī kasmādudvijase gavām //

sādhubhirgarhitaṃ karma caṇḍālasya vidhīyate /
kasmādgorajasā dhvastamaṅgaṃ toyena siñcasi //
caṇḍāla uvāca /

brāhmaṇasya gavāṃ rājanprayāntīnāṃ rajaḥ purā /
somamuddhvaṃsayāmāsa taṃ somamapibandvijāḥ //

bhṛtyānāmapi rājñastu rajasā dhvaṃsitaṃ makhe /
tatpānācca dvijāḥ sarve kṣipraṃ narakamāviśan //

dīkṣitaśca sa rājā'pi kṣipraṃ narakamāviśat /
saha tairyājakaiḥ sarvairbrahmasvamupajīvya tat //

ye'pi tatrāpibankṣīraṃ ghṛtaṃ dadhi ca mānavāḥ /
brāhmaṇāḥ saharājanyāḥ sarve narakamāviśan //

jaghnustāḥ payasā putrāṃstathā pautrānvidhūya tān /
paśūnavekṣamāṇaśca sādhuvṛttena dampatī //

ahaṃ tatrāvasaṃ rājanbrahmacārī jitendriyaḥ / tāsāṃ me rajasā dhvastaṃ bhaikṣamāsīnnarādhipa

caṇḍālo'haṃ tato rājanbhuktvā tadabhavaṃ nṛpa /
brahmasvahārī na nṛpaḥ so'pratiṣṭhāṃ gatiṃ yayau //

tasmāddharenna viprasvaṃ kadācidapi kiñcana /
na paśyennānumodecca na hartuṃ kiñcidāharet //

brahmasvaṃ rajasā dhvastaṃ bhuktvā māṃ paśya yādṛśam /
tasmātsomo'pyavikreyaḥ puruṣeṇa vipaścitā //

etaddhi dhanamutkṛṣṭaṃ dvijānāmaviśeṣataḥ /
vikrayaṃ tviha somasya garhayanti manīṣiṇaḥ //

ye cainaṃ krīṇate tāta ye ca vikrīṇate janāḥ /
te tu vaivasvataṃ prāpya rauravaṃ yānti sarvaśaḥ //

somaṃ tu rajasā dhvastaṃ vikrīṇanvidhipūrvakam /
śrotriyo vārdhuṣī bhūtvā naciraṃ sa vinaśyati //

narakaṃ triṃśataṃ prāpya svaviṣṭhāmupajīvati / brahmasvahārī narakānyātanāścānubhūya tu /
maleṣu ca kṛmirbhūtvā śvaviṣṭhāmupajīvatī //

śvacaryāmatimānaṃ ca sakhidāreṣu viplavam /
tulayādhārayaddharmo hyatimāno'tiricyate //

mlānaṃ māṃ vikalaṃ paśya vivarṇaṃ hariṇaṃ kṛśam /
atimāneni māṃ paśya pāpāṃ gatimupāgatam //

ahaṃ vai vipule tāta kule danasamanvite /
paurāṇe janmani vibho jñānavijñānapāragaḥ //

abhavaṃ tatra jānāno hyetāndoṣānmadātsadā /
saṃrabdha eva bhūtānāṃ pṛṣṭhamāṃsamabhakṣayam //

so'haṃ vai viditaḥ sarvairdūrago vanino vane / sādhūnāṃ paribhāvepsurviprāṇāṃ garvito dhanaiḥ /
imāmavasthāṃ samprāptaḥ paśya kālasya paryayam //

ādīptamiva cailāntaṃ bhramarairiva cārditam /
dhāvamānaṃ susaṃrabdaṃ phaśya māṃ rajasā'nvitam //

svādhyāyaistu mahātpāpaṃ haranti gṛhamedhinaḥ /
dānaiḥ pṛthagvidhaiścāpi viprajātyāṃ manīṣiṇaḥ //

tathā pāpakṛtaṃ vipramāśramastaṃ mahīpate /
sarvasaṅgavinirmuktaṃ chandāṃsyuttārayantyuta //

ahaṃ hi pāpayonyāṃ vai prasūtaḥ kṣatriyarṣabha /
niścayaṃ nādhigacchāmi kathaṃ mucyeyamityuta //

jātismaratvaṃ ca mama kenacitpūrvakarmaṇā /
śubhane yena mokṣaṃ vai prāptumicchāmyahaṃ nṛpa //

tvamimaṃ samprapannāya saṃśayaṃ brūhi pṛcchate /
caṇḍālatvātkathamahaṃ mucyeyamiti sattama //
rājovāca /

caṇḍāla pratijānīhi yena mokṣamavāpsyasi /
brāhmaṇārthe tyajanprāṇāngatimiṣṭāmavāpsyasi //

dattvā śarīraṃ kravyādbhyo raṇāgnau dvijahetukam /
hitvā prāṇānpramokṣaste nānyathā mokṣamarhasi //
bhīṣma uvāca /

ityuktaḥ sa tadā tena brahmasvārthe parantapa /
hitvā raṇamukhe prāṇāngatimiṣṭāmavāpa ha //

tasmādrakṣyaṃ tvayā putra brahmasvaṃ bharatarṣabha /
yadīcchasi mahābāho śāśvatīṃ gatimātmanaḥ //