Mahabharata · Chapter 13.156

śrutaṃ me bharataśreṣṭha puṣpadhūpapradāyinām /
phalaṃ balividhāne ca tadbhūyo vaktumarhasi //

dhūpapradānasya phalaṃ pradīpasya tathaiva ca /
balayaśca kimarthaṃ vai kṣipyante gṛhamedhibhiḥ //
bhīṣma uvāca /

atrāpyudāharantīmamitihāsaṃ purātanam /
nahuṣasya ca saṃvādamagastyasya bhṛgostatā //

nahuṣo hi mahārāja rājarṣiḥ sumahātapāḥ /
devarājyamanuprāptaḥ sukṛteneha karmaṇā //

tatrāpi prayato rājannahuṣastridive vasan /
mānuṣīścaiva divyāśca kurvāṇo vividhāḥ kriyāḥ //

mānuṣyastatra sarvāḥ sma kriyāstasya mahātmanaḥ /
pravṛttāstridive rājandivyāścaiva sanātanāḥ //

agnikāryāṇi samidhaḥ kuśāḥ sumanasastathā /
balayaścānnalājābhirdhūpanaṃ dīpakarma ca //

sarvaṃ tasya gṛhe rājñaḥ prāvartata mahātmanaḥ /
japayajñānmanoyajñāṃstridive'pi cakāra saḥ //

devānabhyarcayaccāpi vidhivatsa sureśvaraḥ /
sarvāneva yathānyāyaṃ yathāpūrvamarindama //

athenadro'hamiti jñātvā ahaṅkāraṃ samāviśat /
sarvāścaiva kriyāstasya paryahīyanta bhūpateḥ //

saptarṣīnvāhayāmāsa varadānadamānvitaḥ /
parihīnakriyaścaiva durbalatvamupeyivān //

tasya vāhayataḥ kālo munimukhyāṃstapodhanān /
ahaṅkārābhibhūtasya sumahānatyavartata //

atha paryāyaśaḥ sarvānvāhanāyopacakrame /
paryāyaścāpyagastyasya samapadyata bhārata //

athāgatya mahātejā bhṛgurbrahmavidāṃvaraḥ /
agastyamāśramasthaṃ vai samupetyedamabravīt //

evaṃ vayamasatkāraṃ devendrasyāsya durmateḥ /
nahuṣasya kimarthaṃ vai marṣayāma mahāmune //
agastya uvāca /

kathameṣa mayā śakyaḥ śaptuṃ yasya mahāmune /
varadena varo datto bhavato viditaśca saḥ //

yo me dṛṣṭipathaṃ gacchetsa me vaśyo bhavediti /
ityanena varaṃ devo yācito gacchatā divam //

evaṃ na dagdhaḥ sa mayā bhavatā ca na saṃśayaḥ /
anyenāpyṛṣimukhyena na dagdho na ca pātitaḥ //

amṛtaṃ caiva pānāya dattamasmai purā vibho /
mahātmanā tadartaṃ ca nāsmābhirvinipātyate //

prāyacchata varaṃ devaḥ prajānāṃ duḥkhakāraṇam /
dvijeṣvadharmayuktāni sa karoti narādhamaḥ //

tatra yatprāptakālaṃ nastadbrū vadatāṃvara /
bhavāṃścāpi yathā brūyāttatkartāsmi na saṃśayaḥ //
bhṛguruvāca /

pitāmahaniyogena bhavantaṃ so'hamāgataḥ /
pratikartuṃ balavati nahuṣe darpamohite //

adya hi tvāṃ sudurbuddhī rathe yokṣyati devarāṭ /
adyainamahamudvṛttaṃ kariṣye'nindramojasā //

adyendraṃ sthāpayiṣyāmi paśyataste śatakratum / sañcālya pāpakarmāṇamaindrātsthānātsudurmatim /

adya cāsau kudevendrastvāṃ padā dharṣayiṣyati /
daivopahatacittatvādātmanāśāya mandadhīḥ //

vyutkrāntadharmaṃ tamahaṃ dharṣaṇāmarṣito bhṛśam /
ahirbhavasveti ruṣā śapsye pāpaṃ dvijadruham //

tata enaṃ sudurbuddhiṃ dhikśabdābhihatatviṣam /
dharaṇyāṃ pātayiṣyāmi paśyataste mahāmune //

nahuṣaṃ pāpakarmāṇamaiśvaryabalamohitam /
yathā ca rocate tubhyaṃ tathā kartāsmyahaṃ mune //

evamuktastu bhṛguṇā maitrāvaruṇiravyayaḥ /
agastyaḥ paramaprīto babhūva vigatajvaraḥ //