Mahabharata · Chapter 13.153

keṣāṃ devā mahābhāgāḥ sannamante mahātmanām /
loke'smiṃstanṛṣīnsarvañśrotumicchāmi sattama //
bhīṣma uvāca /

itihāsamimaṃ viprāḥ kīrtayanti purāvidaḥ /
asminnarthe mahāprājñāstaṃ nibodha yudhiṣṭhira //

vṛtraṃ hatvā'pyupāvṛttaṃ tridaśānāṃ puraskṛtam /
mahendramanusamprāptaṃ stūyamānaṃ maharṣibhiḥ //

śriyā paramayā yuktaṃ rathasthaṃ harivāhanam /
mātaliḥ prāñjalirbhūtvā devamindramughāca ha //

namaskṛtānāṃ sarveṣāṃ bhagavaṃstvaṃ puraskṛtaḥ /
yeṣāṃ loke namaskuryāttānbravītu bhavānmama //

tasya tadvacanaṃ śrutvā devarājaḥ śacīpatiḥ /
yantāraṃ paripṛcchantaṃ tamindraḥ pratyuvāca saḥ //

dharmaṃ cārthaṃ ca kāmaṃ ca yeṣāṃ cintayatāṃ matiḥ /
nādharme vartate nityaṃ tānnamasyāmi mātale //

ye rūpaguṇasampannāḥ pramadāhṛdayangamāḥ /
nivṛttāḥ kāmabhogeṣu tānnamasyāmi mātale //

sveṣu bhogeṣu santuṣṭāḥ suvāco vacanakṣamāḥ /
amānakāmāścārghārhāstānnamasyāmi mātale //

dhanaṃ vidyāstathaiśvaryaṃ yeṣāṃ na calayenmatim /
calitāṃ ye nigṛhṇanti tānnityaṃ pūjayāmyaham //

iṣṭairdārairupetānāṃ śucīnāmagnihotriṇām /
catuṣpādakuṭumbānāṃ mātile praṇamāmyaham //

mahatastapasā prāptau dhanasya vipulasya ca /
katyāgastasya na vai kāryo yo'tmānaṃ nāvabudhyate //

yeṣāmarthastathā kāmo dharmamūlavivardhitaḥ /
dharmārthau tasya niyatau tānnamasyāmi mātale //

dharmamūlārthakāmānāṃ brāhmaṇānāṃ gavāmapi //
pativratānāṃ nārīṇāṃ praṇāmaṃ prakaromyaham //

ye bhuktvā mānuṣānbhogānpūrve vayasi mātale /
tapasā svargamāyānti śaśvattānpūjayāmyaham //

asambhogānnacāsaktāndharmanityāñjitendriyān /
sannyastānacalaprakhyānmanasā pūjayāmi tān //

jñānaprasannavidyānāṃ nirūḍhaṃ dharmamīpsitam /
paraiḥ kīrtitaśaucānāṃ mātale tānnamāmyaham //