Mahabharata · Chapter 13.152

evaṃ sa bhikṣurnirvāṇaṃ prāpnuyāddagdhakilbiṣaḥ /
ihastho dehamutsṛjya nīḍaṃ śakunivadyathā //

satpathālambanādeva śūdraḥ prāpnoti sadgatim /
brahmaṇaḥ sthānamacalaṃ sthānātsthānamavāpnuyāt //

yathā khanankhanitreṇa jāṅgale vāri vindati /
anirvedāttataḥ sthānamīpsitaṃ pratipadyate //

saiṣā gatiranādyantā sarvairapyupadhāritā / tasmācchūdrairanirvedācchraddadhānaistu nityadā /
vartitavyaṃ yathāśaktyā yathā proktaṃ manīṣibhiḥ /

yatkaroti tadaśnāti śubhaṃ vā yadi vā'śubham /
nākṛtaṃ bhujyate karma na kṛtaṃ naśyate phalam //

tathā śubhasamācāraḥ śubhamevāpnute phalam / tathā'śubhasamācāro hyaśubhaṃ samavāpnute /
śubhānyeva samādadyādya icchedbhūtimātmanaḥ //

bhūtiśca nānyataḥ śaktyā śūdrāṇāmiti niścayaḥ /
krate yatīnāṃ śuśrūṣāmiti santo vyavasthitāḥ //

tasmādāgamasampanno bhavetsuniyatendriyaḥ /
śakyate hyāgamādeva gatiṃ prāptumanāmayām //

varā caiṣā gatirdṛṣṭā yāmanvepanti sādhavaḥ /
yatrāmṛtatvaṃ labhate tyaktvā duḥkhamanantaram //

imaṃ hi dharmimāsthāya ye'pi syuḥ pāpayonayaḥ / striyo vaiśyāśca śūdrāśca prāpnuyuḥ paramāṃ gatim /
kiṃ punarbrāhmaṇo vidvānkṣatriyo vā bahuśrutaḥ //

na cāpyakṣīṇapāpasya jñānaṃ bhavati dehinaḥ /
jñānopalabdhirbhavati kṛtakṛtyo yadā bhavet //

upalabhya tu vijñānaṃ jñānaṃ vā'pyanasūyakaḥ /
tathaiva vartedguruṣu bhūyāṃsaṃ vā samāhitaḥ //

athāvamanyeta guruṃ tathā teṣu pravartate /
vyarthamasya śrutaṃ bhavati jñānamajñānatāṃ vrajet //

gatiṃ cāpyaśubhāṃ gacchennirayāya na saṃśayaḥ /
prakṣīyate tasya puṇyaṃ jñānamasya virudhyate //

adṛṣṭapūrvakalyāṇo yathā dṛṣṭvā vidhiṃ naraḥ /
utsekānmohamāpadya tatvajñānamavāptavān //

evamevi hi notsekaḥ kartavyo jñānasambhavaḥ /
phalaṃ jñānasya hi śamaḥ praśāmāya yatetsadā //

upaśāntena dāntena kṣamāyuktena sarvadā /
śuśrūṣā pratipattavyā nityamevānasūyatā //

dhṛtyā śiśnodaraṃ rakṣetpāṇipādaṃ ca cakṣuṣā /
indriyārthāṃśca manasā mano buddhau samādadhet //

dhṛtyā'sīta tato gatvā śuddhadeśaṃ susaṃvṛtam /
labdhāsanaṃ yathā dṛṣṭaṃ vidhipūrvaṃ samācaret //

jñānayuktastathā devaṃ hṛdisthamupalakṣayet /
ādīpyamānaṃ vapuṣā vidhūmamanalaṃ yathā //

raśmimantamivādityaṃ vaidyutāgnimivāmbare /
saṃsthitaṃ hṛdaye paśyedīśaṃ śāśvatamavyayam //

na cāyuktena śakyeta draṣṭuṃ dehe maheśvaraḥ /
yuktastu paśyate buddhyā sanniveśya mano hṛdi //

atha tvevaṃ na śaknoti kartuṃ hṛdayadhāraṇam /
yathāsāṃkhyamupāsīta yathāvadyogamāsthitaḥ //

pañca buddhīndriyāṇīha pañca karmendriyāṇi vai /
pañca bhūtaviśeṣāśca manaścaiva tu ṣoḍaśa //

tanmātrāṇyapabi pañcaiva mano'haṅkāra eva ca / aṣṭamaṃ cāpyathāvyaktametāḥ prakṛtisañjñitāḥ /
etāḥ prakṛtayaścāṣṭau vikārāścāpi ṣoḍaśa //

evametadihasthena vijñeyaṃ tatvabuddhinā /
evaṃ varṣma samuttīrya tīrṇo bhavati nānyathā //

parisaṃkhyānamevaitanmantavyaṃ jñānabuddhinā //

ahanyahani śāntātmā pāvanāya hitāya ca / evameva prasaṃkhyāya tatvabuddhirvimucyate /
niṣpalaṃ kevalaṃ bhavati śuddhatatvārthatatvavit //

bhikṣukāśramamāsthāya śuśrūṣānirato budhaḥ /
śūdro nirmucyate satvasaṃsargādeva nānyathā //

satsannikraṣe parivartitavyaṃ vidyādhikāścāpi niṣevitavyāḥ /
savarṇatāṃ gacchati sannikarṣā- nnīlaḥ khago merumivāśrayanvai //
bhīṣma uvāca /

ityevamākhyāya mahāmunistadā caturṣu varṇeṣu vidhānamarthavit /
śuśrūṣayā vṛttagatiṃ samādhinā samādhiyuktaḥ prayayau svamāśramam //