Mahabharata · Chapter 13.148

na tathā sampradānena nopavāsādibhistathā /
iṣṭāṃ gatimavāpnoti yathā śuśrūṣakarmaṇā //

yādṛśena tu toyena śuddhiṃ prakurute naraḥ /
tādṛgbhavati taddhautamudakasya prabhāvataḥ //

śūdropyetena mārgeṇa yādṛśaṃ sevate janam /
tādṛgbhavati saṃsargādacireṇa na saṃśayaḥ //

tasmātprayatnataḥ sevyā bhikṣavo niyatātmanā /
udakagrāhaṇādyena snapanodvartanaistathā //

adhvanā karśitānāṃ ca vyādhitānāṃ tathaiva ca /
śuśrūṣāṃ niyataṃ kuryātteṣāmāpadi yatnataḥ //

darbhājinānyavekṣeta bhaikṣabhājanameva ca / yathākāmaṃ ca kāryāṇi sarvāṇyevopasādhayet /
prāyaścittaṃ yatā na syāttathā sarvaṃ samācaret //

vyādhitānāṃ tu bhikṣūṇāṃ celaprakṣālanādibhiḥ /
pratikarmakriyā kāryā bheṣajānayanaistathā //

piṃṣaṇālepanaṃ cūrṇaṃ kaṣāyamatha sādhanam /
nānyasya praticāreṣu sukhārthamupapādayet //

bhikṣāṭano'bhigaccheta bhiṣajaśca vipaścitaḥ /
tato viniṣkriyārthāni dravyāṇi samupārjayet //

yaśca prītamanā dadyādādadyādbheṣajaṃ naraḥ /
aśraddhayā hi dattāni tānyabhokṣyāṇi bhikṣubhiḥ //

śraddhayā yadupādattaṃ śraddhayā copapāditam /
tasyopabhogāddharmaḥ syādvyādhibhiśca nivartyate //

ādehapatanādevaṃ śuśrūṣedvidhipūrvakam /
na tvevaṃ dharmamutsṛjya kuryātteṣāṃ pratikriyām //

svabhāvato hi dvandvāni viprayāntyupayānti ca / svabhāvataḥ sarvabhāvā bhavanti nabhavanti ca /
sāgarasyormisadṛśā vijñātavyā guṇātmakāḥ //

vidyādevaṃ hi yo dhīmāṃstatvavittatvadarśanaḥ / na sa lipyeta pāpena padmapatramivāmbhasā //