Mahabharata · Chapter 13.122

yāstu gomātarastasya kāmacāriṇya āgatāḥ /
samīpaṃ hi sumitrasya kṛtajñāḥ samupasthitāḥ //

abhipraśasya caivāhustamṛṣiṃ puṇyadarśanāḥ /
golokādāgatā veda vṛṣagomātaro vayam //

suprītāḥ sma varaṃ gṛhṇa yamicchasi mahāmune /
yadbhi goṣu parāṃ buddhiṃ kṛtavānasi nityadā //
sumitra uvāca /

prītosmyanugṛhītosmi yanmāṃ gomātaraḥ śubhāḥ /
suprītamanasaḥ sarvāstiṣṭhante ca varapradāḥ //

bhavedgoṣveva me bhaktiryathaivādya tathā sadā /
goghnāścaivāvasīdantu narā brahmadviṣaśca ye //
gomātara ūcuḥ /

evametadṛṣiśreṣṭha hitaṃ vadasi naḥ priyam /
ehi gaccha sahā'smābhirgolokamṛṣisattama //
sumitra uvāca /

yūyamiṣṭāṃ gatiṃ yāntu na hyahaṃ gantumutsahe /
imā gāvaḥ samutsṛjya tapasvinyo mama priyāḥ //
bhīṣma uvāca /

tāstu tasya vacaḥ śrutvā kapilānāṃ sudāruṇam /
nityustamṛṣimutkṣipya bhārgavaṃ nabha udvahan //

kalevaraṃ tu tatraiva tasya sannyasya mātaraḥ /
niṣkṛṣya karaṇaṃ yogādānayanbhārgavasya vai //

sarvaṃ cāsya tadācakhyuḥ kapilānāṃ viceṣṭitam /
yadarthaṃ haraṇaṃ gobhirgolokaṃ lokamātaraḥ //

tatastu kapilāstatra tasya dṛṣṭvā kalevaram /
tathāpratijñaṃ śṛṅgaiśca khuraiścāpyavacūrṇayan //

tataḥ sañchidya bahudhā bhārgavaṃ nṛpasattama /
yuyuryatretarā gāvastacca sarvaṃ nyavedayan //

atha gomātṛbhiḥ śaptāstā gāvaḥ pṛthivīcarāḥ /
amedhyavadanāḥ kṣipraṃ bhavadhvaṃ brahmaghātakāḥ //

evaṃ kṛtajñā gāvo hi yatā gomātaro nṛpa / ṛṣiśca prāptavām̐llokaṃ gāvaśca parimokṣitāḥ //