Mahabharata · Chapter 13.123

tā gāvo rantidevasya gatvā yajñaṃ manīṣiṇaḥ /
ātmānaṃ jñāpayāmāsurmaharṣīṇāṃ samakṣataḥ //

rantidevastato rājā prayataḥ prāñjaliḥ śuciḥ /
uvāca gāvaḥ praṇataḥ kimāgamanamityapi //
gāva ūcuḥ /

iccāmastava rājendra satre'sminviniyojanam /
paśutvamupasamprāptuṃ prasādaṃ kartumarhasi //
rantideva uvāca /

nāsti śakto gavāṃ ghātaṃ kartuṃ śatasahasraśaḥ /
ghātayitvā tvahaṃ yuṣmānkathamātmānamuttare //

yaḥ paśutvena saṃyojya yuṣmānsvargaṃ nayediha /
ātmānaṃ caiva tapasā gāvaḥ samupagamyatām //
gāva ūcuḥ /

asmākaṃ tāraṇe yukto dharmātmā tapasi sthitaḥ /
śruto'smābhirbhavānrājaṃstatastu svayamāgatāḥ //
rantideva uvāca /

mama satre paśutvaṃ vo yadyevaṃ hi manīṣitam /
samayenāhametena juhuyāṃ vo hutāśane //

kadācidyadi vaḥ kācidakāmā viniyujyate /
tadā samāptiḥ satrasya gavāṃ syāditi naiṣṭhikī //
gāva ūcuḥ /

evamastu mahārāja yathā tvaṃ prabravīṣi naḥ /
akāmāḥ syuryadā gāvastadā satraṃ samāpyatām //
bhīṣma uvāca /

tataḥ pravṛtte gosatre rantidevasya dhīmataḥ /
gosahasrāṇyaharaharniyujyante śamītṛbhiḥ //

evaṃ bahani varṣāṇi vyatītāni narādhipa /
gavāṃ vai vadhyamānānāṃ na cāntaḥ pratyadṛśyata //

gavāṃ carmasahasraistu rāśayaḥ parvatopamāḥ /
babhūvuḥ kuruśārdūla bahudhā meghasannibhāḥ //

medaḥkledavahā caiva prāvartata mahānadī /
adyāpi bhuvi vikhyātā nadī carmaṇvatī śubhā //

tataḥ kadācitsvaṃ vatsaṃ gaurupāmantrya duḥkhitā /
ehi vatsa stanaṃ pāhi mā tvaṃ paścātkṣudārditaḥ //

tapsyase vimanā duḥkhaṃ ghātitāyāṃ mayi dhruvam /
ete hyāyānti caṇḍālāḥ saśastrāmāṃ jighāṃsavaḥ //

atha śuśrāva tāṃ vāṇīṃ mānuṣīṃ samudāhṛtām /
rantidevo mahārāja tatastāṃ samavārayat //

sthāpayāmāsa gosatramatha taṃ pārtivarṣabha /
satrotsṛṣṭāḥ parityaktā gāvo'nyāḥ samupāśritāḥ //

yāstasya rājño nihatā gāvo yajñe mahātmanaḥ /
tā golokamupājagmuḥ prekṣitā brahmavādibhiḥ //

rantidevopi rājarṣiriṣṭvā yajñaṃ yathāvidhi /
tataḥ sakhyaṃ surapatestridivaṃ cākṣayaṃ yayau //

phenapo divi goloke mumude śāśvatīḥ samāḥ /
avaśiṣṭaśca yā gavastā babhūvurvanecarāḥ //

phenapākhyānametatte gavāṃ māhātmyameva ca /
kathitaṃ pāvanaṃ puṇyaṃ kṛṣṇadvaipāyaneritam //

nārāyaṇo'pi bhagavāndṛṣṭvā goṣu paraṃ yaśaḥ /
śuśrūṣāṃ paramāṃ cakre bhaktiṃ ca bharatarṣabha //

tasmāttvamapi rājendra gā vai pūjaya bhārata /
dvijebhyaścaiva satataṃ prayaccha kurusattama //