Mahabharata · Chapter 13.121

kadācitkāmarūpiṇyo gāvaḥ strīveṣamāśritāḥ / hrade krīḍanti saṃhṛṣṭā gāyantyaḥ puṇyalakṣaṇāḥ // ?

dadṛśustasya gāvo vai vismayotphullalocanāḥ /
ūcuśca kā yūyamiti striyo mānuṣayā girā //
striya ūcuḥ /

gāva eva vayaṃ sarvakarmabhiḥ śobhanairyutāḥ / sarvāḥ strīveṣadhāriṇyo yathākāmaṃ carāmehe /
gāva ūcuḥ /

gavāṃ gāvaḥ paraṃ daivaṃ gavāṃ gāvaḥ parā gatiḥ /
kathayadhvamihāsmākaṃ kena vaḥ sukṛtāṃ gatiḥ //
striya ūcuḥ /

asmākaṃ haviṣā devā brāhmaṇāstarpitāstathā /
kavyena pitaraścaiva havyenāgniśca tarpitaḥ //

prajayā ca tathā'smākaṃ kṛṣirabhyuddhṛtā sadā /
śakaṭaiścāpi saṃyuktā daśavāhaśatena vai //

tadetaiḥ sukṛtaiḥ sphītairvayaṃ yāścaiva naḥ prajāḥ /
golokamanusamprāptā yaḥ paraṃ kāmagocaraḥ //

yūyaṃ tu sarvā rohiṇyaḥ saprajāḥ sahapuṅgavāḥ /
adhogāminya ityeva paśyāmo divyacakṣuṣā //
gāva ūcuḥ /

evaṃ gavāṃ paraṃ daivaṃ gāva eva parāyaṇam /
svapakṣyāstāraṇīyā vaḥ śaraṇāya gatā vayam //

kimasmābhiḥ karaṇīyaṃ vartitavyaṃ kathañcana /
prāpnuyāma ca golokaṃ bhavāma na ca garhitāḥ //
striya ūcuḥ /

vartate rantidevasya satraṃ varṣasahasrakam /
tatra tasya nṛpasyāśu paśutvamupagacchataḥ //

tatastasyopayogena paśutve yajñasaṃskṛtāḥ /
golokānprāpsyatha śubhāṃstena puṇyena saṃyutāḥ //
bhīṣma uvāca /

etattāsāṃ vacaḥ śrutvā gavāṃ saṃhṛṣṭamānasāḥ /
gamanāya manaścakrurautsukyaṃ cāgamanparam //

na hi no bhārgavo dātā paśutvenopayojanam /
yajñastasya narendrasya vartate dharmatastathā //

vayaṃ na cānanujñātāḥ śaktā gantuṃ kathañcana /
avocannatha tatratyā bhārgavo vadhyatāmayam //

etatsarvā rocayata na hi śakyamato'nyathā /
lokānprāptuṃ sahāsmābhirniścayaḥ kriyatāmayam //

na tu tāsāṃ sametānāṃ kāciddhoreṇa cakṣuṣā /
śaknoti bhārgavaṃ draṣṭuṃ satkṛtenopasaṃyutā //

atha padmasavarṇābhā bhāskarāṃśusamaprabhāḥ /
japālohitatāmrākṣyo nirmāṃsakaṭhinānanāḥ //

rohiṇyaḥ kapilāḥ prāhuḥ sarvāsāṃ vai samakṣataḥ /
meghastanitanirghoṣāstejobhirabhirañcitāḥ //

vayaṃ hi taṃ vadhiṣyāmaḥ sumitraṃ nātraṃ saṃśayaḥ /
sukṛtaṃ pṛṣṭhataḥ kṛtvā kiṃ naḥ śreyo vidhāsyatha //
gāva ūcuḥ /

kapilāḥ sarvavarṇeṣu pradhānatvamavāpsyatha /
gavāṃ śataphalā caikāṃ dattvā phalamavāpsyati //
bhīṣma uvāca /

etadgavāṃ vacaḥ śrutvā kapilā hṛṣṭamānasāḥ / cakruḥ sarvā bhārgavasya sumitrasya vadhe matim //