Mahabharata · Chapter 13.12

yathaiva te namaskāryāḥ proktāḥ śakreṇa mānada /
etanme sarvamācakṣva yebhyaḥ spṛhayase nṛpaḥ //

uttamāpadgatasyāpi yatra te vartate manaḥ /
manuṣyaloke sarvasminyadamutreha cāpyuta //
bhīṣma uvāca /

spṛhayāmi dvijātibhyo yeṣāṃ brahma paraṃ dhanam /
yeṣāṃ sampratyayaḥ svargastapaḥsvādhyāyasādhanam //

yeṣāṃ bālāśca vṛddhāśca pitṛpaitāmahīṃ dhuram /
udvahanti na sīdanti tebhyo vai spṛhayāmyaham //

vidyāsvabhivinītānāṃ dāntānāṃ mṛdubhāṣiṇām /
śrutavṛttopapannānāṃ sadā'kṣaravidāṃ satām //

saṃsatsu vadatāṃ tāta haṃsānāmiva saṅghaśaḥ /
maṅgalyarūpā rucirā divyajīmūtaniḥsvanāḥ //

samyaguccaritā vācaḥ śrūyante hi yudhiṣṭhira /
śuśrūṣamāṇe nṛpatau pretya ceha sukhāvahāḥ //

ye cāpi teṣāṃ śrotāraḥ sadā sadasi sammatāḥ /
vijñānaguṇasampannāstebhyaśca spṛhayāmyaham //

susaṃskṛtāni prayatāḥ śucīni guṇavanti ca / dadatyannāni tṛptyarthaṃ brāhmaṇebhyo yudhiṣṭhara /
ye cāpi satataṃ rājaṃstebhyaśca spṛhayāmyaham //

śakyaṃ hyevāhave yoddhuṃ na dātumanasūyitum //

śūrā vīrāśca śataśaḥ santi loke yudhiṣṭhira /
teṣāṃ saṃkhyāyamānānāṃ dānaśūro viśiṣyate //

bhadraṃ tu janma samprāpya bhūyo brāhmaṇako bhavet / bandhumadhye kule jātaḥ sudurāpamavāpnuyāt //

dhanyaḥ syāṃ yadyahaṃ bhūyaḥ saumyabrāhmaṇakopi vā /
kule jāto dharmagatistapovidyāparāyaṇaḥ //

na me tvattaḥ priyataro loke'sminpāṇḍunandana /
tvattaścāpi priyatarā brāhmaṇā eva bhārata //

yathā mama priyatamāstvatto viprāḥ kurūttama /
tena satyena gaccheyaṃ lokānyatra sa śantanuḥ //

na me pitā priyataro brahmaṇebhyastathā'bhavat /
na me pituḥ pitā vā'pi ye cānye'pi suhṛñjanāḥ //

na hi me vṛjinaṃ kiñcidvidyate brāhmaṇeṣviha /
aṇu vā yadi vā sthūlaṃ vidyate sādhukarmasu //

karmaṇā manasā vā'pi vācā vā'pi parantapa /
yanme kṛtaṃ brāhmaṇebhyastenādya na tapāmyaham //

brahmaṇya iti māmāhustayā vācā'smi toṣitaḥ /
etadeva pavitrebhyaḥ sarvebhyaḥ paramaṃ smṛtam //

paśyāmi lokānamalāñśucīnbrāhmaṇatoṣaṇāt /
teṣu me tāta gantavyamahnāya ca cirāya ca //

yathā bhartrāśrayo dharmaḥ strīṇāṃ loke yudiṣṭhira /
sa devaḥ sā gatirnānyā kṣatriyasya tathā dvijāḥ //

kṣatriyaḥ śatavarṣī ca daśavarṣī dvijottamaḥ /
pitāputrau ca vijñeyau tayorhi brāhmaṇo guruḥ //

nārī tu patyabhāve vai devaraṃ kurute patim /
pṛthivī brāhmaṇālābhe kṣatriyaṃ kurute patim //

brāhmaṇānujñayā grāhyaṃ rājyaṃ ca sapurohitaiḥ / tadrakṣaṇena svargo'sya tatkopānnarako'kṣayaḥ //

putravaccaiva te rakṣyā upāsyā guruvacca te /
agnivaccopacāryā vai brāhmaṇāḥ kurusattam //

ṛjunsataḥ satyaśīlānsarvabhūtahite ratān /
āśīviṣāniva kruddhāndvijānparicaretsadā //

tejasastapasaścaiva nityaṃ bibhyedyudhiṣṭhira /
ubhe caite parityājye tejaścaiva tapastathā //

vyavasāyastayoḥ śīghramubhayoreva vidyate /
hanyuḥ kruddhā mahārāja brāhmaṇā ye tapasvinaḥ //

dūrato mātṛvatpūjyā vipradārāḥ surakṣayā /
akopanāparādhena bhūyo narakamaśnute //

bhūyaḥ syādubhayaṃ dattaṃ brāhmaṇādyadakopanāt /
kuryādubhayataḥ śeṣaṃ dattaśeṣaṃ na śeṣayet //

daṇḍapāṇiryathā goṣṭhaṃ pālo nityaṃ hi rakṣayet /
brāhmaṇeṣu sthitaṃ brahma kṣatriyaḥ paripālayet //

piteva putrānrakṣethā brāhmaṇānbrahmatejasaḥ /
gṛhe caiṣāmavekṣethāḥ kiṃsvidastīti jīvanam //