Mahabharata · Chapter 13.11

ānṛśaṃsyasya dharmajña guṇānbhaktajanasya ca /
śrotumicchāmi dharmajña tanme brūhi pitāmaha //
bhīṣma uvāca /

atrāpyudāharantīmamitihāsaṃ purātanam /
vāsavasya ca saṃvādaṃ śukasya ca mahātmanaḥ //

viṣaye kāśirājasya grāmānniṣkramya lubdhakaḥ /
saviṣaṃ kāṇḍamādāya mṛgayāmāsa vai mṛgam //

tatra cāmiṣalubdhena lubdhakena mahāvane /
avidūre mṛgāndṛṣṭvā bāṇaḥ pratisamāhitaḥ //

tena durvāritāstreṇa nimittacapaleṣuṇā /
mahānvanatarustatra viddho mṛgajighāṃsayā //

sa tīkṣṇaviṣadigdhena śareṇātibalātkṣataḥ /
utsṛjya phalapatrāṇi pādapaḥ śoṣamāgataḥ //

tasminvṛkṣe tathābhūte koṭareṣu ciroṣitaḥ /
na jahāti śuko vāsaṃ tasya bhaktyā vanaspateḥ //

niṣpracāro nirāhāro glānaḥ śithilavāgapi /
kṛtajñaḥ saha vṛkṣeṇa dharmātmā sopyaśuṣyata //

tamudāraṃ mahāsatvamatimānuṣaceṣṭitam /
samaduḥkhasukhaṃ dṛṣṭvā vismitaḥ pākaśāsanaḥ //

tataścintāmupagataḥ śakraḥ kathamayaṃ dvijaḥ /
tiryagyonāvasambhāvyamānṛśaṃsyamavasthitaḥ //

athavā nātra citraṃ hītyabhavadvāsavasya tu /
prāṇināmapi sarveṣāṃ sarvaṃ sarvatra dṛśyate //

tato brāhmaṇaveṣeṇi mānuṣaṃ rūpamāsthitaḥ /
avatīrya mahīṃ śakrastaṃ pakṣiṇamuvāca ha //

śuka bho pakṣiṇāṃśreṣṭha dākṣeyī suprajāstvayā /
pṛcche tvāṃ śukamenaṃ tvaṃ kasmānna tyajasi drumam //

atha pṛṣṭaḥ śukaḥ prāha mūrdhnā samabhivādya tam /
svāgataṃ devarāja tvaṃ vijñātastapasā mayā //

tato daśaśatākṣeṇa sādhusādhviti bhāṣitam /
aho vijñānamityevaṃ manasā pūjitastataḥ //

tamevaṃ śubhakarmāṇaṃ śukaṃ paramadhārmikam /
jānannapi ca tatpāpaṃ papraccha balasūdanaḥ //

niṣpatramaphalaṃ śuṣkamaśaraṇyaṃ patattriṇām /
kimarthaṃ sevase vṛkṣaṃ yadā mahadidaṃ vanam //

anye'pi bahavo vṛkṣāḥ patrasañchannakoṭarāḥ /
śubhāḥ paryāptasañcārā vidyante'sminmahāvane //

gatāyuṣamasāmarthyaṃ kṣīṇasāraṃ hataśriyam /
vimṛśya prajñayā dhīra jahīmaṃ hyasthiraṃ drumam //
bhīṣma uvāca /

tadupaśrutya dharmātmā śukaḥ śakreṇa bhāṣitam /
sudīrghamatiniḥśvasya dīno vākyamuvāca ha //

anatikramaṇīyāni daivatāni śacīpate /
yatrābhavaṃstatra bhavāṃstannibodha surādhipa //

asminnahaṃ drume jātaḥ sādhubhiśca guṇairyute /
cālabhāvena saṅguptaḥ śatrubhiśca na dharṣitaḥ //

kimanukrośyaṃ vaiphalyamutpādayasi me'nagha / anuraktasya bhaktasya saṃspṛśe na ca pāvakam /
ānṛśaṃsyābhiyuktasya bhaktasyānanyagasya ca //

anukrośo hi sādhūnāṃ mahaddharmasya lakṣaṇam /
anukrośaśca sādhūnāṃ sadā prītiṃ prayacchati //

tvameva daivataiḥ sarvaiḥ pṛcchyase dharmasaṃśayāt /
atastvaṃ devadevānāmādhipatye pratiṣṭhitaḥ //

nārhase māṃ sahasrākṣa drumaṃ tyājayituṃ cirāt /
samasthamupajīvanvai viṣamasthaṃ kathaṃ tyajet //

tasya vākyena saumyena harṣitaḥ pākaśāsanaḥ /
śukaṃ provāca dharmajñamānṛśaṃsyena toṣitaḥ //

varaṃ vṛṇīṣveti tadā sa ca vavre varaṃ śukaḥ /
ānṛśaṃsyaparo nityaṃ tasya vṛkṣasya sambhavam //

viditvā ca dṛḍhāṃ bhaktiṃ tāṃ śuke śīlasampadam /
prītaḥ kṣipramatho vṛkṣamamṛtenāvasiktavān //

tataḥ phalāni patrāṇi śākhāścāpi manoharāḥ /
śukasya dṛḍhabhaktitvācchrīmattāṃ prāpa sa drumaḥ //

śukaśca karmaṇā tena ānṛśaṃsyakṛtena vai /
āyuṣonte mahārāja prāpa śakrasalokatām //

evameva manuṣyendra bhaktimantaṃ samāśritaḥ /
sarvārthasiddhiṃ labhate śukaṃ prāpya yathā drumaḥ //