Mahabharata · Chapter 13.118

surabheḥ kāḥ prajāḥ pūrvaṃ mārtāṇḍādabhavanpurā /
etanme śaṃsa tatveni goṣu me prīyate manaḥ //
bhīṣma uvāca /

śṛṇu nāmāni divyāni gomātṝṇāṃ viśeṣataḥ /
yābhirvyāptāstrayo lokāḥ kalyāṇībhirjanādhipa //

surabhyaḥ prathamodbhūtā yāśca syuḥ prathamāḥ prajāḥ /
mayocyamānāḥ śṛṇu tāḥ prāpsyase vipulaṃ yaśaḥ //

taptvā tapo ghoratapāḥ surabhirdiptatejasaḥ /
suṣāvaikādaśa sutānrudrā ye cchandasi stutāḥ //

ajaikapādahirbudhnyastryambakaśca mahāyaśāḥ /
vṛṣākapiśca śambhuśca kapālī raivatastathā //

haraśca bahurūpaśca ugra ugro'tha vīryavān /
tasya caivātmajaḥ śrīmānviśvarūpo mahāyaśāḥ //

ekādaśaite kathitā rudrāste nāma nāmataḥ /
mahātmāno mahāyogāstejoyuktā mahābalāḥ //

ete variṣṭhajanmāno devānāṃ brahmavādinām /
viprāṇāṃ prakṛtirloke eta eva hi viśrutāḥ //

eta ekādaśa proktā rudrāstribhuvaneśvarāḥ /
śataṃ tvetatsamākhyātaṃ śatarudraṃ mahātmanām //

suṣuve prathamāṃ kanyāṃ surabhiḥ pṛthivīṃ tadā /
viśvakāmadughā dhenuryā dhārayati dehinaḥ //

sutaṃ gobrāhmaṇaṃ rājannekamityabhidhīyate /
gobrāhmaṇasya jananī surabhiḥ parikīrtyate //

sṛṣṭvā tu prathamaṃ rudrānvaradānrudrasambhavān /
paścātprabhuṃ grahapatiṃ suṣuve lokasammatam //

somarājānamamṛtaṃ yajñasarvasvamuttamam /
oṣadhīnāṃ rasānāṃ ca devānāṃ jīvitasya ca //

tataḥ śriyaṃ ca medhāṃ ca kīrtiṃ devīṃ sarasvatīm /
catasraḥ suṣuve kanyā yogeṣu niyatāḥ stitāḥ //

etāḥ sṛṣṭvā prajā eṣā surabhiḥ kāmarūpiṇī /
suṣuve paramaṃ bhūyo divyā gomātaraḥ śubhāḥ //

puṇyāṃ māyāṃ madhuścyotāṃ śivāṃ śīghrāṃ saridvarām /
hiraṇyavarṇāṃ subhagāṃ gavyāṃ pṛśnīṃ kuthāvatīm //

aṅgāvatīṃ ghṛtavatīṃ dadhikṣīrapayovatīm /
amoghāṃ suramāṃ satyāṃ revatīṃ mārutīṃ rasām //

ajāṃ ca sikatāṃ caiva śuddhadhūmāmadhāriṇīm /
jīvāṃ prāṇavatīṃ dhanyāṃ śuddhāṃ dhenuṃ dhanāvahām //

indrāmṛddhiṃ ca śānti ca śāntapāpāṃ saridvarām /
catvāriṃśatimekāṃ ca dhanyāstā divi pūjitāḥ //

bhūyo jajñe surabhyāśca śrīmāṃścandrāṃśusaprabhaḥ / vṛpo dakṣa iti khyātaḥ kaṇḍhe maṇitalaprabhaḥ /

sragvī kakudmāndyutimānmṛṇālasadṛśaprabhaḥ /
surabhyanumate datto dhvajo māheśaavarastu saḥ //

surabhyaḥ kāmarūpiṇyo gāvaḥ puṇyārthamutkaṭāḥ /
ādityebhyo vasubhyaśca viśvebhyaśca dadau varān //

surabhistu tapastaptvā suṣuve gāstataḥ punaḥ /
yā dattā lokapālānāmindrādīnāṃ yudhiṣṭhira //

suṣṭunāṃ kapilāṃ caiva rohiṇīṃ ca yaśasvinīm /
sarvakāmadughāṃ caiva marutāṃ kāmarūpiṇīm //

gāvo mṛṣṭadughā hyetāstāścatasro'tra saṃstutāḥ /
yāsāṃ bhūtvā purā vatsāḥ pibantyamṛtamuttamam //

suṣṭutāṃ devarājāya vāsavāya mahātmane /
kapilāṃ dharmarājāya varuṇāya ca rohiṇīm //

sarvakāmadughāṃ dhenuṃ rājñe vaiśravaṇāya ca /
ityetā lokamahitā viśrutāḥ surabheḥ prajāḥ //

etāsāṃ prajayā pūrṇā pṛthivī munipuṅgavaḥ /
gobhyaḥ prabhavate sarvaṃ yatkiñcidiha śobhanam //

surabhyapatyamityetannāmataste'nupūrvaśaḥ /
kīrtitaṃ brūhi rājendra kiṃ bhūyaḥ kathayāmi te //