Mahabharata · Chapter 13.117

surāṇāmasurāṇāṃ ca bhūtānāṃ ca pitāmaha /
prabhuḥ sraṣṭā ca bhagavānmunibhiḥ stūyate bhuvi //

tasyopari kathaṃ hyeṣa golokaḥ sthānatāṃ gataḥ /
saṃśayo me mahāneṣa tanme vyākhyātumarhasi //
bhīṣma uvāca /

manovāgbuddhayastāvadekasthāḥ kurusattama /
tato me śṛṇu kārtsnyena gomahābhāgyamuttamam //

puṇyaṃ yaśasyamāyuṣyaṃ tathā svastyayanaṃ mahat /
kīrtirviharatā loke gavāṃ yo goṣu bhaktimān //

śrūyate hi purāṇeṣu maharṣīṇāṃ mahātmanām /
saṃsthāne sarvalokānāṃ devānāṃ cāpi sambhave //

devatārthe'mṛtārthe ca yajñārthe caiva bhārata /
surabhirnāma vikhyātā rohiṇī kāmarūpiṇī //

saṅkalpya manasā pūrvaṃ rohiṇī hyamṛtātmanā /
ghoraṃ tapaḥ samāsthāya nirmitī visvakarmaṇā //

puruṣaṃ cāsṛjadbhūstejasā tapasā ca ha /
dedīpyamānaṃ vapuṣā samiddhamiva pāvakam //

so'paśyadiṣṭarūpāṃ tāṃ surabhiṃ rohiṇīṃ tadā /
dṛṣṭvaiva cātivimanāḥ so'bhavatkāmamohitaḥ //

taṃ kāmārtamatho jñātvā svayambhūrlokabhāvanaḥ /
mā'rto bhava tathā caiṣa bhagavānabhyabhāṣata //

tataḥ sa bhagavāṃstatra mārtāṇḍa iti viśrutaḥ /
cakāra nāma taṃ dṛṣṭvā tasyārtībhāvamuttamam //

so'dadādbhagavāṃstasmai mārtāṇḍāya mahātmane /
surūpāṃ surabhiṃ kanyāṃ tapastejomayīṃ śubhām //

yathā mayaiṣa codbhūtastvaṃ caivaṣā ca rohiṇī /
maithunaṃ gatavantau ca tathā cotpatsyati prajā //

prajā bhaviṣyate puṇyā pavitraṃ paramaṃ ca vām /
na cāpyagamyāgamanāddoṣaṃ prāpsyasi karhicit //

tvatprajāsambhavaṃ kṣīraṃ bhaviṣyati paraṃ haviḥ /
yajñeṣu cājyabhāgānāṃ tvatprajāmūlajo vidhiḥ //

prajāśuśrūṣavaścaiva ye bhaviṣyanti rohiṇi /
tava tenaiva puṇyeni golokaṃ yāntu mānavāḥ //

idaṃ pavitraṃ paramamṛṣabhaṃ nāma karhicit /
yadvai jñātvā dvijā loke mokṣyante yonisaṅkarāt //

etatkriyāḥ pravartante mantrabrāhmaṇasaṃskṛtāḥ /
devatānāṃ vitṝṇāṃ ca havyakavyapurogamāḥ //

tata etena puṇyena prajāstava tu rohiṇi /
ūrdhvaṃ mamāpi lokasya vatsyante nirupadravāḥ //

bhadraṃ tebhyaśca bhadraṃ te ye prajāsu bhavanti vai /
yugandharāśca te putrāḥ santu lokasya dhāraṇe //

yānyānkāmayase lokāṃstām̐llokānanuyāsyasi / sarvadevagaṇaścaiva tava yāsyanti putratām /
tava stanasamudbhūtaṃ pibanto'mṛtamuttamam //

evametānvarānsarvānagṛhṇātsurabhistadā /
bruvataḥ sarvalokeśānnirvṛtiṃ cāgamatparām //

sṛṣṭvā prajāśca vipulā lokasandhāraṇāya vai /
brahmaṇā samanujñātā surabhirlokamāviśat //

evaṃ varapradānena svayambhoreva bhārata / upariṣṭādgavāṃ lokaḥ proktaste sarvamāditaḥ //