Mahabharata · Chapter 13.119

surabhyāstu tadā devyāḥ kīrtirlakṣmīḥ sarasvatī /
medhā ca pravarā devī yāścatasro'bhiviśrutāḥ //

pṛthaggobhyaḥ kimetāḥ syurutāho goṣu saṃśritāḥ /
devāḥ ke vā'śritā goṣu tanme brūhi pitāmaha //
bhīṣma uvāca /

yaṃ devaṃ saṃśritā gāvastaṃ devaṃ devasañjñitam /
yadyaddevāśritaṃ daivaṃ tattaddaivaṃ dvijā viduḥ //

sarveṣāmeva devānāṃ pūrvaṃ kila samudbhave /
amṛtārthe surapatiḥ surabhiṃ samupasthitaḥ //
indra uvāca /

iccheyamamṛtaṃ dattaṃ tvayā devi rasādhikam /
tvatprasādācchivaṃ mahyamamaratvaṃ bhavediti //
surabhiruvāca /

vatso bhūtvā suparate pibasva prasravaṃ mama /
tato'maratvamapi tasthānamaindramavāpsyasi //

na ca te vṛtrahanyuddhe vyathā'ribhyo bhaviṣyati /
balārthamātmanaḥ śakra prasravaṃ piba me vibho //
bhīṣma uvāca /

tato'pibatsnaṃ tasyāḥ surabhyāḥ surasattamaḥ /
amaratvaṃ surūpatvaṃ balaṃ cāpadanuttamam //

purandaro'mṛtaṃ pītvā prahṛṣṭaḥ samupasthitaḥ /
putro'haṃ tava bhadraṃ te brūhi kiṃ karavāṇi te //
surabhiruvāca /

kṛtaṃ putra tvayā sarvamupayāhi triviṣṭapam /
pālayasva surānsarvāñjahi ye suraśatravaḥ //

na ca gobrāhmaṇe'vajñā kāryā te śāntimicchatā /
gobrāhmaṇasya niśvāsaḥ śoṣayedapi devatāḥ //

gobrāhmaṇapriyo nityaṃ svastiśabdamudāharan /
pṛthivyāmantarikṣe ca nākapṛṣṭhe ca vikramet //

yacca te'nyadbhavetkṛtyaṃ tanme brūyāḥ samāsataḥ /
tatte sarvaṃ kariṣyāmi satyenaitadbravīmi te //
indra uvāca /

iccheyaṃ goṣu niyataṃ vastuṃ devi bravīmi te /
ebhiḥ suragaṇaiḥ sārdhaṃ mamānugrahamācara //
surabhiruvāca /

gavāṃ śarīraṃ pratyakṣametatkauśika lakṣye /
yo yatrotsahate vastuṃ sa tatra vasatāṃ suraḥ //

sarvaṃ pavitraṃ paramaṃ gavāṃ gātraṃ supūjitam /
tathā kuruṣva bhadraṃ te yathā tvaṃ śakra manyase //
bhīṣma uvāca /

tasyāstadvacanaṃ śrutvā surabhyāḥ surasattamaḥ /
saha sarvaiḥ suragaṇairabhajatsaurabhīṃ prajām //

śṛṅge vaktre ca jihvāyāṃ devarājaḥ samāviśat /
sarvacchidreṣu pavanaḥ pādeṣu marutāṃ gaṇāḥ //

kakudaṃ sarvago rudraḥ kukṣau caiva hutāśanaḥ /
sarasvatī staneṣvagryā śrīḥ purīṣe jagatpriyā //

mūtre kīrtiśca gaṅgā ca medhā payasi śāśvatī /
vaktre somaśca vai devo hṛdaye bhagavānyamaḥ //

dharmaḥ pucche kriyā lomni bhāskaraścakṣuṣī śritaḥ /
siddhāḥ sandhiṣu siddhiśca tapastejaśca ceṣṭane //

evaṃ sarve suragaṇā niyatā gātravartmasu /
mahatī devatā gāvo brāhmaṇaiḥ parisaṃskṛtāḥ //

gāmāśrayanti sahitā devā hi prabhaviṣṇavaḥ /
kimāsāṃ sarvabhāvena vidadhyādbhagavānpriyam //

bhavāṃśca parayā bhaktyā pūjayasva nareśvara /
gāvastu paramaṃ loke pavitraṃ pāvanaṃ haviḥ //

nipātya bhakṣitaḥ svargādbhārgavaḥ phenapaḥ kila / sa ca prāṇānpunarlabdhvā tato golokamāśritaḥ //