Mahabharata · Chapter 13.109

jānyo gāmapaharedvikrīyāccārthakāraṇāt /
etadvijñātumicchāmi kānu tasya gatirbhavet //
pitāmaha uvāca /

bhaktārthaṃ vikrayārthaṃ vā ye'pahāraṃ hi kurvate /
dānārthaṃ brāhmaṇārthāya tatredaṃ śrūyatāṃ phalam //

vikrayārthaṃ hi yo hiṃsyādbhakṣayedvā niraṅkuśaḥ /
ghātayānaṃ hi puruṣaṃ ye'numanyeyurarthinaḥ //

ghātakaḥ khādako vā'pi tathā yaścānumanyate /
yāvanti tasyā romāṇi tāvadvarṣāṇi majjati //

ye doṣā yādṛśāścaiva dvijayajñopaghātake /
vikraye cāpahāre ca te doṣā vai smṛtā gavām //

apahṛtya tu yo gāṃ vai brāhmaṇāya prayacchati / yāvaddāne tu yo gāṃ vai brāhmaṇāya prayacchati /

suvarṇaṃ dakṣiṇāmāhurgopradāne mahādyute /
suvarṇaṃ paramityuktaṃ dakṣiṇārthamasaṃśayam //

gopradānāttārayate sapta pūrvāṃstathā'parān /
suvarṇaṃ dakṣiṇāṃ kṛtvā tāvaddviguṇamucyate //

suvarṇaṃ paramaṃ dānaṃ suvarṇaṃ dakṣiṇā parā /
suvarṇaṃ pāvanaṃ śakra pāvanānāṃ paraṃ smṛtam //

kulānāṃ pāvanaṃ prāhurjātarūpaṃ śatakrato /
eṣā me dakṣiṇā proktā samāsena mahādyute //
bhīṣma uvāca /

etatpitāmahenoktamindrāya bharatarṣabha /
indro daśarathāyāha rāmāyāha pitā tathā //

rāghavopi priyabhrātre lakṣmaṇāya yaśasvine /
ṛṣibhyo lakṣmaṇenoktamaraṇye vasatā prabho //

pāramparyāgataṃ cedamṛṣayaḥ saṃśitavratāḥ /
durdharaṃ dārayāmāsū rājānaścaiva dhārmikāḥ //

upādhyāyena gaditaṃ mama cedaṃ yudhiṣṭhira //

ya idaṃ brāhmaṇo nityaṃ vadedbrāhmaṇasaṃsadi /
yajñeṣu gopradāneṣu dvayorapi samāgame //

tasya lokāḥ kilākṣayyā daivataiḥ saha nityadā /
iti brahmā sa bhagavānuvāca parameśvaraḥ //