Mahabharata · Chapter 13.107

uktaṃ te gopradānaṃ vai nāciketamṛṣiṃ prati /
māhātmyamapi caivoktamuddeśena gavāṃ prabho //

nṛgeṇa ca mahadduḥkhamanubhūtaṃ mahātmanā /
ekāparādhādajñānātpitāmaha mahāmate //

dvāravatyāṃ yathā cāsau niviśantyāṃ samuddhṛtaḥ /
mokṣaheturabhūtkṛṣṇastadapyavadhṛtaṃ mayā //

kiṃ tvasti mama sandeho gavāṃ lokaṃ prati prabho /
tattvataḥ śrotumicchāmi godā yatra vasantyuta //
bhīṣma uvāca /

atrāpyudāharantīmamitihāsaṃ purātanam /
yathā'pṛcchatpadmayonimetadeva śatakratuḥ //
śakra uvāca /

svarlokavāsināṃ lakṣmīmabhibhūya svayā'rciṣā /
golokavāsinaḥ paśye vadatāṃ saṃśayo'tra me //

kīdṛśā bhagavam̐llokā gavāṃ tadbūhi me'nagha /
yānāvasanti dātāra etadicchāmi veditum //

kīdṛśāḥ kimphalāḥ kiṃsvitparamastatra ko guṇaḥ /
kathaṃ ca puruṣāstatra gacchanti vigatajvarāḥ //

kiyatkālaṃ pradānasya dātā ca phalamaśnute /
kathaṃ bahuvidhaṃ dānaṃ syādalpamapi vā katham //

bahvīnāṃ kīdṛśaṃ dānamalpānāṃ vā'pi dīdṛśam / adattvā gopradāḥ santi kena vā tacca śaṃsa me

kathaṃ vā bahudātā syādalpadātrā samaḥ prabho /
alpapradātā bahudaḥ kathaṃ svitsyādiheśvara //

kīdṛśī dakṣiṇā caiva gopradāne viśiṣyate /
etattathyena bhagavanmama śaṃsitumarhasi //