મહાભારત · અધ્યાય 13.107

ઉક્તં તે ગોપ્રદાનં વૈ નાચિકેતમૃષિં પ્રતિ ।
માહાત્મ્યમપિ ચૈવોક્તમુદ્દેશેન ગવાં પ્રભો ॥

નૃગેણ ચ મહદ્દુઃખમનુભૂતં મહાત્મના ।
એકાપરાધાદજ્ઞાનાત્પિતામહ મહામતે ॥

દ્વારવત્યાં યથા ચાસૌ નિવિશન્ત્યાં સમુદ્ધૃતઃ ।
મોક્ષહેતુરભૂત્કૃષ્ણસ્તદપ્યવધૃતં મયા ॥

કિં ત્વસ્તિ મમ સન્દેહો ગવાં લોકં પ્રતિ પ્રભો ।
તત્ત્વતઃ શ્રોતુમિચ્છામિ ગોદા યત્ર વસન્ત્યુત ॥
ભીષ્મ ઉવાચ ।

અત્રાપ્યુદાહરન્તીમમિતિહાસં પુરાતનમ્ ।
યથાઽપૃચ્છત્પદ્મયોનિમેતદેવ શતક્રતુઃ ॥
શક્ર ઉવાચ ।

સ્વર્લોકવાસિનાં લક્ષ્મીમભિભૂય સ્વયાઽર્ચિષા ।
ગોલોકવાસિનઃ પશ્યે વદતાં સંશયોઽત્ર મે ॥

કીદૃશા ભગવઁલ્લોકા ગવાં તદ્બૂહિ મેઽનઘ ।
યાનાવસન્તિ દાતાર એતદિચ્છામિ વેદિતુમ્ ॥

કીદૃશાઃ કિમ્ફલાઃ કિંસ્વિત્પરમસ્તત્ર કો ગુણઃ ।
કથં ચ પુરુષાસ્તત્ર ગચ્છન્તિ વિગતજ્વરાઃ ॥

કિયત્કાલં પ્રદાનસ્ય દાતા ચ ફલમશ્નુતે ।
કથં બહુવિધં દાનં સ્યાદલ્પમપિ વા કથમ્ ॥

બહ્વીનાં કીદૃશં દાનમલ્પાનાં વાઽપિ દીદૃશમ્ । અદત્ત્વા ગોપ્રદાઃ સન્તિ કેન વા તચ્ચ શંસ મે

કથં વા બહુદાતા સ્યાદલ્પદાત્રા સમઃ પ્રભો ।
અલ્પપ્રદાતા બહુદઃ કથં સ્વિત્સ્યાદિહેશ્વર ॥

કીદૃશી દક્ષિણા ચૈવ ગોપ્રદાને વિશિષ્યતે ।
એતત્તથ્યેન ભગવન્મમ શંસિતુમર્હસિ ॥