Mahabharata · Chapter 13.10

karmaṇāṃ ca samastānāṃ phalināṃ bharatarṣabha /
phalāni mahatāṃ śreṣṭa prabrūhi paripṛcchataḥ //
bhīṣma uvāca /

hanta te kathayiṣyāmi yanmāṃ pṛcchasi bhārata / rahasyaṃ yadṛṣīṇāṃ tu tacchṛṇuṣva yudhiṣṭhira /
yā gatiḥ prāpyate yena pretyabhāve cirepsitā //

yenayena śarīreṇa yadyatkarma karoti yaḥ /
tenatena śarīreṇa tattatphalamupāśnute //

yasyāṃyasyāmavasthāyāṃ yatkaroti śubhāśubham /
tasyāntasyāmavasthāyāṃ bhuṅkte janmanijanmani //

na naśyati kṛtaṃ karma cittapañcendriyairiha /
te hyasya sākṣiṇo nityaṃ ṣaṣṭha ātmā śubhāśubhe //

cakṣurdadyānmano dadyādvācaṃ dadyācca sūnṛtām /
anuvrajedupāsīta sa yajñaḥ pañcadakṣiṇaḥ //

yo dadyādaparikliṣṭamannamadhvani vartate /
śrāntāyādṛṣṭapūrvāya tasya puṇyaphalaṃ mahat //

sthaṇḍileṣu śayānānāṃ gṛhāṇi śayanāni ca /
cīravalkalasaṃvīte vāsāṃsyābharaṇāni ca //

vāhanāni ca yānāni yogātmani tapodhane /
agnīnupaśayānasya rājñaḥ pauruṣameva ca //

rasānāṃ pratisaṃhāre saubhāgyamanugacchati /
āmiṣapratisaṃhāre paśūnputrāṃśca vindati //

avākśirāstu yo lambedudavāsaṃ ca yo vaset /
maṇḍūkaśāyī ca naro labhate cepsitāṃ gatim //

pādyamāsanamevātha dīpamannaṃ pratiśrayam /
dadyādatithipūjārthaṃ sa yajñaḥ pañcadakṣiṇaḥ //

vīrāsanaṃ vīraśayyāṃ vīrasthānamupāsataḥ /
akṣayāstasya vai lokāḥ sarvakāmagamāstathā //

dhanaṃ labheta dānena maunenājñāṃ viśāmpate /
upabhogāṃśca tapasā brahmacaryeṇa jīvitam //

rūpamaiśvaryamārogyamahiṃsāphalamaśnute /
phalamūlāśino rājyaṃ svargaḥ parṇāśināṃ bhavet //

prāyopaveśino rājansarvatra sukhamucyate /
gavāḍhyaḥ śākadīkṣāyāṃ svargagāmī tṛṇāśanaḥ //

striyastriṣavaṇaṃ snātvā vāyuṃ pītvā kratuṃ labhet /
svargaṃ satyena labhate dīkṣayā kulamuttamam //

salilāśī bhavedyastu sadāgniḥ saṃskṛto dvijaḥ /
marutsādhayato rājyaṃ nākapṛṣṭhamanāśine //

upavāsaṃ ca dīkṣāyāmabhiṣekaṃ ca pārthiva /
kṛtvā dvādaśavarṣāṇi vīrasthānādviśiṣyate //

adhītya sarvavedānvai sadyo duḥkhādvimucyate /
tatpāṭhadhāraṇātsvargamarthajñānātparāṃ gatim //

vitṛṣṇānāṃ vedajapātsvargamokṣaphalaṃ smṛtam / mānasaṃ hi carandharma svargalokamupāśnute //

yā dustyajā durmatibhiryā na jīryati jīryataḥ /
yosauprāṇāntikorogastāntṛṣṇāṃ tyajataḥ sukhaṃ //

yathā dhenusahasreṣu vatso vindati mātaram /
evaṃ pūrvakṛtaṃ karma kartāramanugacchati //

acodyamānāni yathā puṣpāṇi ca phalāni ca /
svakālaṃ nātivartante tathā karma purākṛtam //

jīryanti jīryataḥ keśā dantā jīryanti jīryataḥ /
cakṣuḥ śrotre ca jīryete tṛṣṇaikā na tu jīryate //

yena prīṇanti pitarastena prītaḥ prajāpatiḥ / mātā ca yena prīṇāti pṛthivī tena pūjitā /
yena prīṇātyupādhyāyastena syādbrahma pūjitam //

sarve tasyādṛtā dharmā yasyaite traya ādṛtāḥ /
anādṛtāstu yasyaite sarvāstasyāphalāḥ kriyāḥ //
vaiśampāyana uvāca /

bhīṣmasyaitadvacaḥ śrutvā vismitāḥ kurupuṅgavāḥ /
āsanprahṛṣṭamanasaḥ prītimanto'bhavaṃstadā //

yanmantre bhavati vṛthopayujyamāne yatsome bhavati vṛthā'bhiṣūyamāṇe /
yaccāgnau bhavati vṛthā'bhihūyamāne tatsarvaṃ bhavati vṛthā'bhidhīyamāne //

ityetadṛṣiṇā proktamuktavānasmi bhārata /
śubhāśubhaphalaprāptau kimataḥ śrotumicchasi //