Mahabharata · Chapter 12.99
atrāpyudāharantīma-tihāsaṃ purātanam /
pratardano maithilaśca sangrāmaṃ yatra cakratuḥ //
yajñopavītī sangrāme janako mithilādhipaḥ /
yodhānuddharṣayāmāsa tannibodha yudhiṣṭhira //
janako maithilo rājā mahātmā sarvatattvavit /
yodhānāṃ darśayāmāsa svargaṃ narakameva ca //
abhīrūṇāmime lokā bhāsvanto hanta paśyata /
pūrṇā gandharvakanyābhiḥ sarvakāmaduho'kṣayāḥ //
ime palāyamānānāṃ narakāḥ pratyupasthitāḥ /
akīrtiḥ śāśvatī caiva yatitavyamanantaram //
tāndṛṣṭvā'rīnvijayata bhūtvā santyāgabuddhayaḥ /
narakasyāpratiṣṭhasya mā bhūta vaśavartinaḥ //
tyāgamūlaṃ hi śūrāṇāṃ svargadvāramanuttamam /
ityuktāste nṛpatinā yodhāḥ parapurañjaya //
ajayanta raṇe śatrūnharṣayanto nareśvaram /
tasmāttyaktātmanā nityaṃ sthātavyaṃ raṇamūrdhani //
gajānāṃ rathino madhye rathānāmanusādinaḥ /
sādināmantare sthāpyaṃ pādātamapi daṃśitam //
ya evaṃ vyūhate rājā sa nityaṃ jayate ripūn /
tasmaditadvidhātavyaṃ nityameva yudhiṣṭhira //
svarge sukṛtamicchantaḥ suyuddhenātimanyavaḥ /
kṣobhayeyuranīkāni sāgaraṃ makarā yathā //
harṣayeyurviṣaṇṇāṃśca vyavasthāpya parasparam /
teṣāṃ ca bhūmiṃ rakṣeyurbhagnānnātyanusārayet //
punarāvartamānānāṃ nirāśānāṃ ca jīvite /
vegaḥ suduḥsaho rājaṃstasmānnātyanusārayet //
na hi prahartumicchanti śūrāḥ pradravato bhayāt /
tasmātpalāyamānānāṃ kuryānnātyanusāraṇam //
carāṇāmacarā hyannamadaṃṣṭrā daṃṣṭriṇāmapi /
apāṇayaḥ pāṇimatāmannaṃ śūrasya kātarāḥ //
samānapṛṣṭhodarapāṇipādāḥ paścāccharaṃ bhīravo'nuvrajanti /
ato bhayārtāḥ praṇipatya bhūyaḥ kṛtvāñjalīnupatiṣṭhanti śūrān //
śūrabāhuṣu loko'yaṃ lambate putravatsada /
tasmātsarveṣu lokeṣu śūraḥ sammānamarhati //
na hi śauryātparaṃ kiñcintriṣu lokeṣu vidyate /
śūraḥ sarvaṃ pālayati sarvaṃ śūre pratiṣṭhitam //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0