Mahabharata · Chapter 12.97

kṣatradharmāddhi pāpīyānna dharmo'sti narādhipa /
apayāne ca yuddhe ca rājā hanti mahājanam //

atha sma karmaṇā kena lokāñjayati pārthivaḥ /
vidvañjijñāsamānāya prabrūhi bharatarṣabha //
bhīṣma uvāca /

nigraheṇa ca pāpānāṃ sādhūnāṃ sangraheṇa ca /
yajñairdānaiśca rājāno bhavanti śucayo'malāḥ //

uparundhanti rājāno bhūtāni vijayārthinaḥ /
ta eva vijayaṃ prāpya vardhayanti punaḥ prajāḥ //

apavidhyanti pāpāni dānayajñatapobalaiḥ /
anugraheṇa bhūtānāṃ puṇyameṣāṃ vivardhate //

yathaiva kṣetraniryātā niryātaṃ kṣetrameva ca /
hinasti dhānyakakṣaṃ ca na ca dhānyaṃ vinaśyati //

evaṃ śastrāṇi muñcanto ghnanti vadhyānanekadhā /
tasyaiṣā niṣkṛtirdṛṣṭā bhūtānāṃ bhāvanaṃ punaḥ //

yo bhūtāni sadā'narthādvadhātkleśācca rakṣati /
dasyubhyaḥ prāṇadānātsa dhanadaḥ sukhado virāṭ //

sa sarvayajñārījāno rājā'thābhayadakṣiṇaiḥ /
anubhūyeha bhadrāṇi prāpnotīndrasalokatām //

brāhmaṇārthe samutpanne yo'bhiniṣpatya yudhyati /
ātmānaṃ yūpamutsṛjya sa yajño'nantadakṣiṇaḥ //

abhīto vikirañśatrūnpratigṛhya śarāṃstathā /
na tasmāntridaśāḥ śreyo bhuvi paśyanti kiñcana //

tasya śastrāṇi yāvanti tvacaṃ bhindanti saṃyuge /
tāvataḥ so'śnute lokānsarvakāmaduho'kṣayān //

yadasya rudhiraṃ gātrādāhave sampravartate /
saha tenaiva srāveṇa sarvapāpaiḥ pramucyate //

yāni duḥkhāni sahate prāṇānāmatipātane /
na tapo'sti tato bhūya iti dharmavido viduḥ //

pṛṣṭhato bhīravaḥ saṅkhye vartante dharmapūruṣāḥ /
śūrāccharaṇamicchantaḥ parjanyādiva jīvanam //

yadi śūraṃ tathā kṣeme pratīkṣeranyathā bhaye /
pratirūpaṃ janāḥ kuryurna ca tadvartate tathā //

yadi te kṛtamājñāya namaskuryuḥ sadaiva tam /
yuktaṃ nyāyyaṃ ca kuryuste na ca tadvartate tathā //

puruṣāṇāṃ samānānāṃ dṛśyate mahadantaram /
sangrāme'nīkavelāyāmutkṛṣṭeṣu patatsu ca //

patatyabhimukhaṃ śūraḥ parānbhīruḥ palāyate /
āsthāya svargyamadhvānaṃ sahāyānviṣame tyajan //

mā sma tāṃstādṛśāṃstāta janiṣṭā'dharmapūruṣān //

ye sahāyānraṇe hitvā svastimanto gṛhānyayuḥ /
asvasti tebhyaḥ kurvanti devā indrapurogamāḥ //

tyāgena yaḥ sahāyānāṃ svānprāṇāṃstrātumicchati / taṃ hanyuḥ kāṣṭhalohairvā daheyurvā kaṭāgninā /
paśuvanmārayeyurvā kṣatriyā ye syurīdṛśāḥ //

adharmaḥ kṣatriyasyaiṣa yacchayyāmaraṇaṃ bhavet /
visṛjañśleṣmapittāni kṛpaṇaṃ paridevayan //

avikṣatena dehena pralayaṃ yo'dhigacchati /
kṣatriyo nāsya tatkarma praśaṃsanti purāvidaḥ //

na gṛhe maraṇaṃ tāta kṣatriyāṇāṃ praśasyate /
śauṇḍīrāṇāmaśauṇḍīryamadharmaṃ kṛpaṇaṃ ca tat //

idaṃ kṛcchramaho duḥkhaṃ pāpīya iti niṣṭanan /
pratidhvastamukhaḥ pūtiramātyānanuśocayan //

arogāṇāṃ spṛhayate muhurmṛtyumapīcchati /
vīro dṛpto manasvī ca nedṛśaṃ mṛtyumarhati //

raṇeṣu kadanaṃ kṛtvā suhṛdbhiḥ pratipūjita /
tīkṣṇaiḥ śastrairabhikliṣṭaḥ kṣatriyo mutyumarhati //

śūro hi satvamanyubhyāmāviṣṭo yudhyate maśam /
kṛtyamānāni gātrāṇi parairnaivāvabudhyate //

sa saṅkhye nidhanaṃ prāpya praśastaṃ lokapūjitam /
svadharmaṃ vipulaṃ prāpya śakrasyaiti salokatām //

sarvopāyai raṇamukhamātiṣṭhaṃstyaktajīvitaḥ /
prāpnotīndrasya sālokyaṃ śūraḥ pṛṣṭhamadarśayan //

yatrayatra hataḥ śūraḥ śatrubhiḥ parivāritaḥ /
akṣayāṃllabhate lokānyadi dainyaṃ na sevate //