Mahabharata · Chapter 12.96

nādharmeṇa mahīṃ jetuṃ lipseta jagatīpatiḥ /
adharmavijayaṃ labdhvā ko nu manyeta bhūmipaḥ //

adharmayukto vijayo hyadhruvo'svargya eva ca /
pātayatyeva rājānaṃ mahīṃ ca bharatarṣabha //

viśīrṇakavacaṃ caiva tavāsmīti ca vādinam /
kṛtāñjaliṃ nyastaśastraṃ gṛhītvā na vihiṃsayet //

balena vijito yaśca na taṃ yudhyeta bhūmipaḥ /
saṃvatsaraṃ vipraṇayettasmājjātaḥ punarbhavet //

nārvāksaṃvatsarātkanyā praṣṭavyā vikramāhṛtā /
evameva dhanaṃ sarvaṃ yaccānyatsahasā hṛtam //

na tu vadhye dhanaṃ tiṣṭhetpibeyurbrāhmaṇāḥ payaḥ /
yuñjīrannapyanaḍuhaḥ kṣantavyaṃ vā punarbhavet //

rājñā rājaiva yoddhavyastathā dharmo vidhīyate /
nānyo rājānamabhyasyedarājanyaḥ kathañcana //

anīkayoḥ saṃhatayoryadīyādbrāhmaṇo'ntarā /
śāntimicchannubhayato na yoddhavyaṃ tadā bhavet //

maryādāṃ śāśvatīṃ bhindyādbrāhmaṇaṃ yo'bhilaṅghayet / atha cellaṅghayedeva maryādāṃ kṣatriyabruvaḥ /
asaṅkhyepatadūrdhvaṃ syādanādeyaśca saṃsadi //

yastu dharmavilopena maryādābhedanena ca /
tāṃ vṛttiṃ nānuvarteta vijigīṣurmahīpatiḥ //

dharmalabdhāddhi vijayāllābhaḥ ko'bhyadhiko bhavet //

sahasā nyāyyabhūtāni kṣiprameva prasādayet /
sāntvena bhogadānena sa rājñāṃ paramo nayaḥ //

bhujyamānā hyabhogena svarāṣṭrādabhitāpitāḥ /
amitrānparyupāsīranvyasanaughapratīkṣiṇaḥ //

amitropagrahaṃ cāsya te kuryuḥ kṣipramāpadi /
santuṣṭāḥ sarvato rājanrājavyasanakāṅkṣiṇaḥ //

nāmitro vinikartavyo nāticchedyaḥ kathañcana /
jīvitaṃ hyapyaticchinnaḥ santyajedekadā naraḥ //

alpenāpi ca saṃyuktastuṣyate nāparādhitaḥ /
śuddhaṃ jīvitamevāpi tādṛśo bahumanyate //

yasya sphīto janapadaḥ sampannaḥ priyarājakaḥ /
santuṣṭabhṛtyasacivo dṛḍhamūlaḥ sa pārthivaḥ //

ṛtvikpurohitācāryā ye cānye śrutasattamāḥ /
pūjārhāḥ pūjitā yasya sa vai lokaviducyate //

etenaiva ca vṛttena mahīṃ prāpa surottamaḥ /
anye'pi caiva vijayaṃ vijigīṣanti pārthivāḥ //

bhūmivarjaṃ dhanaṃ rājā jitvā rājanmahāhave /
api cānnoṣadhīḥ śaśvadājahāra pratardanaḥ //

agrihotrāgniśeṣaṃ ca havirbhojanameva ca /
ājahāra divodāsastato viprakṛto'bhavat //

sarājakāni rāṣṭrāṇi nābhāgo dakṣiṇāṃ dadau /
anyatra śrotriyasvācca tāpasārthācca bhārata //

uccāvacāni vittāni dharmajñānāṃ yudhiṣṭhira /
āsanrājñāṃ purāṇānāṃ sarvaṃ tanmama rocate //

sarvavidyātirekeṇa jayamicchenmahīpatiḥ /
na māyayā na dambhena ya icchedbhūtimātmanaḥ //